തൃശൂർ: മന്ത്രി ഒ.ജെ. ജനീഷിന് വീട്ടിൽ ഭക്ഷണം നൽകിയതിന്റെ പേരിൽ സിപിഐയുടെ മുതിർന്ന പ്രവർത്തകനും ബ്രാഞ്ച് അംഗവുമായ പി.എസ്. അബ്ദുൽ റഹ്മാനെ പാർട്ടിയുടെ പ്രാഥമിക അംഗത്വത്തിൽ നിന്ന് പുറത്താക്കി.
അഷ്ടമിച്ചിറ ബ്രാഞ്ച് കമ്മിറ്റിയാണ് നടപടി സ്വീകരിച്ചത്. മന്ത്രിക്ക് വീട്ടിൽ ഭക്ഷണം നൽകിയത് പാർട്ടി വിരുദ്ധ പ്രവർത്തനമാണെന്നും ഇതിലൂടെ പാർട്ടിക്ക് വലിയ അപമാനം സംഭവിച്ചുവെന്നുമാണ് നടപടിക്ക് കാരണമായി ചൂണ്ടിക്കാട്ടുന്നത്.
അൻപതിലേറെ വർഷമായി പാർട്ടിക്കായി പ്രവർത്തിക്കുന്ന വ്യക്തിയാണ് അബ്ദുൽ റഹ്മാൻ. തീരുമാനം അപ്രതീക്ഷിതവും വേദനാജനകവുമാണെന്ന് അദ്ദേഹം പ്രതികരിച്ചു.
വീട്ടുകാരുടെയും നാട്ടുകാരുടെയും അഭ്യർഥന മാനിച്ചാണ് മേയ് 27-ന് മന്ത്രിയെ വീട്ടിലേക്ക് ക്ഷണിച്ച് ഭക്ഷണം നൽകിയതെന്ന് അബ്ദുൽ റഹ്മാൻ പറഞ്ഞു. ഇതിന് പിന്നിൽ യാതൊരു രാഷ്ട്രീയ ലക്ഷ്യവും ഉണ്ടായിരുന്നില്ലെന്നും അദ്ദേഹം വ്യക്തമാക്കി.
സംഭവം പ്രാദേശിക രാഷ്ട്രീയ വൃത്തങ്ങളിൽ ചർച്ചയായിരിക്കുകയാണ്. പാർട്ടി നേതൃത്വത്തിന്റെ നടപടി സംബന്ധിച്ച് വിവിധ തലങ്ങളിൽ പ്രതികരണങ്ങളും ഉയരുന്നുണ്ട്.
More Read
English Summary:
A senior CPI worker, P.S. Abdul Rahman, has been expelled from the party’s primary membership after hosting Minister O.J. Janish for a meal at his home in Thrissur. The local CPI branch termed the act as anti-party activity. Abdul Rahman, a party worker for over 50 years, said the decision was painful and that he hosted the minister only at the request of family and local residents, with no political motive.
