ദുബായ് എമിറേറ്റ്സ് റോഡിലുണ്ടായ അതിദാരുണമായ മിനി ബസ് അപകടത്തിൽ ജീവൻ നഷ്ടപ്പെട്ടവരുടെ എണ്ണം എട്ടായി ഉയർന്നതായി അധികൃതർ സ്ഥിരീകരിച്ചു.
അന്താരാഷ്ട്ര മാധ്യമങ്ങളിൽ നിന്നും ഒടുവിൽ ലഭ്യമാകുന്ന ഔദ്യോഗിക വിവരങ്ങൾ പ്രകാരം മരിച്ചവരിൽ ആറ് പേർ ഇന്ത്യൻ പൗരന്മാരാണ്. ഇവർക്ക് പുറമെ ഒരു നേപ്പാൾ സ്വദേശിയും ഒരു ശ്രീലങ്കൻ സ്വദേശിയുമാണ് അപകടത്തിൽ മരിച്ച മറ്റ് രണ്ടുപേർ. അന്തരിച്ച ഇന്ത്യക്കാരിൽ മൂന്ന് പേർ ഹൈദരാബാദ് സ്വദേശികളും രണ്ടുപേർ ഉത്തർപ്രദേശ് സ്വദേശികളും ഒരാൾ പഞ്ചാബ് സ്വദേശിയുമാണെന്ന് തിരിച്ചറിഞ്ഞിട്ടുണ്ട്.
ക്രൂരമായ ഈ വാഹനാപകടത്തിൽ ഇരയായവരെല്ലാം ദുബായിലെ പ്രമുഖ സ്ഥാപനമായ ‘മോട്ടീവ് ടെക്നിക്കൽ സർവീസ്’ (Motive Technical Services) കമ്പനിയിലെ ജീവനക്കാരാണെന്ന് നിലവിൽ സ്ഥിരീകരിച്ചിട്ടുണ്ട്. ജോലിക്ക് ശേഷം താമസസ്ഥലത്തേക്ക് മടങ്ങുകയായിരുന്ന ജീവനക്കാരാണ് ബസിലുണ്ടായിരുന്നത്.
എമിറേറ്റ്സ് റോഡിൽ പെട്ടെന്ന് ബ്രേക്ക് ഡൗൺ ആയി കിടന്ന വലിയൊരു ട്രക്കിന് പിന്നിലേക്ക് ഇവർ സഞ്ചരിച്ചിരുന്ന മിനിബസ് അതിവേഗത്തിൽ നിയന്ത്രണം വിട്ട് ഇടിച്ചുകയറിയാണ് ഈ വൻ ദുരന്തമുണ്ടായത്.
അപകടത്തെ തുടർന്ന് ഗുരുതരമായി പരിക്കേറ്റ് നിലവിൽ വിവിധ ആശുപത്രികളിൽ തീവ്രപരിചരണ വിഭാഗത്തിൽ ചികിത്സയിൽ കഴിയുന്ന എട്ട് പേരിൽ രണ്ട് പേർ ഇന്ത്യൻ സ്വദേശികളാണെന്ന് ദുബായ് പോലീസ് അറിയിച്ചു.
More Read
പരിക്കേറ്റവരിൽ അഞ്ച് പേരുടെ ആരോഗ്യനില ഇപ്പോഴും അതീവ ഗുരുതരമായി തന്നെ തുടരുകയാണെന്നാണ് മെഡിക്കൽ സംഘം നൽകുന്ന വിവരം. മൃതദേഹങ്ങൾ നാട്ടിലെത്തിക്കുന്നതിനും പരിക്കേറ്റവർക്ക് മികച്ച ചികിത്സ ഉറപ്പാക്കുന്നതിനുമുള്ള നടപടികൾ പുരോഗമിക്കുകയാണ്.
English Summary
The death toll from the Dubai Emirates Road minibus crash has risen to eight, including six Indians, one Nepali, and one Sri Lankan. The victims worked for Motive Technical Services. The minibus rammed into a stationary truck, leaving eight others injured, five of whom remain in critical condition.
