CMRL മാസപ്പടി കേസ്; വിദേശ പണമിടപാടിൽ കൂടുതൽ തെളിവുകൾ തേടി ഇ.ഡി

തിരുവനന്തപുരം: CMRL മാസപ്പടി കേസ് അന്വേഷണത്തിൽ വിദേശത്തെ പണമിടപാടുകളുടെ കൂടുതൽ വിവരങ്ങൾ ശേഖരിക്കാൻ എൻഫോഴ്‌സ്‌മെന്റ് ഡയറക്ടറേറ്റ് (ഇ.ഡി) നീക്കം തുടങ്ങി. കൈക്കൂലിയായി ലഭിച്ച പണം ദുബായിലേക്ക് അയച്ചെന്നാണ് ഇ.ഡിയുടെ കണ്ടെത്തലെന്ന് റിപ്പോർട്ട്.

ഇതിന്റെ അടിസ്ഥാനത്തിൽ കോടതി വഴി ലെറ്റർ റൊഗേറ്ററി (എൽആർ) അയച്ച് വിദേശത്തുനിന്ന് തെളിവുകൾ ശേഖരിക്കാനാണ് ഇ.ഡി നീക്കം. ഇതിനായി അടുത്തുതന്നെ കോടതിയെ സമീപിക്കുമെന്നാണ് വിവരം.

CMRL മാസപ്പടി കേസിൽ ദുബായ് ഇടപാടുകൾ അന്വേഷിക്കും

കേരളത്തിൽനിന്ന് വിദേശത്തെ ഏതൊക്കെ അക്കൗണ്ടുകളിലേക്കാണ് പണം എത്തിയതെന്നതിന്റെ ചില സൂചനകൾ ഇ.ഡി ശേഖരിച്ചിട്ടുണ്ട്. ഇതുമായി ബന്ധപ്പെട്ട കൂടുതൽ വിവരങ്ങളും രേഖകളും ലഭ്യമാക്കുന്നതിനാണ് കോടതി വഴി എൽആർ അയയ്ക്കുന്നത്.

മറ്റൊരു രാജ്യത്തെ അധികൃതരിൽനിന്ന് ഔദ്യോഗികമായി വിവരങ്ങളും തെളിവുകളും ശേഖരിക്കുന്നതിനുള്ള നടപടിയാണ് ലെറ്റർ റൊഗേറ്ററി. ഒരു രാജ്യത്തെ കോടതി മറ്റൊരു രാജ്യത്തെ കോടതിയിലേക്ക് ഔദ്യോഗികമായി അയയ്ക്കുന്ന കത്താണിത്.

കോടതി അനുമതിയോടെ വിദേശത്തുനിന്ന് തെളിവുകൾ

അന്വേഷണ ഉദ്യോഗസ്ഥന്റെ അപേക്ഷയുടെ അടിസ്ഥാനത്തിൽ ഭാരതീയ ന്യായ സംഹിതയുടെ (ബിഎൻഎസ്) 112-ാം വകുപ്പ് പ്രകാരമാണ് എൽആർ അയയ്ക്കുന്നതിനുള്ള നടപടികൾ സ്വീകരിക്കുന്നത്.

ജഡ്ജിയുടെ അംഗീകാരം ലഭിച്ചശേഷം ആഭ്യന്തര, വിദേശകാര്യ വകുപ്പുകൾ മുഖേനയാണ് കത്ത് കൈമാറുക. ഇത്തരത്തിൽ ശേഖരിക്കുന്ന വിവരങ്ങൾ വിചാരണ ഘട്ടത്തിൽ തെളിവായി പരിഗണിക്കപ്പെടും.

വിവരശേഖരണത്തിനായി സ്വീകരിച്ച നടപടികളെ പ്രതിഭാഗം പിന്നീട് ചോദ്യം ചെയ്യാനുള്ള സാധ്യത ഒഴിവാക്കുന്നതിനാണ് കോടതി വഴി എൽആർ അയയ്ക്കുന്നതെന്നും റിപ്പോർട്ടുണ്ട്.

ലളിത് മോഡി കേസിലും എൽആർ അയച്ചിരുന്നു

എൽആർ അയയ്ക്കുന്ന ഘട്ടത്തിൽ കുറ്റാരോപിതർക്ക് കോടതി ഉത്തരവിനെ ചോദ്യം ചെയ്യാനും കഴിയില്ല. നേരത്തെയും സമാനമായ രീതിയിൽ അന്വേഷണ ഏജൻസികൾ വിദേശരാജ്യങ്ങളിൽനിന്ന് വിവരങ്ങൾ ശേഖരിച്ചിട്ടുണ്ട്.

ലളിത് മോഡി കേസിൽ ഇ.ഡി യുഎഇ ഉൾപ്പെടെയുള്ള രാജ്യങ്ങളിലേക്കും പഹൽഗാം ഭീകരാക്രമണക്കേസിൽ എൻഐഎ ചൈനയിലേക്കും കോടതി വഴി എൽആർ അയച്ച് വിവരശേഖരണം നടത്തിയിരുന്നു.

3.28 കോടി കൈക്കൂലി വാങ്ങിയെന്ന് ഇ.ഡി

CMRL മാസപ്പടി കേസിൽ പിണറായി വിജയനും മകൾ വീണയും വഴി 3.28 കോടി രൂപ കൈക്കൂലിയായി വാങ്ങിയെന്നാണ് ഇ.ഡി കഴിഞ്ഞ ദിവസം സംസ്ഥാന പൊലീസ് മേധാവിക്ക് നൽകിയ റിപ്പോർട്ടിൽ പറഞ്ഞത്.

ഇതിന് പുറമെ 20.5 കോടി രൂപയുടെ പണമിടപാടിന്റെ രേഖകൾ വീണയുടെ പക്കൽനിന്ന് ലഭിച്ചെന്നും ഇ.ഡി അവകാശപ്പെടുന്നു.

ഈ പണം ദുബായിൽ കമ്പനി സ്ഥാപിക്കാനും ബിസിനസ് നടത്താനും മറ്റുമായി വിദേശത്തേക്ക് കടത്തിയെന്ന മൊഴി ലഭിച്ചതായും ഇ.ഡി വ്യക്തമാക്കിയിട്ടുണ്ട്. ഇതിന്റെ തുടർച്ചയായാണ് വിദേശ പണമിടപാടുകളുടെ കൂടുതൽ വിവരങ്ങൾ തേടി കോടതി വഴി ലെറ്റർ റൊഗേറ്ററി അയയ്ക്കാനുള്ള നീക്കം.

English Summary:

The Enforcement Directorate is moving to gather more details about overseas financial transactions in the CMRL monthly payment case. The agency reportedly suspects that money allegedly received as bribes was transferred to Dubai.