ലണ്ടൻ: ഫുട്ബോൾ ചരിത്രത്തിലെ ഏറ്റവും വിലപിടിപ്പുള്ള സ്മരണികകളിലൊന്നായ ബ്രസീൽ ഇതിഹാസം പെലെയുടെ 1958 ലോകകപ്പ് സ്വർണമെഡൽ ഈ മാസം അവസാനം ലണ്ടനിൽ ലേലത്തിന് എത്തും. വെറും 17-ാം വയസിൽ ബ്രസീലിന്റെ ആദ്യ ലോകകപ്പ് വിജയത്തിന്റെ ഭാഗമായിരുന്ന പെലെ അണിഞ്ഞിരുന്ന മെഡലിന് ഏകദേശം ആറുകോടി രൂപ വരെ ലഭിക്കുമെന്നാണ് വിലയിരുത്തൽ.
കായിക സ്മരണികകളുടെ പ്രമുഖ ലേല സ്ഥാപനമായ ബഡ്സ് സംഘടിപ്പിക്കുന്ന ലേലത്തിൽ ലോകകപ്പുമായി ബന്ധപ്പെട്ട 450 അപൂർവ വസ്തുക്കളാണ് ഉൾപ്പെടുത്തിയിരിക്കുന്നത്. ഇതിൽ ഏറ്റവും ശ്രദ്ധേയമായ ആകർഷണങ്ങളിലൊന്നാണ് പെലെയുടെ സ്വർണമെഡൽ.
1970 ലോകകപ്പിൽ പെലെ നടത്തിയ പ്രശസ്ത ഹെഡർ രക്ഷപ്പെടുത്തിയ ഇംഗ്ലണ്ട് ഗോൾകീപ്പർ ഗോർഡൻ ബാങ്ക്സ് അന്ന് ധരിച്ചിരുന്ന ജേഴ്സിയും ലേലത്തിൽ ഉൾപ്പെടുന്നുണ്ട്. ലോകകപ്പ് ചരിത്രത്തിലെ ഏറ്റവും മികച്ച സേവുകളിലൊന്നായി കണക്കാക്കപ്പെടുന്ന ആ മുഹൂർത്തവുമായി ബന്ധപ്പെട്ട ഈ ജേഴ്സിക്കും വലിയ വില ലഭിക്കുമെന്നാണ് പ്രതീക്ഷ.
അതേസമയം, പെലെ 1958 ലോകകപ്പിനിടെ ധരിച്ചിരുന്ന ജേഴ്സിയും ഈ മാസം ന്യൂയോർക്കിൽ നടക്കുന്ന സോത്ത്ബീസ് ലേലത്തിൽ അവതരിപ്പിക്കും. ഈ ജേഴ്സിക്ക് 50 കോടിയിലധികം രൂപ ലഭിക്കുമെന്നാണ് വിദഗ്ധരുടെ വിലയിരുത്തൽ.
ലോക ഫുട്ബോളിലെ ഏറ്റവും മഹത്തായ താരങ്ങളിൽ ഒരാളായ പെലെയുമായി ബന്ധപ്പെട്ട സ്മരണികകൾക്ക് ആഗോള തലത്തിൽ വലിയ ആവശ്യമുള്ള സാഹചര്യത്തിലാണ് അപൂർവ വസ്തുക്കൾ വീണ്ടും ലേലവേദിയിലെത്തുന്നത്.
English Summary
Pele’s 1958 FIFA World Cup gold medal, won when he was just 17 years old, is set to be auctioned in London later this month and is expected to fetch around ₹6 crore. The auction will also feature Gordon Banks’ famous 1970 World Cup jersey and another jersey worn by Pele during the 1958 tournament, which could fetch more than ₹50 crore.
