ലക്നൗ: ഹണിമൂണിനിടെ ഭർത്താവ് മർദിക്കുകയും ഗുരുതരമായി ഉപദ്രവിക്കുകയും ചെയ്തെന്ന് ആരോപിച്ച് യുവതി പൊലീസിൽ പരാതി നൽകി. ആൻഡമാൻ നിക്കോബാർ ദ്വീപിൽ ഹണിമൂണിന് പോയപ്പോഴാണ് സംഭവമുണ്ടായതെന്നാണ് ഉത്തർപ്രദേശിലെ ഗൊരഖ്പുരിൽ നിന്നുള്ള യുവതിയുടെ പരാതി.
2023ൽ നടന്ന സംഭവത്തിലാണ് ഇപ്പോൾ പൊലീസ് കേസ് രജിസ്റ്റർ ചെയ്തിരിക്കുന്നത്. ഡൽഹി നിവാസിയായ നിഖിൽ മിശ്രയ്ക്കെതിരെയാണ് പരാതി.
ഹണിമൂണിനിടെ മർദനം നടന്നെന്ന് പരാതി
ആർത്തവം ഉണ്ടായതിനെ തുടർന്ന് ഭർത്താവ് തന്നെ മർദിക്കുകയും ശ്വാസംമുട്ടിച്ച് കൊല്ലാൻ ശ്രമിക്കുകയും ചെയ്തെന്നാണ് യുവതി പരാതിയിൽ ആരോപിക്കുന്നത്. നിലവിളി കേട്ട് ഹോട്ടൽ ജീവനക്കാർ എത്തിയതോടെയാണ് രക്ഷപ്പെട്ടതെന്നും യുവതി പറയുന്നു.
സംഭവത്തിന് പിന്നാലെ താൻ അനുഭവിച്ച കാര്യങ്ങൾ ഭർത്താവിന്റെ കുടുംബാംഗങ്ങളോട് പറഞ്ഞെങ്കിലും അവരിൽനിന്നും മാനസിക പീഡനം നേരിട്ടെന്നും പരാതിയിൽ പറയുന്നു.
More Read
കുടുംബ വഴക്കിന് പിന്നാലെ വേർപിരിഞ്ഞ് താമസം
കുടുംബ വഴക്കിനെ തുടർന്ന് ദമ്പതികൾ നിലവിൽ വേർപിരിഞ്ഞാണ് താമസിക്കുന്നത്. ഇരുകുടുംബങ്ങളും തമ്മിൽ നടത്തിയ മധ്യസ്ഥ ശ്രമങ്ങൾ പരാജയപ്പെട്ടതോടെയാണ് യുവതി പൊലീസിനെ സമീപിച്ചത്.
ഭർത്താവിന്റെ അമ്മയ്ക്കും സഹോദരിമാർക്കുമെതിരെയും യുവതി പരാതി നൽകിയിട്ടുണ്ട്. പരാതിയുടെ അടിസ്ഥാനത്തിൽ പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.
More Read
സ്ത്രീധനം കുറഞ്ഞെന്ന് പരിഹസിച്ചെന്നും ആരോപണം
വിവാഹ സമയത്ത് പിതാവ് 20 ലക്ഷം രൂപയും 40 ലക്ഷം രൂപ വിലമതിക്കുന്ന പാരിതോഷികങ്ങളും നൽകിയിരുന്നുവെന്ന് യുവതി പരാതിയിൽ പറയുന്നു. എന്നാൽ സ്ത്രീധനം കുറഞ്ഞെന്ന് ആരോപിച്ച് ഭർത്താവിന്റെ വീട്ടുകാർ പരിഹസിച്ചെന്നും യുവതി ആരോപിച്ചു.
ആൻഡമാനിൽനിന്ന് മടങ്ങിയെത്തിയ ശേഷം നടന്ന സംഭവങ്ങൾ ഭർത്താവിന്റെ വീട്ടുകാരോട് പറഞ്ഞപ്പോഴും മാനസികമായി പീഡിപ്പിച്ചെന്നാണ് പരാതിയിലെ ആരോപണം.
വിവാഹം കഴിഞ്ഞ് 45 ദിവസത്തിന് പിന്നാലെ
വിവാഹം കഴിഞ്ഞ് 45 ദിവസത്തിന് ശേഷം പിതാവിനെ വിളിച്ച് മകളെ തിരികെ കൊണ്ടുപോകാൻ ഭർത്താവിന്റെ വീട്ടുകാർ ആവശ്യപ്പെട്ടതായും യുവതി പരാതിയിൽ പറയുന്നു.
അതേസമയം, 2023ൽ നടന്ന സംഭവവുമായി ബന്ധപ്പെട്ട് ഇപ്പോഴാണ് പരാതി ലഭിച്ചതെന്നും കുടുംബങ്ങൾ തമ്മിലുള്ള മധ്യസ്ഥ ശ്രമങ്ങൾ പരാജയപ്പെട്ടതിനെ തുടർന്നാണ് യുവതി നിയമനടപടിയിലേക്ക് നീങ്ങിയതെന്നും പൊലീസ് അറിയിച്ചു.
