പാലക്കാട്: പാലക്കാട് റെയിൽവേ ഡിവിഷൻ വിഭജനം കേരളത്തിന്റെ റെയിൽവേ വരുമാനത്തെയും ഭാവി വികസനത്തെയും ബാധിക്കുമെന്ന് വിലയിരുത്തൽ. പനമ്പൂർ, ഉള്ളാൾ, മംഗളൂരു ജംഗ്ഷൻ, മംഗളൂരു സെൻട്രൽ സ്റ്റേഷനുകൾ ഒക്ടോബർ ഒന്നുമുതൽ പാലക്കാട് ഡിവിഷനിൽ നിന്ന് മാറ്റുന്നതോടെ കർണാടകയിലെ മൈസൂരു ഡിവിഷന് നേട്ടമുണ്ടാകുമെന്നും ചൂണ്ടിക്കാട്ടുന്നു.
പാലക്കാട് റെയിൽവേ ഡിവിഷൻ വിഭജനം; നാല് സ്റ്റേഷനുകൾ മാറും
പനമ്പൂർ, ഉള്ളാൾ, മംഗളൂരു ജംഗ്ഷൻ, മംഗളൂരു സെൻട്രൽ എന്നീ സ്റ്റേഷനുകളാണ് മൈസൂരു റെയിൽവേ ഡിവിഷനിൽ ഉൾപ്പെടുത്തുന്നത്. ഇതോടെ മൈസൂരു ഡിവിഷന്റെ വാർഷിക വരുമാനത്തിൽ 500 മുതൽ 600 കോടി രൂപ വരെ വർധനയുണ്ടാകുമെന്നാണ് വിലയിരുത്തൽ.
അതേസമയം, ഏറ്റവും കൂടുതൽ ചരക്കുനീക്കം നടക്കുന്ന പനമ്പൂർ നഷ്ടമാകുന്നതോടെ പാലക്കാട് ഡിവിഷന്റെ വാർഷിക വരുമാനത്തിൽ ഏകദേശം 1100 കോടി രൂപയുടെ കുറവുണ്ടാകുമെന്നാണ് കണക്ക്.
ചരക്കുനീക്ക വരുമാനത്തിൽ വൻ തിരിച്ചടി
പാലക്കാട് ഡിവിഷന്റെ വരുമാനത്തിന്റെ ഏകദേശം 90 ശതമാനവും ചരക്കുനീക്കത്തിൽ നിന്നാണ് ലഭിക്കുന്നത്. കഴിഞ്ഞ വർഷം ഡിവിഷൻ 733 ലക്ഷം ടൺ ചരക്കാണ് കൈകാര്യം ചെയ്തത്.
ഇതിൽ 90 ശതമാനത്തിലേറെയും മംഗളൂരു, പനമ്പൂർ, ഉള്ളാൾ മേഖലകളിൽ നിന്നാണെന്നാണ് കണക്ക്. മംഗളൂരു തുറമുഖത്ത് നിന്നുള്ള കൽക്കരി, വളം, പെട്രോളിയം തുടങ്ങിയ ചരക്കുകൾ കൈകാര്യം ചെയ്യുന്ന പ്രധാന കേന്ദ്രമാണ് പനമ്പൂർ.
വരുമാനം കുറയുന്നത് വികസനത്തെയും ബാധിക്കും
നടപ്പ് സാമ്പത്തിക വർഷത്തിന്റെ ആദ്യ നാല് മാസങ്ങളിൽ പാലക്കാട് ഡിവിഷന്റെ യാത്രക്കൂലി വരുമാനം 400 കോടി രൂപ കടന്നിരുന്നു. ഇതിൽ ഒരു ഭാഗം മംഗളൂരു, പനമ്പൂർ, ഉള്ളാൾ മേഖലകളിൽ നിന്നുള്ളതാണെന്നും ചൂണ്ടിക്കാട്ടുന്നു.
പാലക്കാട് റെയിൽവേ ഡിവിഷൻ വിഭജനം നടപ്പാകുന്നതോടെ ഡിവിഷന്റെ ആകെ വരുമാനത്തിൽ 50 ശതമാനത്തിലേറെ കുറവുണ്ടാകാൻ സാധ്യതയുണ്ടെന്നാണ് ഡിവിഷണൽ റെയിൽവേ യൂസേഴ്സ് കൺസൾട്ടേറ്റീവ് കമ്മിറ്റി പറയുന്നത്.
റൂട്ട് കിലോമീറ്ററും വരുമാനവും കുറയുന്നതോടെ റെയിൽവേ ബജറ്റിൽ ലഭിക്കുന്ന വിഹിതത്തിലും കുറവുണ്ടാകാം. കൂടാതെ പുതിയ ട്രെയിനുകൾ അനുവദിക്കുന്നതിനുള്ള സാധ്യതയും കുറയുമെന്നാണ് ആശങ്ക.
ജീവനക്കാരെയും തീരുമാനം ബാധിക്കും
ഡിവിഷൻ മാറുന്നതിനൊപ്പം സോൺ മാറ്റവും വരുന്നതിനാൽ ജീവനക്കാരുടെ സീനിയോറിറ്റി, സ്ഥാനക്കയറ്റം, ഗ്രേഡ് എന്നിവയെ ബാധിക്കുമെന്ന ആശങ്കയുണ്ട്.
നിലവിൽ കേരളത്തിനകത്തെ വിവിധ സ്ഥലങ്ങളിലേക്ക് സ്ഥലംമാറ്റം നേടാൻ കഴിയുന്ന ജീവനക്കാർക്ക് പുതിയ സോണിന്റെ പരിധി ബാധകമാകും. ഇതോടെ കർണാടകയിലെ വിവിധ മേഖലകളിലേക്ക് മാത്രം സ്ഥലംമാറ്റം പരിമിതപ്പെടാനുള്ള സാധ്യതയുമുണ്ട്.
പാലക്കാട് ഡിവിഷൻ നിലനിൽപ്പിനും ആശങ്ക
വരുമാനം, റൂട്ട് കിലോമീറ്റർ, ട്രാക്കിന്റെ ദൈർഘ്യം, പ്രധാന സ്റ്റേഷനുകൾ തുടങ്ങിയവയാണ് റെയിൽവേയുടെ ബജറ്റ് വിഹിതം നിശ്ചയിക്കുന്ന പ്രധാന മാനദണ്ഡങ്ങൾ.
ഇവയിൽ കുറവുണ്ടാകുന്നതോടെ ഭാവിയിൽ പാലക്കാട് ഡിവിഷന്റെ പ്രവർത്തനത്തെ തന്നെ ബാധിക്കാമെന്നാണ് ഡിവിഷണൽ റെയിൽവേ യൂസേഴ്സ് കൺസൾട്ടേറ്റീവ് കമ്മിറ്റിയുടെ ആശങ്ക.
പ്രധാനമന്ത്രിക്ക് കത്തയച്ച് വി.ഡി. സതീശൻ
അതേസമയം, മംഗളൂരു ഉൾപ്പെടെയുള്ള സ്റ്റേഷനുകൾ പാലക്കാട് ഡിവിഷനിൽ നിന്ന് മൈസൂരു ഡിവിഷനിലേക്ക് മാറ്റാനുള്ള തീരുമാനം പുനഃപരിശോധിക്കണമെന്ന് ആവശ്യപ്പെട്ട് മുഖ്യമന്ത്രി വി.ഡി. സതീശൻ പ്രധാനമന്ത്രിക്ക് കത്തയച്ചു.
കേരളത്തിന്റെ റെയിൽവേ അടിസ്ഥാന സൗകര്യ വികസനത്തെയും ഭാവിയിലെ വികസന സാധ്യതകളെയും തീരുമാനം ബാധിക്കാമെന്നും സർക്കാരുമായി യാതൊരു കൂടിയാലോചനയും നടത്താതെയാണ് തീരുമാനമെടുത്തതെന്നും കത്തിൽ ചൂണ്ടിക്കാട്ടിയിട്ടുണ്ട്.
