കൊളീജിയം നിയമനത്തിൽ ചന്ദ്രചൂഡിനെതിരെ ജസ്റ്റിസ് കൗളിന്റെ വിമർശനം

ന്യൂഡൽഹി: സുപ്രീം കോടതി ജഡ്ജിമാരുടെ നിയമനവുമായി ബന്ധപ്പെട്ട് മുൻ ചീഫ് ജസ്റ്റിസ് ഡി.വൈ. ചന്ദ്രചൂഡിനെതിരെ ഗുരുതര വിമർശനങ്ങളുമായി മുൻ സുപ്രീം കോടതി ജഡ്ജി ജസ്റ്റിസ് സഞ്ജയ് കിഷൻ കൗൾ.

കൊളീജിയം ഔദ്യോഗികമായി ചർച്ച നടത്തുന്നതിനു മുൻപ് തന്നെ ജഡ്ജി നിയമനത്തിൽ കേന്ദ്ര സർക്കാരിന്റെ നിലപാട് തേടാൻ ചന്ദ്രചൂഡ് ശ്രമിച്ചിരുന്നുവെന്നാണ് കൗളിന്റെ വെളിപ്പെടുത്തൽ.

ഈ മാസം അവസാനം പുറത്തിറങ്ങുന്ന തന്റെ ഓർമക്കുറിപ്പായ ‘Without Fear or Favour’ലാണ് അദ്ദേഹം ഇക്കാര്യങ്ങൾ വിശദീകരിക്കുന്നത്. ‘ദി ഇന്ത്യൻ എക്സ്പ്രസ്’ ആണ് ഇതുസംബന്ധിച്ച വാർത്ത പുറത്തുവിട്ടത്.

സർക്കാരിന്റെ താൽപര്യം തേടിയെന്ന് ആരോപണം

2023 ഡിസംബറിൽ വിരമിച്ച ജസ്റ്റിസ് കൗൾ 14 മാസത്തോളം സുപ്രീം കോടതി കൊളീജിയത്തിൽ ചീഫ് ജസ്റ്റിസിന് തൊട്ടുതാഴെയുള്ള ഏറ്റവും മുതിർന്ന ജഡ്ജിയായിരുന്നു. ജഡ്ജിമാരുടെ നിയമനവുമായി ബന്ധപ്പെട്ട് സർക്കാരിനോട് ചീഫ് ജസ്റ്റിസ് അമിതവിധേയത്വം പുലർത്തിയിരുന്നുവെന്നാണ് അദ്ദേഹത്തിന്റെ വിമർശനം.

കൊളീജിയം ഔദ്യോഗികമായി ചർച്ച ചെയ്യുന്നതിനു മുൻപ് തന്നെ സർക്കാരിന്റെ താൽപര്യം അറിയാൻ ചീഫ് ജസ്റ്റിസ് ശ്രമിച്ചിരുന്നുവെന്നും കൗൾ ഓർമക്കുറിപ്പിൽ പറയുന്നു. സർക്കാരിന്റെ നിലപാടുകൾക്കനുസരിച്ച് നിയമന നടപടികൾ മുന്നോട്ടുകൊണ്ടുപോകാനുള്ള ഇത്തരം നീക്കങ്ങളോട് തനിക്ക് യോജിക്കാനായിരുന്നില്ലെന്നും അദ്ദേഹം വ്യക്തമാക്കുന്നു.

ജഡ്ജിയുടെ കുടുംബത്തിന്റെ ജാതി ചോദിച്ച ന്യൂനപക്ഷ വിഭാഗത്തിൽപ്പെട്ട ഒരു ജഡ്ജിയെ നിയമിക്കുന്നതുമായി ബന്ധപ്പെട്ട് സർക്കാർ കുടുംബത്തിന്റെ ജാതിയെക്കുറിച്ച് ചോദിച്ച സംഭവം ചന്ദ്രചൂഡ് കൊളീജിയത്തിൽ പങ്കുവച്ചതായും കൗൾ വെളിപ്പെടുത്തുന്നു.തലമുറകളായി ഒരു മതത്തിൽ തുടരുന്ന കുടുംബത്തിന്റെ ജാതി എങ്ങനെ നിർണയിക്കാനാകുമെന്നായിരുന്നു കൗളിന്റെ ചോദ്യം.

ഇത്തരം രീതികളോട് യോജിക്കാനാകില്ലെന്ന് വ്യക്തമാക്കിയ അദ്ദേഹം ഫയൽ മടക്കി കൊളീജിയം യോഗത്തിൽനിന്ന് ഇറങ്ങിപ്പോയി. പിന്നീട് സർക്കാർ ബന്ധപ്പെട്ട നിയമനത്തിന് അംഗീകാരം നൽകിയതായും കൗൾ പറയുന്നു.

ആറ് ഒഴിവുകളിലേക്കുള്ള നിയമനത്തിലും തർക്കം

ആറ് ജഡ്ജിമാരുടെ ഒഴിവുകളിലേക്ക് നിയമനം നടത്താൻ ചേർന്ന കൊളീജിയം യോഗത്തിലും അഭിപ്രായവ്യത്യാസമുണ്ടായതായി കൗൾ ഓർമക്കുറിപ്പിൽ പറയുന്നു. നേരത്തേ ധാരണയിലെത്തിയ അഞ്ച് പേരുകൾക്ക് പുറമേ യോഗദിവസം ചീഫ് ജസ്റ്റിസ് ആറാമതൊരു പേര് നിർദേശിച്ചു.

ഈ പേര് സർക്കാരിന്റെ നിർദേശപ്രകാരമാണെന്ന സംശയത്തെത്തുടർന്ന് മറ്റ് ജഡ്ജിമാർ എതിർപ്പ് പ്രകടിപ്പിച്ചു. സർക്കാരിന്റെ നിലപാട് അറിയാൻ യോഗത്തിനിടെ ഫോൺ വിളിക്കാൻ ചീഫ് ജസ്റ്റിസ് ശ്രമിച്ചപ്പോൾ ജസ്റ്റിസ് കൗൾ അത് തടഞ്ഞതായും പുസ്തകത്തിൽ പറയുന്നു.

നാഷണൽ ജുഡീഷ്യൽ അപ്പോയിന്റ്മെന്റ് കമ്മിഷൻ ഭരണഘടനാ വിരുദ്ധമാണെന്ന് ചൂണ്ടിക്കാട്ടി.2015ൽ സുപ്രീം കോടതി റദ്ദാക്കിയതിനോടും കൗൾ വിയോജിപ്പ് രേഖപ്പെടുത്തുന്നുണ്ട്.

ആ സംവിധാനത്തിന് പ്രവർത്തിക്കാൻ ഒരു അവസരം നൽകാമായിരുന്നുവെന്നാണ് അദ്ദേഹത്തിന്റെ അഭിപ്രായം. നട്ടെല്ലുള്ള ജഡ്ജിമാരെയാണ് സർക്കാർ ബഹുമാനിക്കുന്നതെന്നും ഓർമക്കുറിപ്പിൽ അദ്ദേഹം പറയുന്നു.

ആരോപണങ്ങളോട് പ്രതികരിച്ച് ചന്ദ്രചൂഡ്

ജസ്റ്റിസ് കൗളിന്റെ പുസ്തകം ഇതുവരെ വായിച്ചിട്ടില്ലാത്തതിനാൽ വിശദമായ പ്രതികരണം നടത്താനാകില്ലെന്ന് മുൻ ചീഫ് ജസ്റ്റിസ് ഡി.വൈ. ചന്ദ്രചൂഡ് പറഞ്ഞു. എന്നാൽ, കൊളീജിയം യോഗങ്ങൾ സൗഹാർദപരമായാണ് നടന്നിരുന്നതെന്നും ജസ്റ്റിസ് കൗൾ യോഗത്തിൽനിന്ന് ഇറങ്ങിപ്പോയ സംഭവം ഓർമയില്ലെന്നും അദ്ദേഹം വ്യക്തമാക്കി.

ജഡ്ജിമാരുടെ നിയമനവുമായി ബന്ധപ്പെട്ട് സർക്കാരുമായി ചർച്ചകൾ നടത്താറുണ്ടെന്നത് യാഥാർഥ്യമാണെന്നും ചന്ദ്രചൂഡ് പറഞ്ഞു. നിയമന ഉത്തരവിൽ അന്തിമമായി രാഷ്ട്രപതിയാണ് ഒപ്പിടുന്നത്.

കൊളീജിയം തീരുമാനങ്ങളിൽ ജസ്റ്റിസ് കൗൾ വിയോജിപ്പ് രേഖപ്പെടുത്തിയതായി ഓർക്കുന്നില്ലെന്നും അദ്ദേഹം പ്രതികരിച്ചു.കള്ളപ്പണം വെളുപ്പിക്കൽ നിരോധന നിയമവുമായി ബന്ധപ്പെട്ട കേസ് തന്റെ ബെഞ്ചിൽനിന്ന് മാറ്റിയതുൾപ്പെടെ ചീഫ് ജസ്റ്റിസിന്റെ ഭാഗത്തുനിന്നുണ്ടായ അസ്വാഭാവിക ഇടപെടലുകളെക്കുറിച്ചും ജസ്റ്റിസ് കൗൾ ഓർമക്കുറിപ്പിൽ വിമർശനം ഉന്നയിക്കുന്നുണ്ട്.

English Summary : Former Supreme Court judge Justice Sanjay Kishan Kaul has criticised former Chief Justice of India D.Y. Chandrachud over judicial appointments in his upcoming memoir, Without Fear or Favour. Kaul alleges that Chandrachud sought the government’s views on appointments before formal Collegium discussions and recalls disagreements over the appointment process. Chandrachud said Collegium meetings were cordial and that he did not recall Kaul walking out of a meeting.