രാജ്യത്തെ മുൻനിര സംരംഭങ്ങളെക്കുറിച്ച് കേന്ദ്ര ധനമന്ത്രി നിർമല സീതാരാമൻ സംസാരിക്കുന്ന തരത്തിലുള്ള വ്യാജ വിഡിയോകൾ സമൂഹ മാധ്യമങ്ങളിലൂടെ പ്രചരിപ്പിച്ച് സംസ്ഥാനത്ത് വൻ ഓൺലൈൻ നിക്ഷേപ തട്ടിപ്പ് നടക്കുന്നു. കേന്ദ്രമന്ത്രിമാർ നേരിട്ട് നിർദേശിക്കുന്ന മികച്ച സംരംഭങ്ങളിൽ പണം നിക്ഷേപിച്ചാൽ നിക്ഷേപ തുക ചുരുങ്ങിയ കാലം കൊണ്ട് ഇരട്ടിയായി മടക്കിക്കിട്ടുമെന്ന വ്യാജ സോഷ്യൽ മീഡിയ പരസ്യങ്ങളാണ് തട്ടിപ്പുകാർ ഇതിനായി പ്രധാനമായും ഉപയോഗിക്കുന്നത്.
പരസ്യത്തിനൊപ്പമുള്ള ലിങ്കിൽ ക്ലിക്ക് ചെയ്യുന്നവരെ പിന്നീട് ഒരു പ്രത്യേക അക്കൗണ്ടുകൾ ആരംഭിച്ച് അതിലേക്ക് പണം നിക്ഷേപിക്കാൻ പ്രേരിപ്പിക്കുന്നതാണ് ഇവരുടെ പ്രവർത്തന രീതി. പത്തനംതിട്ട ജില്ലയിലെ കുമ്പനാട് സ്വദേശികളായ രണ്ടുപേർക്ക് മാത്രമായി ഏകദേശം 1.02 കോടി രൂപയാണ് ഇത്തരത്തിൽ അടുത്തിടെ നഷ്ടമായത്. സംഭവത്തിൽ പത്തനംതിട്ട സൈബർ പോലീസ് നിലവിൽ കേസ് രജിസ്റ്റർ ചെയ്ത് ഊർജിതമായ അന്വേഷണം ആരംഭിച്ചിട്ടുണ്ട്.
ഉന്നത സർക്കാർ ജോലിയിൽ നിന്നും വിരമിച്ച കുമ്പനാട് സ്വദേശികളായ ദമ്പതികൾക്കാണ് ഈ തട്ടിപ്പിലൂടെ മാത്രം 87 ലക്ഷം രൂപയോളം നഷ്ടമായത്. പല തവണകളായി 44 ലക്ഷം രൂപയും, തുടർന്ന് കഴിഞ്ഞ മാർച്ചിൽ 43 ലക്ഷം രൂപയും ഇവർ തട്ടിപ്പുകാരുടെ നിർദേശപ്രകാരം വിവിധ അക്കൗണ്ടുകളിലേക്ക് കൈമാറുകയായിരുന്നു.
തമിഴ്നാട്ടിൽ നടന്ന മറ്റൊരു ഓൺലൈൻ തട്ടിപ്പ് കേസ് അന്വേഷിക്കുന്നതിനിടയിൽ അവിടുത്തെ ക്യു ബ്രാഞ്ച് പോലീസാണ് ഈ പ്രത്യേക അക്കൗണ്ടിലേക്ക് കേരളത്തിൽ നിന്ന് വൻതുക എത്തിയതായി അപ്രതീക്ഷിതമായി കണ്ടെത്തിയത്. തുടർന്ന് തമിഴ്നാട് പോലീസ് ഈ വിവരം ഇവിടെ അറിയിച്ചപ്പോഴാണ് തങ്ങൾ വലിയൊരു ചതിക്കപ്പെടലിൽ ആണ് അകപ്പെട്ടിരിക്കുന്നത് എന്ന വിവരം ദമ്പതികൾ പോലും തിരിച്ചറിയുന്നത്.
മറ്റൊരു സമാന സംഭവത്തിൽ കുമ്പനാട് സ്വദേശികളായ പ്രായമായ ദമ്പതികൾക്ക് 15 ലക്ഷം രൂപയോളം നഷ്ടപ്പെടുകയുണ്ടായി. തുടർന്ന് ഇവരിൽ നിന്നും 50 ലക്ഷം രൂപ കൂടി തട്ടിപ്പ് സംഘം ആവശ്യപ്പെടുകയും ഈ തുക പിൻവലിക്കാൻ ദമ്പതികൾ ഫെഡറൽ ബാങ്കിന്റെ കുമ്പനാട് ശാഖയിലെത്തുകയും ചെയ്തു.
More Read
വെല്ലൂർ മെഡിക്കൽ കോളജിൽ അടിയന്തരമായി വൃക്ക മാറ്റിവയ്ക്കൽ ശസ്ത്രക്രിയയ്ക്ക് പണം ആവശ്യമുണ്ടെന്ന് ബാങ്കിൽ പറയാനായിരുന്നു തട്ടിപ്പുകാർ ഇവർക്ക് നൽകിയിരുന്ന രഹസ്യ നിർദേശം.
എന്നാൽ ഇവരുടെ വലിയ ഇടപാടിൽ സംശയം തോന്നിയ ബാങ്ക് സീനിയർ മാനേജർ ജയ്മേരി എം. വർഗീസ് നടത്തിയ വിശദമായ പരിശോധനയിൽ പണം പോകേണ്ട അക്കൗണ്ടുകൾ രാജസ്ഥാനിലെ ഒരു ഡിജിറ്റൽ സ്റ്റുഡിയോയുടെയും സ്മോൾ ഫിനാൻസ് ബാങ്കിന്റെയുമാണെന്ന് കണ്ടെത്തുകയായിരുന്നു. തുടർന്ന് ബാങ്ക് അധികൃതർ ഉടൻ തന്നെ പോലീസിനെ വിവരമറിയിച്ചതിനാലാണ് കൂടുതൽ തുക നഷ്ടപ്പെടാതെ വൃദ്ധദമ്പതികൾ രക്ഷപ്പെട്ടത്.
പണം നിക്ഷേപിച്ചു കഴിയുന്നതോടെ ഇരകളെ മാനസികമായി ഭയപ്പെടുത്തുന്ന തന്ത്രമാണ് തട്ടിപ്പുകാർ പിന്നീട് പയറ്റുന്നത്. നിക്ഷേപത്തിന്റെ സ്രോതസ്സിനെക്കുറിച്ച് ഇ.ഡി, സിബിഐ തുടങ്ങിയ കേന്ദ്ര അന്വേഷണ ഏജൻസികൾ അന്വേഷിക്കുന്നുണ്ടെന്നും, കേസിൽ നിന്നും ഒഴുവാക്കാൻ കൂടുതൽ പണം വേണമെന്നും ഇവർ ഭീഷണിപ്പെടുത്തും.
More Read
ഈ വിവരം വീട്ടുകാരോ ബാങ്കുകാരോ അറിയരുതെന്ന് കർശനമായി വിലക്കുകയും ചെയ്യും. വലിയ തുകകൾ പിൻവലിക്കുമ്പോൾ ബാങ്കുകാർക്ക് സംശയം തോന്നാതിരിക്കാൻ ആശുപത്രി ശസ്ത്രക്രിയ, വീട് നിർമാണം തുടങ്ങിയ കാരണങ്ങൾ പറയാനും തട്ടിപ്പുകാർ ഇരകളെ മുൻകൂട്ടി പഠിപ്പിച്ചിരുന്നു.
ഇംഗ്ലീഷിലും ഹിന്ദിയിലും സംസാരിക്കുന്ന ഉത്തരേന്ത്യൻ കേന്ദ്രീകൃത സംഘങ്ങളാണ് ഈ തട്ടിപ്പിന് പിന്നിലെന്നാണ് പോലീസിന്റെ പ്രാഥമിക നിഗമനം. കോയിപ്രം എസ്.ഐ ആർ. രാജീവ്, സൈബർ സ്റ്റേഷൻ എസ്.ഐ ആർ. നിതിൻ എന്നിവരുടെ നേതൃത്വത്തിലാണ് അന്വേഷണം പുരോഗമിക്കുന്നത്.
English Summary
A major online investment scam has been reported in Pathanamthitta using fake videos of Union Minister Nirmala Sitharaman. Two residents lost over ₹1.02 crore. Bank officials’ timely intervention saved an elderly couple from losing an additional ₹50 lakh. Cyber police suspect a North Indian gang is behind the fraud.
