ന്യൂഡൽഹി: ഈ വർഷത്തെ കാലവർഷം ദുർബലമാകാൻ സാധ്യതയുണ്ടെന്ന മുന്നറിയിപ്പുമായി ഇന്ത്യൻ കാലാവസ്ഥാ വകുപ്പ് (ഐ.എം.ഡി). ദീർഘകാല ശരാശരിയുടെ 90 ശതമാനം മഴ മാത്രമാണ് ഇത്തവണ ലഭിക്കാൻ സാധ്യതയെന്നാണ് വിലയിരുത്തൽ. രാജ്യത്ത് സാധാരണയെക്കാൾ മഴ കുറയാൻ 60 ശതമാനം സാധ്യതയുണ്ടെന്നും കാലാവസ്ഥാ വിദഗ്ധർ മുന്നറിയിപ്പ് നൽകുന്നു.
രാജ്യത്തെ 52 ശതമാനത്തിലധികം കൃഷിഭൂമികൾ ഇപ്പോഴും മഴയെ ആശ്രയിക്കുന്ന സാഹചര്യത്തിൽ മഴക്കുറവ് കാർഷിക മേഖലയെ പ്രതികൂലമായി ബാധിക്കുമെന്ന ആശങ്ക ശക്തമാണ്.
സമുദ്രജലത്തിന്റെ താപനിലയിൽ ഉണ്ടാകുന്ന അസാധാരണ വർധനവിലൂടെ രൂപപ്പെടുന്ന എൽ നിനോ പ്രതിഭാസമാണ് ഇത്തവണ പ്രധാന വെല്ലുവിളിയായി ചൂണ്ടിക്കാണിക്കപ്പെടുന്നത്. പസഫിക് സമുദ്രത്തിന്റെ മധ്യ-കിഴക്കൻ മേഖലകളിലെ ഉപരിതല ജലത്തിന് സാധാരണയേക്കാൾ ചൂട് കൂടുമ്പോഴാണ് എൽ നിനോ രൂപപ്പെടുന്നത്.
മേയ് മുതൽ ജൂലൈ വരെയുള്ള കാലയളവിൽ എൽ നിനോ രൂപപ്പെടാൻ 82 ശതമാനം സാധ്യതയുണ്ടെന്നും, ശൈത്യകാലത്തോടെ ഇത് 96 ശതമാനമായി ഉയരാമെന്നുമാണ് അന്താരാഷ്ട്ര കാലാവസ്ഥാ ഏജൻസികളുടെ വിലയിരുത്തൽ.
1982-83, 1991-92, 1997-98, 2015-16 കാലഘട്ടങ്ങളിലെ ശക്തമായ ‘സൂപ്പർ എൽ നിനോ’ വർഷങ്ങളോട് സമാനമായ സാഹചര്യം ഇത്തവണയും ഉണ്ടാകുമെന്ന ആശങ്ക കാലാവസ്ഥാ ശാസ്ത്രജ്ഞർ പങ്കുവയ്ക്കുന്നു.
More Read
മഴയുടെ ആകെ അളവിനേക്കാൾ അത് എപ്പോൾ, എവിടെ ലഭിക്കുന്നു എന്നതാണ് പ്രധാനമെന്ന് വിദഗ്ധർ ചൂണ്ടിക്കാട്ടുന്നു. മഴയുടെ വിതരണത്തിൽ അസന്തുലിതാവസ്ഥയും ദീർഘ ഇടവേളകളും ഉണ്ടായാൽ കൃഷിവിളകളുടെ വളർച്ചയും വിളവെടുപ്പും ഗണ്യമായി ബാധിക്കാം.
മഴ വൈകുന്നത് വടക്കുപടിഞ്ഞാറൻ ഇന്ത്യയിൽ ഉഷ്ണതരംഗങ്ങൾ ശക്തമാകാനും കാരണമാകും. കൂടാതെ ഭൂഗർഭജലനിരപ്പ് താഴുക, ജലസംഭരണികളിലെ ജലനിരപ്പ് കുറയുക തുടങ്ങിയ പ്രത്യാഘാതങ്ങളും ഉണ്ടാകാൻ സാധ്യതയുണ്ട്.
എൽ നിനോയുടെ ആഘാതം കുറയ്ക്കുന്നതിൽ ‘ഇന്ത്യൻ ഓഷ്യൻ ഡൈപോൾ’ (IOD) സഹായകരമാകാമെങ്കിലും, ശക്തമായ എൽ നിനോയെ പൂർണമായും പ്രതിരോധിക്കാൻ അതിന് കഴിയില്ലെന്നാണ് വിദഗ്ധരുടെ വിലയിരുത്തൽ.
More Read
കാലാവസ്ഥാ വ്യതിയാനവും ആഗോള സാഹചര്യങ്ങളും കൂടി പരിഗണിക്കുമ്പോൾ, ജലസംരക്ഷണത്തിനും കാർഷിക മേഖലയിലെ മുൻകരുതലുകൾക്കും കൂടുതൽ പ്രാധാന്യം നൽകേണ്ട സാഹചര്യമാണെന്ന് വിദഗ്ധർ മുന്നറിയിപ്പ് നൽകുന്നു.
English Summary:
India may witness a weaker monsoon this year, with rainfall expected to be around 90% of the long-term average, according to weather assessments. Experts warn that a strong El Niño event could reduce rainfall and disrupt its distribution, affecting agriculture, water resources, and increasing the risk of heatwaves. While the Indian Ocean Dipole may provide some relief, it may not fully offset the impact of a powerful El Niño.
