വന്യമൃഗങ്ങൾക്ക് കാട്ടിൽ ഭക്ഷണം; വനംവകുപ്പിന്റെ വിത്തുണ്ടകൾ തൈകളായി

പത്തനംതിട്ട: വന്യമൃഗങ്ങൾക്ക് കാട്ടിൽത്തന്നെ ഭക്ഷണം ലഭ്യമാക്കുന്നതിനായി വനംവകുപ്പ് നടപ്പാക്കിയ വിത്തുണ്ട പദ്ധതി ഫലം കാണുന്നു. 

കാട്ടിൽ വിതറിയ ഞാവൽ, കാട്ടുപ്ലാവ്, മാവ്, നെല്ലി, അത്തി, ഇലഞ്ഞി തുടങ്ങിയവയുടെ വിത്തുകൾ മുളച്ച് തൈകളായി വളർന്നു.

 കഴിഞ്ഞവർഷം ജൂണിൽ വിതറിയ വിത്തുകളിൽനിന്നുള്ള ചില തൈകൾ അഞ്ചടി ഉയരത്തോളമെത്തി.

ഞാവലും കാട്ടുപ്ലാവും ഉൾപ്പെടെ ഫലവൃക്ഷങ്ങൾ വളരുന്നു

വിത്തുണ്ടകൾ വിതറിയ സ്ഥലങ്ങളിൽ വളർന്ന തൈകൾ കണ്ടെത്തി അവയ്ക്കു ചുറ്റുമുള്ള കളകൾ നീക്കം ചെയ്യുന്ന പ്രവൃത്തികൾ ആരംഭിച്ചു. 

വിത്തുണ്ടകൾ ഇട്ട സ്ഥലങ്ങളുടെ വിവരങ്ങൾ വനംവകുപ്പിന്റെ കൈവശമുള്ളതിനാൽ അവയുടെ അടിസ്ഥാനത്തിലാണ് തൈകൾ കണ്ടെത്തുന്നത്.

ഒരു വിത്തുണ്ടയിൽനിന്ന് കുറഞ്ഞത് രണ്ട് തൈകളെങ്കിലും വളരുമെന്നാണ് പ്രതീക്ഷ. വിതറിയ വിത്തുണ്ടകളിൽ 40 ശതമാനത്തോളം പൂർണവളർച്ചയിലെത്തുമെന്നാണ് വനംവകുപ്പിന്റെ വിലയിരുത്തൽ.

മണ്ണും കമ്പോസ്റ്റും ചേർത്ത് വിത്തുണ്ടകൾ

മണ്ണും കമ്പോസ്റ്റ് വളവും ചേർത്ത് ഉരുട്ടിയുണ്ടാക്കി അതിൽ ഫലവൃക്ഷങ്ങളുടെയും പുല്ലുകളുടെയും വിത്തുകൾ നിക്ഷേപിച്ചാണ് വിത്തുണ്ടകൾ തയ്യാറാക്കുന്നത്. 

കാട്ടിൽ സ്വാഭാവികമായി വളരുന്ന സസ്യങ്ങളുടെ വ്യാപനം വർധിപ്പിക്കുകയും വന്യമൃഗങ്ങൾക്ക് ഭക്ഷണലഭ്യത ഉറപ്പാക്കുകയുമാണ് പദ്ധതിയുടെ ലക്ഷ്യം.

കൈതച്ചക്കയുടെയും ചക്കയുടെയും മണംപിടിച്ച് കാട്ടാനകൾ ജനവാസമേഖലകളിലേക്ക് ഇറങ്ങുന്ന സാഹചര്യം നിലനിൽക്കുന്നതിനാൽ കാട്ടിൽ ഭക്ഷണലഭ്യത വർധിപ്പിക്കുന്നത് വന്യമൃഗശല്യം കുറയ്ക്കാനുള്ള ശ്രമങ്ങളുടെ ഭാഗമായാണ് കാണുന്നത്.

ഫലവൃക്ഷങ്ങൾ മാത്രം മതിയാകില്ലെന്ന് ഉദ്യോഗസ്ഥർ

കാട്ടിൽ ഫലവൃക്ഷങ്ങൾ വളർത്തുന്നതുകൊണ്ടുമാത്രം വന്യമൃഗങ്ങൾ ജനവാസമേഖലകളിലേക്ക് ഇറങ്ങുന്നത് പൂർണമായി തടയാനാകില്ലെന്നാണ് ഒരു വിഭാഗം വനംവകുപ്പ് ഉദ്യോഗസ്ഥരുടെ വിലയിരുത്തൽ.

അതിനാൽ തൂക്കുവേലി, കിടങ്ങ്, കൽക്കെട്ട്, ജൈവവേലി, ട്രെയിൻ പാളങ്ങൾ ഉപയോഗിച്ചുള്ള വേലി തുടങ്ങിയ പ്രതിരോധ സംവിധാനങ്ങളും ആവശ്യമാണ്. ഭക്ഷണലഭ്യത വർധിപ്പിക്കുന്നതിനൊപ്പം വന്യമൃഗങ്ങൾ ജനവാസമേഖലകളിലേക്ക് കടക്കുന്നത് തടയാനുള്ള നടപടികളും ശക്തമാക്കേണ്ടതുണ്ട്.

സംസ്ഥാനത്ത് നാല് ലക്ഷം വിത്തുണ്ടകൾ വിതറി

സംസ്ഥാനത്തെ 36 വനം ഡിവിഷനുകളിലായി നാല് ലക്ഷം വിത്തുണ്ടകളാണ് വനംവകുപ്പ് വിതറിയത്.

 വനസംരക്ഷണ സമിതികൾ, പരിസ്ഥിതി ക്ലബുകൾ, സ്കൂൾ-കോളേജ് വിദ്യാർഥികൾ, എസ്.പി.സി, എൻ.സി.സി, ഹരിതകർമസേന തുടങ്ങിയവരുടെ പങ്കാളിത്തത്തോടെയാണ് വിത്തുണ്ടകൾ തയ്യാറാക്കിയത്.

വിവിധ വിഭാഗങ്ങളുടെ സഹകരണത്തോടെ പദ്ധതി നടപ്പാക്കിയതിനാൽ ചെലവ് കുറയ്ക്കാനും സാധിച്ചു. 

വിത്തുണ്ടകളിൽ 40 ശതമാനത്തിലധികം മുളച്ച് വളർന്നുവെന്നാണ് വനംവകുപ്പ് അധികൃതരുടെ വിലയിരുത്തൽ.

English Summary:

The Kerala Forest Department’s seed-ball initiative is showing results, with saplings of jamun, wild jackfruit, mango, gooseberry and other species growing to around five feet in some locations. Four lakh seed balls were distributed across 36 forest divisions last year, with participation from forest protection committees, students and community groups. Officials expect the initiative to improve food availability for wildlife, while noting that barriers such as trenches, fences and other protective measures are also needed to reduce animal incursions into populated areas.