തിരുവനന്തപുരം: അവതാരകനും നടനുമായ ജീവ ജോസഫ് അപർണയുമായുള്ള വിവാഹബന്ധം അവസാനിപ്പിച്ചതായി അറിയിച്ചു. കഴിഞ്ഞ ദിവസങ്ങളായി ഇരുവരും വേർപിരിഞ്ഞെന്ന തരത്തിൽ പ്രചരിച്ചിരുന്ന അഭ്യൂഹങ്ങൾക്കിടെയാണ് ജീവ തന്നെ ഇൻസ്റ്റഗ്രാമിലൂടെ ഇക്കാര്യം സ്ഥിരീകരിച്ചത്. 11 വർഷത്തെ ദാമ്പത്യജീവിതത്തിന് ശേഷമാണ് ഇരുവരും വേർപിരിയാൻ തീരുമാനിച്ചതെന്ന് താരം വ്യക്തമാക്കി.
ജീവ ജോസഫും അപർണയും വേർപിരിഞ്ഞു
വിവാഹ വാർഷിക ദിനത്തിലാണ് വേർപിരിയൽ സംബന്ധിച്ച വിവരം ജീവ ആരാധകരുമായി പങ്കുവച്ചത്.
11 വർഷം നീണ്ട ദാമ്പത്യജീവിതത്തിന് വിരാമമിടുകയാണെന്ന് വ്യക്തമാക്കിയ താരം, തീരുമാനം എളുപ്പമുള്ളതായിരുന്നില്ലെന്നും കുറിപ്പിൽ പറഞ്ഞു.
‘ഇനി ഞങ്ങൾ അല്ല; ജീവയും അപർണയും മാത്രം’
തങ്ങളിരുവരെയും മികച്ച ജോഡിയായി സ്നേഹിച്ച ആരാധകർ ഏറെയുണ്ടായിരുന്നുവെന്ന് ജീവ കുറിച്ചു.
എന്നാൽ ഇനി മുതൽ തങ്ങൾ ദമ്പതികളെന്ന നിലയിൽ മുന്നോട്ട് പോകുന്നില്ലെന്നും ജീവയും അപർണയും രണ്ട് വ്യക്തികളായി വേർപിരിഞ്ഞ വഴികളിലൂടെ സഞ്ചരിക്കുകയാണെന്നും താരം അറിയിച്ചു.
More Read
വേർപിരിയലിന്റെ കാരണം വ്യക്തിപരമെന്ന് താരം
എവിടെയോ തങ്ങൾക്ക് പിഴവ് സംഭവിച്ചെന്നും ഇനി ബന്ധം മുന്നോട്ട് കൊണ്ടുപോകാൻ കഴിയില്ലെന്ന യാഥാർഥ്യം ഇരുവരും തിരിച്ചറിഞ്ഞ് അംഗീകരിച്ചെന്നും ജീവ പറഞ്ഞു.
അതേസമയം, വേർപിരിയാനുള്ള കാരണങ്ങൾ പൂർണമായും വ്യക്തിപരമാണെന്നും താരം വ്യക്തമാക്കി. പക്വതയോടെയാണ് തീരുമാനമെടുത്തതെന്നും ആരാധകരും അതേ പക്വതയോടെ തീരുമാനത്തെ കാണണമെന്നും അദ്ദേഹം അഭ്യർത്ഥിച്ചു.
‘ഞങ്ങളുടെ സ്വകാര്യത മാനിക്കണം’
ഈ ഘട്ടത്തിൽ തങ്ങളുടെ സ്വകാര്യത മാനിക്കണമെന്ന് ജീവ ആരാധകരോടും അഭ്യുദയകാംക്ഷികളോടും ആവശ്യപ്പെട്ടു.
ജീവിതത്തിലെ സന്തോഷത്തിലും സങ്കടങ്ങളിലും കരിയറിലുമെല്ലാം ആരാധകർ യാത്രയുടെ ഭാഗമായിരുന്നുവെന്നും അതുകൊണ്ടുതന്നെ ഇക്കാര്യം നേരിട്ട് അറിയിക്കേണ്ടത് തന്റെ ഉത്തരവാദിത്വമാണെന്നും താരം കുറിപ്പിൽ വ്യക്തമാക്കി.
11 വർഷത്തെ ബന്ധത്തിന് ശേഷമുള്ള വേർപിരിയലിനെക്കുറിച്ച് കൂടുതൽ വ്യക്തിപരമായ വിവരങ്ങൾ പങ്കുവയ്ക്കാൻ താരം തയ്യാറായിട്ടില്ല.
