വിഴിഞ്ഞം: സംസ്ഥാനത്ത് ട്രോളിംഗ് നിരോധനം നിലവിൽ വന്നതോടെ ചാകരക്കാലത്തെ വരവേൽക്കാൻ വലിയ പ്രതീക്ഷയോടെയാണ് വിഴിഞ്ഞത്തെ മത്സ്യത്തൊഴിലാളികൾ ഒരുങ്ങുന്നത്. സീസണിനെ മുന്നിൽ കണ്ടു മത്സ്യബന്ധന തുറമുഖവും അനുബന്ധ സംവിധാനങ്ങളും ഒരുക്കങ്ങൾ പൂർത്തിയാക്കി.
തീരത്തെ പൊലീസ് എയ്ഡ് പോസ്റ്റുകൾ പുനഃക്രമീകരിച്ച് ഡ്യൂട്ടിക്കായി പൊലീസുകാരെ നിയോഗിച്ചു. വൈദ്യുതി വിളക്കുകളുടെ അറ്റകുറ്റപ്പണികളും പൂർത്തിയാക്കി. തമിഴ്നാട്ടിൽ നിന്നുൾപ്പെടെ നിരവധി മത്സ്യത്തൊഴിലാളികൾ ദിവസേന വിഴിഞ്ഞത്തെത്തുന്നുണ്ട്. സീസണിനോടനുബന്ധിച്ച് വിഴിഞ്ഞം ഫിഷറീസ് സ്റ്റേഷനിൽ 24 മണിക്കൂറും പ്രവർത്തിക്കുന്ന കൺട്രോൾ റൂം ആരംഭിച്ചിട്ടുണ്ടെന്നും താത്കാലിക ലൈഫ് ഗാർഡുമാരെ നിയമിച്ചിട്ടുണ്ടെന്നും അധികൃതർ അറിയിച്ചു. മത്സ്യബന്ധന തീരത്ത് വള്ളങ്ങൾ നിറഞ്ഞുകഴിഞ്ഞു.
കൊഞ്ചിലൂടെ സീസണിന് തുടക്കം
സാധാരണയായി കൊഞ്ചിന്റെ ലഭ്യതയോടെയാണ് ചാകരക്കാലം ആരംഭിക്കുന്നത്. നിലവിൽ ചെറിയ തോതിൽ മത്തിയാണ് ലഭിക്കുന്നത്. ഉൾക്കടലിൽ ശക്തമായ കാറ്റ് തുടരുന്നതിനാൽ കുറച്ച് തൊഴിലാളികൾ മാത്രമാണ് കടലിൽ പോകുന്നത്. അടുത്തിടെ ലഭിച്ച മഴയെ തുടർന്ന് കടൽ തണുത്തതോടെ ആഴക്കടലിലെ മത്സ്യങ്ങൾ ഉപരിതലത്തിലേക്ക് എത്തുമെന്ന പ്രതീക്ഷയിലാണ് തൊഴിലാളികൾ.
കൊഞ്ചിന് പിന്നാലെ കണവയും വിവിധ ചെറുമത്സ്യങ്ങളും ലഭിച്ചുതുടങ്ങും. വാള മത്സ്യം ലഭിക്കുന്നതോടെയാണ് സാധാരണയായി സീസൺ അവസാനിക്കുന്നത്. കഴിഞ്ഞ വർഷം മികച്ച മത്സ്യലഭ്യത ഉണ്ടായിരുന്നതിനാൽ ഇത്തവണയും സമാന സാഹചര്യം ഉണ്ടാകുമെന്ന പ്രതീക്ഷയിലാണ് മത്സ്യത്തൊഴിലാളികൾ.
നിരവധി കുടുംബങ്ങളുടെ ആശ്രയം
മത്സ്യത്തൊഴിലാളികൾക്ക് പുറമെ ചെറുകിട വ്യാപാരികൾ, ഓട്ടോറിക്ഷ തൊഴിലാളികൾ, ലഘുഭക്ഷണശാല ഉടമകൾ തുടങ്ങി നിരവധി പേരുടെ വാർഷിക വരുമാനത്തിന്റെ പ്രധാന ആശ്രയമാണ് മൂന്നുമാസത്തെ ചാകരക്കാലം. കാലാവസ്ഥ അനുകൂലമായി മികച്ച മഴ ലഭിച്ചാൽ സീസൺ സമൃദ്ധമാകുമെന്നാണ് ഇവരുടെ പ്രതീക്ഷ.
More Read
നവീകരണ പദ്ധതി ഇനിയും യാഥാർഥ്യമായില്ല
വിഴിഞ്ഞം ഫിഷ് ലാൻഡിംഗ് സെന്റർ നവീകരിക്കാൻ 2023-ൽ 25 കോടി രൂപയുടെ പദ്ധതി പ്രഖ്യാപിച്ചിരുന്നുവെങ്കിലും ഇതുവരെ പ്രവർത്തനങ്ങൾ ആരംഭിച്ചിട്ടില്ല. കേരളത്തിലെ മികച്ച മത്സ്യബന്ധന തുറമുഖങ്ങളിലൊന്നാക്കി മാറ്റുക എന്ന ലക്ഷ്യത്തോടെയായിരുന്നു പദ്ധതി പ്രഖ്യാപിച്ചത്.
പദ്ധതിയുടെ ഭാഗമായി പുതിയ ലേലപ്പുര, വല നെയ്യുന്നതിനുള്ള നെറ്റ് വെൻഡിംഗ് ഷെഡ്, 130 മീറ്റർ നീളത്തിലുള്ള ഫിംഗർ ജെട്ടികൾ, കോൾഡ് സ്റ്റോറേജ് സംവിധാനം, മെച്ചപ്പെട്ട ഡ്രെയിനേജ്, പൂന്തോട്ടങ്ങൾ, ശുചിമുറികൾ, സി.സി.ടി.വി ക്യാമറകൾ, ചുറ്റുമതിൽ തുടങ്ങിയ സൗകര്യങ്ങളാണ് നിർദേശിച്ചിരുന്നത്.
പദ്ധതി യാഥാർഥ്യമാകുകയാണെങ്കിൽ വിഴിഞ്ഞം മത്സ്യബന്ധന മേഖലയ്ക്ക് വലിയ ഉണർവ് ലഭിക്കുമെന്നാണ് മത്സ്യത്തൊഴിലാളികളുടെ പ്രതീക്ഷ.
English Summary
With the annual trawling ban in force, fishermen in Vizhinjam are eagerly awaiting the upcoming Chaakara season. Authorities have strengthened safety and support measures, while hopes are high for a rich fishing season that supports not only fishermen but also many small businesses. However, the ₹25-crore modernization project for the Vizhinjam Fish Landing Centre announced in 2023 is yet to take off.
