മലപ്പുറം: മന്ത്രവാദ ചികിത്സയുടെ മറവിൽ പ്രായപൂർത്തിയാകാത്ത പെൺകുട്ടിയെ പീഡിപ്പിച്ചെന്ന കേസിൽ വ്യാജ ആത്മീയ ചികിത്സകൻ അറസ്റ്റിൽ. മലപ്പുറം എടവണ്ണ കുണ്ടുതോട് സ്വദേശി ജസൽ ജിലാനി തങ്ങൾ (35) ആണ് എടവണ്ണ പൊലീസിന്റെ പിടിയിലായത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
വയറുവേദന മാറ്റാമെന്ന് വിശ്വസിപ്പിച്ചെന്ന് പരാതി
2026 ഏപ്രിലിലാണ് കേസിനാസ്പദമായ സംഭവം നടന്നതെന്ന് പൊലീസ് അറിയിച്ചു. ‘ജിലാനി തങ്ങൾ’ എന്ന പേരിൽ ആത്മീയ ചികിത്സ നടത്തിയിരുന്ന പ്രതി, വയറുവേദന മാറ്റിത്തരാമെന്ന് വിശ്വസിപ്പിച്ച് 17 വയസ്സുകാരിയായ പെൺകുട്ടിയെയും അമ്മയെയും കുണ്ടുതോടുള്ള സ്വന്തം വീട്ടിലേക്ക് വിളിച്ചുവരുത്തിയെന്നാണ് പരാതി. ഇവിടെവെച്ച് പെൺകുട്ടിയെ ലൈംഗികമായി പീഡിപ്പിച്ചെന്നാണ് ആരോപണം.
അമ്മയുമായി സൗഹൃദം; പിന്നാലെ നാടുവിട്ടു
പിന്നീട് പെൺകുട്ടിയുടെ അമ്മയുമായി പ്രതി സൗഹൃദത്തിലായെന്നും 2026 ഓഗസ്റ്റിൽ ഇവരെയും കൂട്ടി നാടുവിട്ടെന്നുമാണ് പൊലീസ് പറയുന്നത്. ഇരുവരെയും കുറിച്ച് വിവരമില്ലാതായതോടെ അന്വേഷണം ഊർജിതമാക്കി.
More Read
മഞ്ചേശ്വരത്ത് സംയുക്ത നീക്കത്തിലൂടെ അറസ്റ്റ്
കേരള–കർണാടക അതിർത്തിയിലെ ആനക്കല്ല് ഉൾപ്രദേശത്ത് ഒളിവിൽ കഴിയുകയായിരുന്ന പ്രതിയെ കാസർകോട് മഞ്ചേശ്വരത്തുവെച്ചാണ് പിടികൂടിയത്. എടവണ്ണ പൊലീസും നിലമ്പൂർ സ്ക്വാഡും സംയുക്തമായി നടത്തിയ അന്വേഷണത്തിനൊടുവിലായിരുന്നു അറസ്റ്റ്.
മുൻപും കേസുകളുണ്ടെന്ന് പൊലീസ്
More Read
പ്രതിക്ക് മുൻപും ക്രിമിനൽ പശ്ചാത്തലമുണ്ടെന്നും സ്വന്തം ഭാര്യയെ ഉപദ്രവിച്ചതടക്കം നിരവധി കേസുകൾ ഇയാൾക്കെതിരെയുണ്ടെന്നും പൊലീസ് അറിയിച്ചു. നിലമ്പൂർ ഡിവൈഎസ്പി കെ. റഫീഖ്, വണ്ടൂർ സിഐ ഗോപകുമാർ എന്നിവരുടെ മേൽനോട്ടത്തിലായിരുന്നു അന്വേഷണം.
English Summary:
A 35-year-old man, Jasal Jilani Thangal, from Kunduthode in Edavanna, Malappuram, has been arrested in a case involving the alleged sexual abuse of a 17-year-old girl under the guise of spiritual healing. Police said the accused was arrested in Manjeshwar after a joint operation by Edavanna police and the Nilambur squad. He was remanded to judicial custody.
