ന്യൂഡൽഹി: അയോധ്യയിലെ ശ്രീരാമക്ഷേത്രത്തിലെ പ്രസാദമെന്ന പേരിൽ സാധാരണ പലഹാരങ്ങൾ ഓൺലൈനിൽ വിൽപ്പനയ്ക്ക് എത്തിച്ച സംഭവത്തിൽ ഇ-കൊമേഴ്സ് ഭീമൻ ആമസോണിന് ഒരു ലക്ഷം രൂപ പിഴ. ക്ഷേത്രത്തിന്റെ പേരും ‘പ്രസാദം’ എന്ന വിശേഷണവും ഉപയോഗിക്കാൻ ഔദ്യോഗിക അനുമതി ഉണ്ടായിരുന്നില്ലെന്ന് കണ്ടെത്തിയതിനെ തുടർന്നാണ് കേന്ദ്ര ഉപഭോക്തൃ സംരക്ഷണ അതോറിറ്റി (CCPA) നടപടി സ്വീകരിച്ചത്.
‘ശ്രീരാമ മന്ദിർ പ്രസാദം’ എന്ന പേരിൽ ലഡ്ഡു വിൽപ്പന
ചന്ദു ട്രേഡിങ് കമ്പനി ‘ബിഹാരി ബ്രദേഴ്സ്’ ബ്രാൻഡിൽ വിൽപ്പന നടത്തിയിരുന്ന നെയ്യ് ലഡ്ഡു, ഖോയ ലഡ്ഡു, ബൂന്ദി ലഡ്ഡു, പശുവിൻപാൽ പേട എന്നിവയാണ് ആമസോണിൽ ‘Shri Ram Mandir Ayodhya Prasad’ എന്ന പേരിലും വിവരണത്തിലും ലിസ്റ്റ് ചെയ്തിരുന്നത്.
ഉൽപ്പന്നങ്ങളുടെ ലേബലുകളിലും ‘ഭഗവാൻ ശ്രീരാമന്റെ അനുഗ്രഹം’ എന്ന തരത്തിലുള്ള പരാമർശങ്ങൾ ഉണ്ടായിരുന്നതായി CCPA വ്യക്തമാക്കി.
ക്ഷേത്ര ട്രസ്റ്റിന്റെ അനുമതിയില്ലെന്ന് കണ്ടെത്തൽ
ശ്രീരാമ ജന്മഭൂമി തീർഥ ക്ഷേത്ര ട്രസ്റ്റിൽനിന്ന് ഉൽപ്പന്നങ്ങൾക്ക് ഔദ്യോഗിക അനുമതിയോ അംഗീകാരമോ ലഭിച്ചിരുന്നില്ലെന്നാണ് CCPAയുടെ കണ്ടെത്തൽ. ക്ഷേത്രത്തിന്റെ പേര് ഉപയോഗിച്ച് ഉൽപ്പന്നങ്ങളെ യഥാർഥ പ്രസാദമെന്ന രീതിയിൽ വിപണനം ചെയ്തതിനാണ് നടപടി.
2024 ജനുവരിയിൽ കോൺഫെഡറേഷൻ ഓഫ് ഓൾ ഇന്ത്യ ട്രേഡേഴ്സ് (CAIT) നൽകിയ പരാതിയുടെ അടിസ്ഥാനത്തിലാണ് CCPA അന്വേഷണം നടത്തിയത്.
More Read
10 പ്രമുഖ മതസ്ഥാപനങ്ങളുടെ പേരിലും നിയന്ത്രണം
ഇത്തരം നടപടി അയോധ്യ രാമക്ഷേത്രത്തിൽ മാത്രം പരിമിതപ്പെടുത്തിയിട്ടില്ല. 10 പ്രമുഖ മതസ്ഥാപനങ്ങളുടെ പേരിൽ ‘പ്രസാദം’, ‘മഹാപ്രസാദം’, ‘ഭോഗ്’ തുടങ്ങിയ പദങ്ങൾ ഉപയോഗിച്ച് ഉൽപ്പന്നങ്ങൾ ലിസ്റ്റ് ചെയ്യുന്നത് തടയാനും ആമസോണിന് CCPA നിർദേശം നൽകി.
ബന്ധപ്പെട്ട മതസ്ഥാപനത്തിൽനിന്നുള്ള സാക്ഷ്യപ്പെടുത്തിയ അനുമതിയില്ലാതെ ഇത്തരം ഉൽപ്പന്നങ്ങൾ ലിസ്റ്റ് ചെയ്യാൻ അനുവദിക്കരുതെന്നാണ് നിർദേശം. രാമജന്മഭൂമി, തിരുപ്പതി ദേവസ്ഥാനം, മാതാ വൈഷ്ണോ ദേവി, ജഗന്നാഥ ക്ഷേത്രം തുടങ്ങിയ പ്രമുഖ തീർഥാടന കേന്ദ്രങ്ങളും ഇതിന്റെ പരിധിയിൽ ഉൾപ്പെടുന്നു.
ആമസോണിന്റെ വാദം തള്ളി CCPA
വിൽപ്പനക്കാരനും ഉപഭോക്താവിനും ഇടയിലെ ഇടനിലക്കാരൻ മാത്രമാണ് തങ്ങളെന്ന ആമസോണിന്റെ വാദവും CCPA തള്ളി. പ്ലാറ്റ്ഫോമിൽ ലിസ്റ്റ് ചെയ്യുന്ന ഉൽപ്പന്നങ്ങൾ ഉപഭോക്താക്കൾക്ക് എങ്ങനെയാണ് അവതരിപ്പിക്കപ്പെടുന്നതെന്ന കാര്യത്തിൽ ഇ-കൊമേഴ്സ് പ്ലാറ്റ്ഫോമുകൾക്ക് ഉത്തരവാദിത്തമുണ്ടെന്ന് അതോറിറ്റി വ്യക്തമാക്കി.
More Read
വിൽപ്പനക്കാരുടെ പൂർണ വിവരങ്ങളും പ്ലാറ്റ്ഫോമിലെ ഗ്രീവൻസ് ഓഫീസറുടെ വിവരങ്ങളും വ്യക്തമായി ലഭ്യമാക്കണമെന്നും CCPA നിർദേശിച്ചു.
15 ദിവസത്തിനകം ഒരു ലക്ഷം രൂപ പിഴ അടയ്ക്കാനും ആമസോണിനോട് ആവശ്യപ്പെട്ടിട്ടുണ്ട്. ഇനി പ്രമുഖ ക്ഷേത്രങ്ങളുടെയും മതസ്ഥാപനങ്ങളുടെയും പേരിൽ ‘പ്രസാദം’, ‘മഹാപ്രസാദം’, ‘ഭോഗ്’ തുടങ്ങിയ പേരുകളിൽ ഉൽപ്പന്നങ്ങൾ വിപണനം ചെയ്യണമെങ്കിൽ ബന്ധപ്പെട്ട സ്ഥാപനത്തിന്റെ സാക്ഷ്യപ്പെടുത്തിയ അനുമതി ആവശ്യമായി വരും.
