എറണാകുളം–കൊല്ലം റൂട്ടിൽ പുതിയ ട്രെയിൻ; സർവീസ് ഉടൻ

എറണാകുളം: വേണാട് എക്സ്പ്രസിലെ രൂക്ഷമായ തിരക്ക് കുറയ്ക്കാൻ പുതിയ ട്രെയിൻ സർവീസ് ആരംഭിക്കുന്നതിന് റെയിൽവേ മന്ത്രാലയം അംഗീകാരം നൽകി. എറണാകുളം–കോട്ടയം–ചെങ്ങന്നൂർ–കൊല്ലം റൂട്ടിൽ സർവീസ് ആരംഭിക്കാനാണ് തീരുമാനം. പത്ത് ദിവസത്തിനകം ആദ്യ സർവീസ് തുടങ്ങുമെന്ന് മാവേലിക്കര എംപി കൊടിക്കുന്നിൽ സുരേഷ് അറിയിച്ചു.

വേണാടിന് മുന്നിൽ പുതിയ ട്രെയിൻ സർവീസ്

ഓഫിസ് സമയം കഴിഞ്ഞ് എറണാകുളത്തുനിന്ന് കോട്ടയം, ചങ്ങനാശേരി, ചെങ്ങന്നൂർ, മാവേലിക്കര, കായംകുളം, ശാസ്താംകോട്ട, കൊല്ലം മേഖലകളിലേക്ക് മടങ്ങുന്ന സ്ഥിരം യാത്രക്കാരാണ് വേണാട് എക്സ്പ്രസിലെ തിരക്ക് ഏറ്റവും കൂടുതൽ നേരിടുന്നത്.

സ്ത്രീകളും കുട്ടികളും മുതിർന്ന പൗരന്മാരും ഉൾപ്പെടെ നൂറുകണക്കിന് യാത്രക്കാർക്ക് ഇരിക്കാനും പലപ്പോഴും നിൽക്കാനും പോലും മതിയായ ഇടമില്ലാത്ത സാഹചര്യമാണ് നിലവിലുള്ളത്. മണിക്കൂറുകളോളം ഇതേ തിരക്കിൽ യാത്ര ചെയ്യേണ്ടിവരുന്നതും ദുരിതം വർധിപ്പിക്കുന്നു.

റെയിൽവേ മന്ത്രിക്ക് മുന്നിൽ ആവശ്യം

ഡൽഹിയിൽ റെയിൽവേ മന്ത്രി അശ്വിനി വൈഷ്ണവിനെ നേരിൽ കണ്ടാണ് കൊടിക്കുന്നിൽ സുരേഷ് വിഷയം അവതരിപ്പിച്ചത്. വേണാട് എക്സ്പ്രസിലെ യാത്രക്കാരുടെ ദുരിതം വ്യക്തമാക്കുന്ന ചിത്രങ്ങളും വിഡിയോകളും മന്ത്രിക്ക് കൈമാറി.

വേണാട് എക്സ്പ്രസ് എറണാകുളത്തുനിന്ന് പുറപ്പെടുന്നതിന് മുൻപായി പുതിയ ട്രെയിൻ സർവീസ് ആരംഭിക്കണമെന്നായിരുന്നു പ്രധാന ആവശ്യം. ഇതിന്റെ തുടർനടപടിയായി മന്ത്രിയുടെ ഓഫിസ് റെയിൽവേ ബോർഡിന് നിർദേശം കൈമാറി.

റെയിൽവേ ബോർഡ് നടപടികൾ ആരംഭിച്ചു

റെയിൽവേ ബോർഡ് സതേൺ റെയിൽവേയിലെ ചീഫ് പാസഞ്ചർ ട്രാൻസ്പോർട്ടേഷൻ മാനേജർക്ക് (CPTM) ആവശ്യമായ നടപടികൾ സ്വീകരിക്കാൻ നിർദേശം നൽകി. ഇതോടെ പുതിയ സർവീസ് ആരംഭിക്കുന്നതിനുള്ള നടപടികൾ വേഗത്തിലായി.

വൈകിട്ട് ഏകദേശം നാലുമണിയോടെ എറണാകുളം ജംക്‌ഷനിൽനിന്ന് വേണാട് എക്സ്പ്രസിന് മുൻപായി ട്രെയിൻ പുറപ്പെടുന്ന രീതിയിലാണ് സർവീസ് ആസൂത്രണം ചെയ്യുന്നത്. മെമു അല്ലെങ്കിൽ ഐസിഎഫ് കോച്ചുകൾ ഉപയോഗിക്കുന്നതിന്റെ സാധ്യതയും റെയിൽവേ പരിശോധിക്കുന്നുണ്ട്.

കൊല്ലം വരെ സർവീസ്; പുനലൂർ സാധ്യതയും

ആദ്യ ഘട്ടത്തിൽ എറണാകുളത്തുനിന്ന് കോട്ടയം, ചെങ്ങന്നൂർ വഴി കൊല്ലം വരെയായിരിക്കും പുതിയ ട്രെയിൻ സർവീസ്. തുടർന്ന് കൊല്ലത്തുനിന്ന് പുനലൂരിലേക്ക് സർവീസ് നീട്ടാനുള്ള സാധ്യതയും റെയിൽവേ പരിശോധിക്കുന്നുണ്ട്.

ഇതോടെ എറണാകുളം മുതൽ കോട്ടയം, ചങ്ങനാശേരി, ചെങ്ങന്നൂർ, മാവേലിക്കര, കായംകുളം, കൊല്ലം, പുനലൂർ മേഖലകളിലേക്ക് ദിവസേന യാത്ര ചെയ്യുന്ന ആയിരക്കണക്കിന് സ്ഥിരം യാത്രക്കാർക്ക് ആശ്വാസമാകും.അതേസമയം, വേണാട് എക്സ്പ്രസിലെ അമിത തിരക്ക് കുറയ്ക്കുന്നതിനൊപ്പം യാത്രക്കാരുടെ സുരക്ഷയും യാത്രാസൗകര്യവും മെച്ചപ്പെടുത്താനും പുതിയ സർവീസ് സഹായിക്കുമെന്നാണ് പ്രതീക്ഷ.

English summary:Railways has approved a new train service on the Ernakulam–Kottayam–Chengannur–Kollam route to reduce severe overcrowding on the Venad Express. Mavelikkara MP Kodikunnil Suresh said the first service is expected to begin within 10 days. The proposed train will leave Ernakulam Junction around 4 pm, before the Venad Express. Railways is considering MEMU or ICF coaches and may later extend the service from Kollam to Punalur.