വീടുമാറിയുള്ള പരിശോധനയിൽ പരിഭ്രാന്തി; ദമ്പതികളോട് എക്സൈസ് മാപ്പുപറഞ്ഞെന്ന് സൂചന

കൊച്ചി: വാറന്റ് പ്രതിയെ പിടികൂടാനെത്തിയ എക്സൈസ് സംഘം വീടുമാറി പരിശോധന നടത്തിയെന്ന പരാതിയിൽ ഫോർട്ട് കൊച്ചിയിൽ അന്വേഷണം തുടങ്ങി.

 പുലർച്ചെ വീട്ടിലെത്തിയ സംഘം തിരിച്ചറിയൽ രേഖകൾ കാണിക്കാതെ ഭീഷണിപ്പെടുത്തിയെന്ന് ആരോപിച്ച് ഭയന്ന വീട്ടമ്മ കുഴഞ്ഞുവീണു. 

പിന്നീട് ആശുപത്രിയിൽ ചികിത്സ തേടി. വെള്ളിയാഴ്ച പുലർച്ചെ നാലോടെ അധികാരി വളപ്പിന് സമീപം ഫെർണാണ്ടസ് ഗാർഡനിലായിരുന്നു സംഭവം.

വാറന്റ് പ്രതിയെ തേടിയെത്തിയത് മറ്റൊരു വീട്ടിൽ

ഇടുക്കി കട്ടപ്പനയിൽനിന്നാണ് വാറന്റ് പ്രതിയെ പിടികൂടാനായി എക്സൈസ് സംഘം ഫോർട്ട് കൊച്ചിയിലെത്തിയത്.

 യഥാർഥ പ്രതിയുടെ വീട്ടിൽ ആദ്യം എത്തിയെങ്കിലും സമീപത്തെ ദമ്പതികളുടെ വീടാണ് പ്രതിയുടേതെന്ന് ചിലർ ചൂണ്ടിക്കാട്ടിയതിനെ തുടർന്ന് സംഘം അവിടേക്ക് പോവുകയായിരുന്നു.

മലപ്പുറം എടപ്പാൾ സ്വദേശികളായ ദമ്പതികൾ വാടകയ്ക്ക് താമസിക്കുന്ന വീട്ടിലാണ് സംഘം കയറിയതെന്നാണ് പരാതി. ഇതിനിടെ യഥാർഥ പ്രതി സ്ഥലത്തുനിന്ന് കടന്നുകളഞ്ഞതായും റിപ്പോർട്ടുണ്ട്.

തിരിച്ചറിയൽ രേഖ കാണിച്ചില്ലെന്ന് പരാതി

ജനാലയിലൂടെ വീട്ടിനുള്ളിലേക്ക് ടോർച്ചടിച്ച് വാതിൽ തുറക്കാൻ എക്സൈസ് സംഘം ആവശ്യപ്പെട്ടെന്നും തുറന്നില്ലെങ്കിൽ വാതിൽ പൊളിച്ച് അകത്തുകയറുമെന്ന് ഭീഷണിപ്പെടുത്തിയെന്നും യുവതി ആരോപിച്ചു. സംഘം തിരിച്ചറിയൽ കാർഡ് പോലും കാണിക്കാൻ തയ്യാറായില്ലെന്നും പരാതിയിൽ പറയുന്നു.

ഫോർട്ട് കൊച്ചിയിലെ ഹോട്ടലിൽ ജോലി ചെയ്യുന്ന ഭർത്താവിന് രാത്രി ഡ്യൂട്ടിയായിരുന്നതിനാൽ യുവതി മാത്രമായിരുന്നു വീട്ടിലുണ്ടായിരുന്നത്. അപ്രതീക്ഷിതമായി എത്തിയ സംഘത്തെ കള്ളന്മാരാണെന്ന് കരുതി ഭയന്ന യുവതി ഭർത്താവിനെ ഫോണിൽ വിളിച്ചുവരുത്തി.

ഭർത്താവിന്റെ പരാതിയിൽ പൊലീസ് അന്വേഷണം

സംഭവം അറിഞ്ഞ് സമീപവാസികൾ വീട്ടിലെത്തിയതോടെ എക്സൈസ് സംഘം അവിടെനിന്ന് മടങ്ങിയെന്നാണ് റിപ്പോർട്ട്. പിന്നീട് യുവതി ആശുപത്രിയിൽ ചികിത്സ തേടി.

ഭർത്താവ് ഫോർട്ട് കൊച്ചി പൊലീസ് സ്റ്റേഷനിൽ നൽകിയ പരാതിയുടെ അടിസ്ഥാനത്തിൽ അന്വേഷണം ആരംഭിച്ചിട്ടുണ്ട്. അതേസമയം, വീടുമാറി എത്തിയ സംഭവത്തിൽ എക്സൈസ് സംഘം ദമ്പതികളെ നേരിൽക്കണ്ട് മാപ്പുപറഞ്ഞതായി സൂചനയുണ്ട്.

English Summary:

An Excise team searching for a warrant accused allegedly entered the wrong house in Fort Kochi around 4 am on Friday. A woman staying alone became frightened, believing the visitors were thieves, and reportedly fainted. She later sought hospital treatment. Her husband has filed a complaint at the Fort Kochi police station, and an investigation is underway. Reports also suggest that the Excise team later apologised to the couple.