ദുബായ്: എബോള വൈറസ് വ്യാപനവുമായി ബന്ധപ്പെട്ട ആഗോള ആരോഗ്യ ആശങ്കകൾക്കിടെ യാത്രക്കാർക്ക് അടിയന്തര മുന്നറിയിപ്പുമായി പ്രമുഖ വിമാനക്കമ്പനികളായ എമിറേറ്റ്സും ഫ്ലൈദുബായും. വിവിധ രാജ്യങ്ങൾ പുതിയ യാത്രാ നിയന്ത്രണങ്ങളും ആരോഗ്യ പരിശോധനകളും നടപ്പിലാക്കുന്ന സാഹചര്യത്തിൽ യാത്രയ്ക്ക് മുമ്പ് ലക്ഷ്യസ്ഥാനങ്ങളിലെ ഏറ്റവും പുതിയ നിയമങ്ങൾ പരിശോധിക്കണമെന്ന് കമ്പനികൾ നിർദേശിച്ചു.
എമിറേറ്റ്സ് പുറത്തിറക്കിയ അറിയിപ്പനുസരിച്ച്, ജൂൺ 6 മുതൽ യുഎഇയിൽ പുതിയ പ്രവേശന നിയന്ത്രണങ്ങൾ പ്രാബല്യത്തിൽ വന്നു. ഡെമോക്രാറ്റിക് റിപ്പബ്ലിക് ഓഫ് കോംഗോ, ഉഗാണ്ട, ദക്ഷിണ സുഡാൻ എന്നീ രാജ്യങ്ങൾ സമീപകാലത്ത് സന്ദർശിച്ച യാത്രക്കാർക്ക് യുഎഇയിലേക്ക് നേരിട്ട് പ്രവേശനം അനുവദിക്കില്ല.
ഈ രാജ്യങ്ങളിൽ നിന്ന് എത്തുന്നവർ യുഎഇയിൽ പ്രവേശിക്കുന്നതിന് മുമ്പ് കുറഞ്ഞത് 21 ദിവസം മറ്റൊരു രാജ്യത്ത് താമസിച്ചിരിക്കണമെന്ന നിബന്ധനയും ഏർപ്പെടുത്തിയിട്ടുണ്ട്. മറ്റ് രാജ്യങ്ങൾ വഴിയുള്ള കണക്റ്റിങ് ഫ്ലൈറ്റുകളിലൂടെയോ ട്രാൻസിറ്റ് യാത്രകളിലൂടെയോ എത്തുന്നവർക്കും ഈ നിയന്ത്രണം ബാധകമായിരിക്കും.
യുഎഇ വഴി മറ്റ് രാജ്യങ്ങളിലേക്ക് യാത്ര ചെയ്യുന്നവർ ലക്ഷ്യസ്ഥാന രാജ്യങ്ങളുടെ പ്രവേശന മാനദണ്ഡങ്ങൾ പാലിക്കണമെന്നും എമിറേറ്റ്സ് വ്യക്തമാക്കി.
അതേസമയം, വിവിധ രാജ്യങ്ങൾ എബോള മുൻകരുതലിന്റെ ഭാഗമായി യാത്രാ നിബന്ധനകൾ പുതുക്കിക്കൊണ്ടിരിക്കുന്നതിനാൽ യാത്രക്കാർ യാത്രയ്ക്ക് മുമ്പ് ഔദ്യോഗിക നിർദേശങ്ങൾ പരിശോധിക്കണമെന്ന് ഫ്ലൈദുബായും മുന്നറിയിപ്പ് നൽകി. പൊതുജനാരോഗ്യ ഏജൻസികളും സർക്കാരുകളും പുറപ്പെടുവിക്കുന്ന നിർദേശങ്ങൾ കർശനമായി പാലിക്കണമെന്നും കമ്പനി ആവശ്യപ്പെട്ടു.
More Read
ആഗോള ആരോഗ്യ സാഹചര്യം മാറിക്കൊണ്ടിരിക്കുന്ന സാഹചര്യത്തിൽ, അവസാന നിമിഷം ഉണ്ടാകാവുന്ന നിയന്ത്രണങ്ങളും പ്രവേശന വ്യവസ്ഥകളും മുൻകൂട്ടി പരിശോധിച്ച ശേഷമേ യാത്രാ പദ്ധതികൾ തയ്യാറാക്കാവൂ എന്ന് വിമാനക്കമ്പനികൾ ഓർമ്മിപ്പിച്ചു.
English Summary:
Emirates and flydubai have issued travel advisories amid growing concerns over Ebola outbreaks. The UAE has introduced new entry restrictions for travelers who recently visited the Democratic Republic of Congo, Uganda, and South Sudan. Affected travelers must stay in another country for at least 21 days before entering the UAE. Airlines have urged passengers to check the latest travel and health regulations before departure.
