ബെംഗളൂരു: കേന്ദ്ര ആഭ്യന്തരമന്ത്രി അമിത് ഷായ്ക്ക് കർണാടക സന്ദർശനത്തിനിടെ ദേഹാസ്വാസ്ഥ്യം. ഇതേത്തുടർന്ന് ഹുബ്ബള്ളിയിൽ നിശ്ചയിച്ചിരുന്ന മെഡിക്കൽ കോളജ്-ആശുപത്രി ഉദ്ഘാടന പരിപാടിയിൽ അദ്ദേഹത്തിന് പങ്കെടുക്കാനായില്ല. ഡോക്ടർമാരുടെ നിർദേശപ്രകാരം ഹോട്ടലിൽ വിശ്രമിച്ച അമിത് ഷായുടെ ആരോഗ്യനില പിന്നീട് മെച്ചപ്പെട്ടതായി കേന്ദ്രമന്ത്രി പ്രഹ്ലാദ് ജോഷി അറിയിച്ചു.
അമിത് ഷായുടെ ആരോഗ്യനില; പരിപാടി ഒഴിവാക്കി
ഹുബ്ബള്ളി ഗബ്ബൂരിൽ കെ.എൽ.ഇ. ജഗദ്ഗുരു ഗംഗാധര മഹാസ്വാമിഗളു മുരുസാവിരമഠ മെഡിക്കൽ കോളജിന്റെ പുതിയ അക്കാദമിക് കെട്ടിടവും 1,200 കിടക്കകളുള്ള കെ.എൽ.ഇ. ആശുപത്രിയും മെഡിക്കൽ റിസർച്ച് സെന്ററും ഉദ്ഘാടനം ചെയ്യാനായിരുന്നു അമിത് ഷാ നിശ്ചയിച്ചിരുന്നത്.
എന്നാൽ ആരോഗ്യപ്രശ്നത്തെ തുടർന്ന് അദ്ദേഹം പരിപാടിയിൽ പങ്കെടുക്കാതെ ഹോട്ടലിൽ തുടരുകയായിരുന്നു.
ഭക്ഷ്യവിഷബാധയാകാമെന്ന് പ്രഹ്ലാദ് ജോഷി
അമിത് ഷായ്ക്ക് ഭക്ഷ്യവിഷബാധയാകാമെന്നാണ് കേന്ദ്രമന്ത്രി പ്രഹ്ലാദ് ജോഷി അറിയിച്ചത്.
ഛർദിയെ തുടർന്ന് അദ്ദേഹത്തിന് ബലഹീനത അനുഭവപ്പെട്ടതായും ഡോക്ടർമാരുടെ നിർദേശപ്രകാരം വിശ്രമിച്ചതായും ജോഷി പറഞ്ഞു. പിന്നീട് അമിത് ഷായുടെ ആരോഗ്യനില മെച്ചപ്പെട്ടതായും അദ്ദേഹം വ്യക്തമാക്കി.
ഹുബ്ബള്ളി പരിപാടി മറ്റ് നേതാക്കൾ ഉദ്ഘാടനം ചെയ്തു
അമിത് ഷായുടെ അഭാവത്തിൽ കേന്ദ്രമന്ത്രി പ്രഹ്ലാദ് ജോഷി, കർണാടക മെഡിക്കൽ എജുക്കേഷൻ മന്ത്രി ശരൺ പ്രകാശ് പാട്ടീൽ, മുൻ മുഖ്യമന്ത്രി ബസവരാജ് ബൊമ്മൈ, ബെളഗാവി എം.പി. ജഗദീഷ് ഷെട്ടാർ തുടങ്ങിയവർ ചേർന്നാണ് സ്ഥാപനങ്ങളുടെ ഉദ്ഘാടനം നിർവഹിച്ചത്.
അതേസമയം, വൈകിട്ട് അമിത് ഷാ ക്യാമ്പസിൽ ഹ്രസ്വ സന്ദർശനം നടത്തിയ ശേഷം ഡൽഹിയിലേക്ക് മടങ്ങിയതായി റിപ്പോർട്ടുണ്ട്.
ബെളഗാവി പരിപാടിയും റദ്ദാക്കി
ഹുബ്ബള്ളി പരിപാടിക്ക് പിന്നാലെ ബെളഗാവി ജില്ലയിലെ എക്സാംബയിൽ ശ്രീ ബീരേശ്വര കോ-ഓപ്പറേറ്റീവ് ക്രെഡിറ്റ് സൊസൈറ്റിയുടെ പുതിയ ആസ്ഥാന മന്ദിരം ഉദ്ഘാടനം ചെയ്യാനും അമിത് ഷാ നിശ്ചയിച്ചിരുന്നു.
More Read
ആരോഗ്യപ്രശ്നത്തെ തുടർന്ന് ഈ പരിപാടിയും റദ്ദാക്കി. നിലവിൽ അമിത് ഷായുടെ ആരോഗ്യനില സംബന്ധിച്ച് കൂടുതൽ ഔദ്യോഗിക വിവരങ്ങൾ പുറത്തുവന്നിട്ടില്ല.
English Summary
Union Home Minister Amit Shah missed scheduled events in Hubballi and Belagavi during his Karnataka visit after experiencing health issues. He stayed at his hotel on doctors’ advice. Union Minister Pralhad Joshi said Shah may have suffered food poisoning and experienced weakness following vomiting, but later said he was fully fine. Shah later briefly visited the Hubballi campus before leaving for Delhi.
