പയ്യന്നൂരിൽ ജുജു എക്‌സ്‌പ്രസ്; ട്രെയിൻ കോച്ചിൽ ഇനി രുചിയാത്ര

കണ്ണൂർ: കേരളത്തിലെ ആദ്യ കോച്ച് റസ്റ്റോറന്റ് ജുജു എക്‌സ്‌പ്രസ് പയ്യന്നൂർ റെയിൽവേ സ്റ്റേഷൻ മുറ്റത്ത് നാളെ പ്രവർത്തനം ആരംഭിക്കും. ത്രീ ടയർ എ.സി കോച്ചിനെ റസ്റ്റോറന്റാക്കി മാറ്റിയതാണ് പ്രത്യേകത. ഏകദേശം ഒന്നരക്കോടി രൂപ ചെലവഴിച്ചാണ് പദ്ധതി ഒരുക്കിയത്. 24 മണിക്കൂറും പ്രവർത്തിക്കുന്ന റസ്റ്റോറന്റിൽ ട്രെയിൻ കോച്ചിനുള്ളിലും പ്ലാറ്റ്‌ഫോമിലിരുന്നും ഭക്ഷണം കഴിക്കാം.

37 ടൺ ഭാരമുള്ള കോച്ച് പയ്യന്നൂരിലെത്തി

മംഗളൂരുവിൽ നിന്ന് കൂറ്റൻ ട്രെയിലറിലാണ് 37 ടൺ ഭാരമുള്ള കോച്ച് പയ്യന്നൂരിലെത്തിച്ചത്. കോച്ച് കയറ്റുന്നതിനും ഇറക്കുന്നതിനുമുള്ള ജോലികൾ മാപ്പിള ഖലാസിമാരാണ് നിർവഹിച്ചത്.

ത്രീ ടയർ എ.സി കോച്ചിന്റെ അകത്തളമാണ് ആധുനിക റസ്റ്റോറന്റായി മാറ്റിയത്. ട്രെയിൻ യാത്രയുടെ അനുഭവത്തോടൊപ്പം ഭക്ഷണം ആസ്വദിക്കാനുള്ള അവസരമാണ് ജുജു എക്‌സ്‌പ്രസ് ഒരുക്കുന്നത്.

മൂന്ന് സുഹൃത്തുക്കളുടെ ആശയം

മാതമംഗലം പെരുവാമ്പയിലെ ഹരികൃഷ്ണൻ, കാനായിയിലെ സാജിദ്, പയ്യന്നൂരിലെ സതീശൻ എന്നിവർ ചേർന്നാണ് കോച്ച് റസ്റ്റോറന്റ് എന്ന ആശയം മുന്നോട്ടുവച്ചത്. ഇവർ പദ്ധതിയുടെ പ്രോജക്ട് റിപ്പോർട്ട് റെയിൽവേയ്ക്ക് സമർപ്പിക്കുകയും തുടർന്ന് അനുമതി ലഭിക്കുകയും ചെയ്തു.

ടെൻഡർ നടപടികൾ പൂർത്തിയായതോടെ പയ്യന്നൂരിലെ ജുജു ഇന്റർനാഷണൽ ഹോട്ടൽ ഗ്രൂപ്പ് അഞ്ചു വർഷത്തേക്ക് നടത്തിപ്പ് ഏറ്റെടുത്തു. എക്‌സിക്യൂട്ടീവ് ഷെഫ് നിധിനും സൂഷെഫ് ഡാരിസുമാണ് വിഭവങ്ങൾ ഒരുക്കുന്നത്.

പ്ലാറ്റ്‌ഫോമിലും ഇരുന്ന് ഭക്ഷണം കഴിക്കാം

കോച്ചിനുള്ളിൽ ഇരുന്ന് ഭക്ഷണം കഴിക്കാൻ താൽപര്യമില്ലാത്തവർക്ക് പ്ലാറ്റ്‌ഫോമിൽ ഒരുക്കിയിരിക്കുന്ന ഇരിപ്പിടങ്ങളിലും ഭക്ഷണം ആസ്വദിക്കാം. 24 മണിക്കൂറും പ്രവർത്തിക്കുന്നതിനാൽ യാത്രക്കാർക്കും നാട്ടുകാർക്കും ഒരുപോലെ പ്രയോജനപ്പെടുന്ന ഭക്ഷണശാലയാകുമെന്നാണ് പ്രതീക്ഷ.

രാജ്യത്ത് വ്യാപിക്കുന്ന കോച്ച് റസ്റ്റോറന്റുകൾ

റെയിൽവേ സ്റ്റേഷനുകളിലെ ഉപയോഗശൂന്യമായ കോച്ചുകൾ ഭക്ഷണശാലകളാക്കി മാറ്റുന്ന ആശയം രാജ്യത്തിന്റെ വിവിധ ഭാഗങ്ങളിൽ ഇതിനകം ശ്രദ്ധ നേടിയിട്ടുണ്ട്. മുംബൈയിലെ ഛത്രപതി ശിവജി മഹാരാജ് ടെർമിനസിലെ ‘ബോഗി വോഗി’യാണ് രാജ്യത്തെ ശ്രദ്ധേയമായ കോച്ച് റസ്റ്റോറന്റുകളിൽ ഒന്ന്.

ആസൻസോൾ, പൂനെ, നാഗ്പൂർ, ഡൽഹി, കത്ര തുടങ്ങിയ സ്റ്റേഷനുകളിലും കോച്ച് റസ്റ്റോറന്റുകൾ പ്രവർത്തിക്കുന്നുണ്ട്. പദ്ധതി രാജ്യത്തിന്റെ കൂടുതൽ ഭാഗങ്ങളിലേക്ക് വ്യാപിപ്പിക്കാനുള്ള നീക്കത്തിലാണ് റെയിൽവേ.

English Summary:
Kerala’s first coach restaurant, Juju Express, will open at Payyanur Railway Station tomorrow. A three-tier AC coach has been converted into a restaurant at a cost of around ₹1.5 crore. The restaurant will operate 24 hours a day, offering customers the option to dine inside the coach or on the platform.