തിരുവനന്തപുരം: RAC യാത്രക്കാർക്കും എ.സി കോച്ചുകളിൽ ബെഡ്ഷീറ്റും കമ്പിളിയും ഉൾപ്പെടുന്ന ബെഡ്റോൾ കിറ്റ് നൽകുന്നത് നിർബന്ധമാക്കി റെയിൽവേ. 2009 മുതൽ ഇതുസംബന്ധിച്ച വ്യവസ്ഥ നിലവിലുണ്ടെങ്കിലും പല ട്രെയിനുകളിലും നടപ്പാക്കുന്നില്ലെന്ന പരാതികൾ ഉയർന്നതോടെയാണ് റെയിൽവേ ബോർഡ് നടപടി കർശനമാക്കിയത്.
RAC യാത്രക്കാർക്ക് ബെഡ്റോൾ കിറ്റ് നിർബന്ധം
എ.സി ടിക്കറ്റ് ബുക്ക് ചെയ്യുമ്പോൾ ബെഡ്റോൾ കിറ്റിനുള്ള തുകയും യാത്രക്കാരിൽ നിന്ന് ഈടാക്കുന്നുണ്ട്. അതിനാൽ കിറ്റിൽ ഉൾപ്പെടുന്ന ബെഡ്ഷീറ്റും കമ്പിളിയും നൽകേണ്ടത് റെയിൽവേയുടെ ഉത്തരവാദിത്വമാണ്.
കിറ്റ് നൽകാതിരുന്നാൽ ബന്ധപ്പെട്ട ജീവനക്കാർ നിയമനടപടി നേരിടേണ്ട സാഹചര്യമുണ്ടാകാം. ഇതുകൂടി പരിഗണിച്ചാണ് റെയിൽവേ ബോർഡ് നിർദേശം കർശനമാക്കിയത്.
എല്ലാ റെയിൽവേ സോണുകൾക്കും നിർദേശം
ഓഗസ്റ്റ് നാലിന് റെയിൽവേ ബോർഡ് രാജ്യത്തെ എല്ലാ റെയിൽവേ സോണുകൾക്കും ഇതുസംബന്ധിച്ച് കർശന നിർദേശം നൽകി. ഇതോടെ എ.സി കോച്ചുകളിലെ RAC യാത്രക്കാർക്ക് ബെഡ്റോൾ കിറ്റ് നൽകുന്ന വ്യവസ്ഥ കൃത്യമായി പാലിക്കേണ്ടിവരും.
അതേസമയം, 2009 മുതൽ തന്നെ ഈ സൗകര്യം നൽകുന്നതിനുള്ള വ്യവസ്ഥ നിലവിലുണ്ടായിരുന്നുവെന്നാണ് റിപ്പോർട്ട്. എന്നാൽ പല ട്രെയിനുകളിലും ഇത് കൃത്യമായി നടപ്പാക്കിയിരുന്നില്ല.
More Read
RAC ടിക്കറ്റിൽ ബെർത്ത് ലഭിക്കുമോ?
കൺഫേം ടിക്കറ്റ് ലഭിക്കാത്ത യാത്രക്കാർക്ക് RAC ടിക്കറ്റ് ലഭിച്ചാൽ എ.സി കോച്ചിൽ യാത്ര ചെയ്യാൻ സാധിക്കും. എന്നാൽ തുടക്കത്തിൽ പ്രത്യേക ബെർത്ത് ലഭിക്കില്ല; അനുവദിച്ച സീറ്റിലാണ് യാത്ര ചെയ്യേണ്ടത്.
തുടർന്ന് കോച്ചിൽ ഏതെങ്കിലും ബെർത്ത് ഒഴിയുന്ന മുറയ്ക്ക് ടി.ടി.ആർ അത് RAC ടിക്കറ്റുള്ള യാത്രക്കാർക്ക് അനുവദിക്കുകയാണ് പതിവ്. ഇങ്ങനെ ബെർത്ത് ലഭിച്ചാലും യാത്രക്കാർക്ക് എ.സി കോച്ചിലെ ബെഡ്റോൾ കിറ്റിന് അർഹതയുണ്ടാകും.
