കോഴിക്കോട് കൊടുവള്ളിയിൽ മോഷണശ്രമം ആരോപിച്ച് 12കാരന് ക്രൂരമർദനം നടത്തിയെന്ന പരാതിയിൽ ചൈൽഡ് വെൽഫെയർ കമ്മിറ്റി (CWC) ഇടപെട്ടു. കുട്ടിയെ വീട്ടിലേക്ക് വിളിച്ചുവരുത്തി മുറിയിൽ പൂട്ടിയിട്ട ശേഷം മർദിച്ചെന്നും വിവിധ തരത്തിൽ ഉപദ്രവിച്ചെന്നുമാണ് പരാതി. സംഭവത്തിൽ അന്വേഷണം നടത്തി നടപടി സ്വീകരിക്കാൻ റൂറൽ എസ്പിക്ക് നിർദേശം നൽകി.
12കാരന് ക്രൂരമർദനം; CWC ഇടപെട്ടു
പിതാവിന്റെ ബന്ധുക്കളാണ് മോഷണശ്രമം ആരോപിച്ച് കുട്ടിയെ ക്രൂരമായി മർദിച്ചതെന്നാണ് പരാതി. വീട്ടിലേക്ക് വിളിച്ചുവരുത്തിയ ശേഷം മുറിയിൽ പൂട്ടിയിട്ടതായി കുട്ടി പറയുന്നു.
തുടർന്ന് കൈകാലുകൾ കൂട്ടിക്കെട്ടി മർദിക്കുകയും മുറിവുകളിൽ മുളകുപൊടി പുരട്ടുകയും കണ്ണിൽ മുളകുവെള്ളം ഒഴിക്കുകയും ചെയ്തതായി പരാതിയിലുണ്ട്.
കുട്ടിയുടെ പരാതിയിൽ ഗുരുതര ആരോപണങ്ങൾ
കാൽനഖത്തിനിടയിൽ ഈർക്കിൽ കയറ്റിയതായും ശരീരത്തിന്റെ വിവിധ ഭാഗങ്ങളിൽ മർദനമേറ്റതായും കുട്ടി പരാതിപ്പെട്ടു.
സംഭവത്തെക്കുറിച്ചുള്ള വിവരങ്ങൾ കഴിഞ്ഞ ദിവസങ്ങളിൽ സമൂഹമാധ്യമങ്ങളിൽ വ്യാപകമായി പ്രചരിച്ചിരുന്നു. അർധരാത്രിയിൽ വീട്ടിൽനിന്ന് രക്ഷപ്പെട്ട കുട്ടിയെ ഒരു വഴിയാത്രക്കാരനാണ് പൊലീസ് സ്റ്റേഷനിൽ എത്തിച്ചത്.
More Read
പൊലീസിനെതിരെയും കുട്ടിയുടെ പരാതി
സംഭവത്തെക്കുറിച്ച് വിവരം അറിയിച്ചിട്ടും പൊലീസ് തുടർനടപടി സ്വീകരിച്ചില്ലെന്നും കുട്ടി ആരോപിച്ചു.
അതേസമയം, മോഷണം പോയതായി വീട്ടുകാർ പറഞ്ഞ വസ്തു പിന്നീട് കണ്ടെത്തിയതായും വിവരം പുറത്തുവന്നു.
റൂറൽ എസ്പിക്ക് അന്വേഷണ നിർദേശം
സംഭവം കോഴിക്കോട് ചൈൽഡ് പ്രൊട്ടക്ഷൻ ഓഫിസറുടെ ശ്രദ്ധയിൽപ്പെട്ടതോടെയാണ് CWC ഇടപെട്ടത്. തുടർന്ന് നടത്തിയ അന്വേഷണത്തിന്റെ അടിസ്ഥാനത്തിൽ നടപടി സ്വീകരിക്കാൻ റൂറൽ എസ്പിക്ക് നിർദേശം നൽകി.
More Read
കൂടാതെ, കുട്ടിക്കും കുടുംബത്തിനും കൗൺസലിങ് നൽകിയ ശേഷം കുട്ടിയെ താൽക്കാലിക സംരക്ഷണ കേന്ദ്രത്തിലേക്ക് മാറ്റി.
