വാഷിങ്ടൺ: അമേരിക്കയിലെ വാഷിങ്ടണിൽ H5N1 പക്ഷിപ്പനി ബാധിച്ച് ഒരാൾ മരിച്ചു. രോഗബാധിത പശുക്കളുമായി സമ്പർക്കം പുലർത്തിയ വ്യക്തി ഗുരുതരാവസ്ഥയിൽ ചികിത്സയിലിരിക്കെ നവംബർ ഒന്നിനാണ് മരിച്ചത്.
ഇദ്ദേഹത്തിന് മറ്റ്ആരോഗ്യപ്രശ്നങ്ങളുമുണ്ടായിരുന്നുവെന്ന് ആരോഗ്യ അധികൃതർ അറിയിച്ചു. മരിച്ച വ്യക്തിയുടെ വിവരങ്ങൾ പുറത്തുവിട്ടിട്ടില്ല.
യാക്കിമ കൗണ്ടിയിൽ രോഗവ്യാപനം
യാക്കിമ കൗണ്ടിയിൽ ഒക്ടോബർ പകുതിക്കുശേഷം മൂന്നുപേർക്കാണ് പക്ഷിപ്പനി സ്ഥിരീകരിച്ചത്. ഇതിൽ ഒരാൾക്ക് നേരിയ രോഗലക്ഷണങ്ങൾ മാത്രമാണുള്ളത്.
ഇയാളെ ആശുപത്രിയിൽ പ്രവേശിപ്പിച്ചിട്ടില്ല. മൂന്നാമത്തെ കേസുമായി ബന്ധപ്പെട്ട വിവരങ്ങളും അധികൃതർ പരിശോധിച്ചുവരികയാണ്.
നേരിട്ടുള്ള സമ്പർക്കം രോഗകാരണം
രോഗബാധിതരായ പശുക്കളുമായും പക്ഷികളുമായും നേരിട്ട് സമ്പർക്കം പുലർത്തുന്നവർക്കാണ് പ്രധാനമായും വൈറസ് ബാധിക്കുന്നത്. എന്നാൽ മനുഷ്യരിൽനിന്ന് മനുഷ്യരിലേക്ക് H5N1 വൈറസ് പകരുന്നതായി ഇതുവരെ കണ്ടെത്തിയിട്ടില്ല.
More Read
പൊതുജനങ്ങൾക്ക് രോഗം ബാധിക്കാനുള്ള സാധ്യത വളരെ കുറവാണെന്നാണ് ആരോഗ്യവകുപ്പിന്റെ വിലയിരുത്തൽ.
2024ന് ശേഷം മൂന്നാം മരണം
2024 ഫെബ്രുവരിയിൽ പശുക്കളിൽ ആദ്യമായി H5N1 വൈറസ് കണ്ടെത്തിയതിനുശേഷം 70ലധികം പേർക്ക് രോഗം സ്ഥിരീകരിച്ചിട്ടുണ്ട്. 2024നുശേഷം പക്ഷിപ്പനി ബാധിച്ച് റിപ്പോർട്ട് ചെയ്യുന്ന മൂന്നാമത്തെ മരണമാണിത്
33 ഡയറി ഫാമുകളിൽ വൈറസ് വ്യാപനം
ഒക്ടോബർ എട്ടുമുതൽ വാഷിങ്ടണിലെ 33 ഡെയറി ഫാമുകളിലെ പശുക്കളിൽ വൈറസ് കണ്ടെത്തിയിട്ടുണ്ട്. ഇതോടെ ഫാമുകളിലെ തൊഴിലാളികൾക്ക് ആരോഗ്യ അധികൃതർ ജാഗ്രതാനിർദേശം നൽകി.
More Read
സുരക്ഷാ ഉപകരണങ്ങൾ ഉപയോഗിക്കണമെന്നും രോഗലക്ഷണങ്ങൾ കണ്ടാൽ ഉടൻ ആരോഗ്യവകുപ്പിനെ അറിയിക്കണമെന്നും നിർദേശിച്ചിട്ടുണ്ട്.മരിച്ച വ്യക്തിയുമായി സമ്പർക്കം പുലർത്തിയവരെയും ആരോഗ്യവകുപ്പ് നിരീക്ഷിച്ചുവരികയാണ്.
രോഗവ്യാപനം തടയുന്നതിനുള്ള നടപടികളുടെ ഭാഗമായി ഫാം തൊഴിലാളികളുടെ ആരോഗ്യസ്ഥിതിയും അധികൃതർ വിലയിരുത്തുന്നുണ്ട്.
English Summary : A person in Washington has died after contracting H5N1 bird flu following exposure to infected cattle. Three cases have been reported in Yakima County since mid-October, while the virus has been detected in cattle at 33 dairy farms since October 8. Health officials say the risk to the general public remains low, with no evidence of human-to-human transmission.
