ശബരിമല ഡിജിറ്റലൈസേഷൻ കരാർ: 70 കോടിയുടെ ഇടപാടിൽ വീഴ്ചയെന്ന് അന്വേഷണ റിപ്പോർട്ട്

തിരുവനന്തപുരം: ശബരിമല ഉൾപ്പെടെ തിരുവിതാംകൂർ ദേവസ്വം ബോർഡിന് കീഴിലുള്ള ക്ഷേത്രങ്ങളുടെ ഡിജിറ്റലൈസേഷനായി 70 കോടി രൂപയുടെ കരാർ നൽകിയതിൽ ഗുരുതര വീഴ്ചയുണ്ടായതായി ഐ.ടി സെക്രട്ടറിയുടെ അന്വേഷണത്തിൽ കണ്ടെത്തൽ.

 കിറ്റ്ഫ്രയുടെ മുൻ മാനേജിങ് ഡയറക്ടറുടെ നേതൃത്വത്തിലുള്ള സംഘം ഡയറക്ടർ ബോർഡിന്റെ അറിവില്ലാതെ കരാർ നേടിയെന്നാണ് റിപ്പോർട്ടിലുള്ളത്.

സംഭവത്തിൽ ആശങ്ക അറിയിച്ച് ദേവസ്വം മന്ത്രി തിരുവിതാംകൂർ ദേവസ്വം ബോർഡിന് കത്തയച്ചു. കരാർ അടിയന്തരമായി പുനഃപരിശോധിക്കണമെന്നാണ് മന്ത്രിയുടെ നിർദേശം.

ക്ഷേത്രങ്ങളിലെ ഇടപാടുകൾ ഡിജിറ്റലാക്കാൻ പദ്ധതി

ശബരിമല ഉൾപ്പെടെയുള്ള ക്ഷേത്രങ്ങളിലെ രസീത് സംവിധാനം ഒഴിവാക്കി ഇടപാടുകൾ പൂർണമായും ഡിജിറ്റലാക്കാനായിരുന്നു ദേവസ്വം ബോർഡിന്റെ ലക്ഷ്യം. സാമ്പത്തിക ക്രമക്കേടുകളും ഇതുമായി ബന്ധപ്പെട്ട പരാതികളും കുറയ്ക്കാൻ ഡിജിറ്റലൈസേഷൻ സഹായിക്കുമെന്നായിരുന്നു വിലയിരുത്തൽ.

എന്നാൽ, 70 കോടി രൂപയുടെ പദ്ധതിക്ക് കരാർ നൽകിയതിൽ നടപടിക്രമങ്ങൾ പാലിച്ചോയെന്ന സംശയമാണ് ഇപ്പോൾ ഉയർന്നിരിക്കുന്നത്.

കിറ്റ്ഫ്രയുടെ ഔദ്യോഗിക ഭരണസമിതിയുടെ അറിവില്ലാതെയെന്ന് റിപ്പോർട്ട്

കിറ്റ്ഫ്രയുടെ ഡയറക്ടർ ബോർഡിനെ അറിയിക്കാതെ മുൻ എം.ഡി ഉൾപ്പെടെയുള്ള ഉദ്യോഗസ്ഥർ ടെൻഡർ നടപടികളിൽ പങ്കെടുത്തെന്നാണ് ഐ.ടി സെക്രട്ടറിയുടെ അന്വേഷണത്തിൽ കണ്ടെത്തിയതെന്നാണ് റിപ്പോർട്ട്. കരാർ ലഭിച്ചതിനു പിന്നാലെ മുൻ എം.ഡിയും ജനറൽ മാനേജരും ഉൾപ്പെടെയുള്ളവർ സ്ഥാപനത്തിൽനിന്ന് രാജിവെച്ചതായും വിവരമുണ്ട്.

ഡിജിറ്റലൈസേഷൻ ജോലികൾ ആരംഭിച്ചതിനു പിന്നാലെയാണ് പദ്ധതിയുടെ നടപടിക്രമങ്ങളെക്കുറിച്ച് പരാതികൾ ഉയർന്നത്. പദ്ധതിക്ക് സർക്കാരിന്റെ അനുമതിയുണ്ടോയെന്ന കാര്യത്തിലും പരിശോധന നടന്നു.

കരാർ നേടിയത് കിറ്റ്ഫ്രയുടെ ഔദ്യോഗിക ഭരണസമിതിയുടെ അറിവോടെയല്ലെന്നും തട്ടിക്കൂട്ടിയ പ്രോജക്ട് മാനേജ്‌മെന്റ് യൂണിറ്റാണ് ഇതിന് പിന്നിലെന്നുമാണ് അന്വേഷണത്തിലെ കണ്ടെത്തലെന്നാണ് റിപ്പോർട്ട്. ഗുരുതര വീഴ്ചകൾ ചൂണ്ടിക്കാട്ടി ദേവസ്വം സെക്രട്ടറി മന്ത്രിക്ക് റിപ്പോർട്ട് നൽകിയതായും വിവരമുണ്ട്.

സർക്കാർ അനുമതിയും വിവരച്ചോർച്ചാ സാധ്യതയും ആശങ്കയിൽ

ശബരിമല ഡിജിറ്റലൈസേഷനായി ദേവസ്വം ബോർഡ് സർക്കാരിന്റെ അനുമതി തേടിയിട്ടില്ലെന്നും അനുമതി ലഭിച്ചിട്ടില്ലെന്നുമാണ് റിപ്പോർട്ടിലുള്ളത്. പദ്ധതിയുമായി ബന്ധപ്പെട്ട് ഗൗരവമായ വിവരച്ചോർച്ചയ്ക്കുള്ള സാധ്യതയുണ്ടെന്ന ആശങ്കയും ഉയർന്നിട്ടുണ്ട്.

അംഗീകൃത ഏജൻസിയെ ചുമതലപ്പെടുത്തി പദ്ധതി നടപ്പാക്കണമെന്നും നടപടികളിൽ വീഴ്ച കണ്ടെത്തിയാൽ നിലവിലെ കരാർ പുനഃപരിശോധിക്കണമെന്നും ആവശ്യപ്പെട്ടാണ് ദേവസ്വം മന്ത്രി ബോർഡിന് കത്തയച്ചത്.

പരിശോധനകൾ നടത്തിയ ശേഷമാണ് കരാറെന്ന് ദേവസ്വം ബോർഡ്

അതേസമയം, വിവിധ ഘട്ടങ്ങളിൽ പരിശോധനകൾ നടത്തിയ ശേഷമാണ് കരാർ ഉറപ്പിച്ചതെന്നാണ് തിരുവിതാംകൂർ ദേവസ്വം ബോർഡ് ഭരണസമിതിയുടെ വിശദീകരണം.

ആശങ്കകൾ പരിഹരിച്ച് കോടതിയുടെയും സർക്കാരിന്റെയും ആവശ്യമായ അനുമതികൾ ഉറപ്പാക്കിയ ശേഷമേ ഡിജിറ്റലൈസേഷൻ പൂർത്തിയാക്കൂവെന്നും ഭരണസമിതി വ്യക്തമാക്കിയിട്ടുണ്ട്.

English Summary: An IT Secretary’s inquiry reportedly found procedural lapses in awarding a ₹70-crore digitalisation contract for temples under the Travancore Devaswom Board, including Sabarimala. The Devaswom Minister has asked the Board to review the contract, while the Board says it conducted checks and will ensure required approvals.