ഇമിഗ്രേഷൻ ക്ലിയറൻസ് ഇല്ലാതെ മൂന്ന് ഇറ്റലിക്കാർ മ്യൂണിക്കിലേക്ക്: എയർ ഇന്ത്യക്ക് ഗുരുതര വീഴ്ച

ന്യൂഡൽഹി: ഇമിഗ്രേഷൻ ക്ലിയറൻസ് പൂർത്തിയാക്കാതെ മൂന്ന് ഇറ്റാലിയൻ പൗരന്മാർ ഡൽഹിയിൽനിന്ന് മ്യൂണിക്കിലേക്ക് യാത്ര ചെയ്ത സംഭവത്തിൽ എയർ ഇന്ത്യക്ക് കാരണം കാണിക്കൽ നോട്ടീസ്. പാസഞ്ചർ ഹാൻഡ്ലിങ് സംവിധാനത്തിലുണ്ടായ ഗുരുതര വീഴ്ചയായി കണക്കാക്കിയാണ് കേന്ദ്ര സിവിൽ വ്യോമയാന മന്ത്രാലയം വിശദീകരണം തേടിയത്. ഏഴ് ദിവസത്തിനകം മറുപടി നൽകണം.

സംഭവം നടന്നത് ഇങ്ങനെ

സെപ്റ്റംബർ നാലിന് പുലർച്ചെയാണ് സംഭവം നടന്നത്. അമൃത്സറിൽനിന്നുള്ള എയർ ഇന്ത്യയുടെ എഐ-1115 വിമാനത്തിൽ പുലർച്ചെ 12.50ഓടെ മൂന്ന് ഇറ്റാലിയൻ പൗരന്മാർ ഡൽഹിയിലെത്തി.

തുടർന്ന് പുലർച്ചെ 1.45ഓടെ ലുഫ്താൻസയുടെ എൽഎച്ച്-763 വിമാനത്തിൽ ഇവർ മ്യൂണിക്കിലേക്ക് യാത്ര ചെയ്തു. എന്നാൽ, ഇന്ത്യ വിടുന്നതിന് മുമ്പ് നിർബന്ധമായ ഇമിഗ്രേഷൻ പരിശോധനയ്ക്ക് ഇവർ ഹാജരായിരുന്നില്ല.

അമൃത്സറിൽനിന്നുതന്നെ രണ്ട് ബോർഡിങ് പാസുകൾ

അന്താരാഷ്ട്ര യാത്രക്കാരെ ചെറിയ വിമാനത്താവളങ്ങളിൽനിന്ന് പ്രധാന വിമാനത്താവളങ്ങളിലേക്ക് എത്തിക്കുന്ന എയർ ഇന്ത്യയുടെ ഹബ് ആൻഡ് സ്പോക്ക് സംവിധാനത്തിലൂടെയാണ് ഇവർ അമൃത്സറിൽനിന്ന് ഡൽഹിയിലെത്തിയത്.

ഇവർക്കായി അമൃത്സറിൽനിന്ന് ഡൽഹിയിലേക്കുള്ള ആഭ്യന്തര ബോർഡിങ് പാസിനൊപ്പം മ്യൂണിക്കിലേക്കുള്ള ലുഫ്താൻസ വിമാനത്തിന്റെ ബോർഡിങ് പാസും നൽകിയിരുന്നു.

ബോർഡിങ് പാസ് നടപടിയിലും വീഴ്ച

എയർ ഇന്ത്യയുടെ സ്റ്റാൻഡേർഡ് ഓപ്പറേറ്റിങ് പ്രൊസീജർ പ്രകാരം ആഭ്യന്തര യാത്രക്കാർക്ക് ഡി ബോർഡിങ് പാസും അന്താരാഷ്ട്ര യാത്രക്കാർക്ക് ഐ ബോർഡിങ് പാസുമാണ് അനുവദിക്കേണ്ടത്.

അതേസമയം, മൂന്ന് ഇറ്റാലിയൻ പൗരന്മാർക്ക് അധികമായി മ്യൂണിക്കിലേക്കുള്ള ബോർഡിങ് പാസ് നൽകിയത് എന്തുകൊണ്ടാണെന്ന് കേന്ദ്രം നോട്ടീസിൽ ചോദിച്ചു.

ആഭ്യന്തര യാത്രക്കാരുടെ പാതയിലൂടെ മാറ്റിയില്ല

ഡൽഹിയിലെത്തിയ ശേഷം യാത്രക്കാരെ ആഭ്യന്തര യാത്രക്കാരുടെ വിഭാഗത്തിൽനിന്ന് മാറ്റി ഇമിഗ്രേഷൻ പരിശോധനയ്ക്കായി എത്തിക്കേണ്ടതായിരുന്നു.

എന്നാൽ, ഇവരെ 39-ാം ഗേറ്റിൽനിന്ന് നേരിട്ട് ഇന്റർനാഷണൽ ടു ഇന്റർനാഷണൽ ട്രാൻസ്ഫർ മേഖലയിലേക്ക് കൊണ്ടുപോയെന്നാണ് വ്യോമയാന മന്ത്രാലയത്തിന്റെ കണ്ടെത്തൽ.

അഞ്ച് എസ്ഒപികൾ ലംഘിച്ചെന്ന് കേന്ദ്രം

എയർ ഇന്ത്യയുടെ ആഭ്യന്തര-അന്താരാഷ്ട്ര സർവീസുകളിൽ പാലിക്കേണ്ട അഞ്ച് എസ്ഒപികൾ ലംഘിച്ചതായി വ്യോമയാന വകുപ്പ് ചൂണ്ടിക്കാട്ടുന്നു.

ബോർഡിങ് പാസുകൾ അനുവദിച്ചതിലെ ക്രമക്കേട്, ഡൽഹിയിലെത്തിയ യാത്രക്കാരെ ആഭ്യന്തര-അന്താരാഷ്ട്ര വിഭാഗങ്ങളായി വേർതിരിക്കാതിരുന്നത് എന്നിവ ഇതിൽ ഉൾപ്പെടുന്നു.

അന്താരാഷ്ട്ര യാത്രക്കാർക്ക് മാത്രമേ ഇന്റർനാഷണൽ ടു ഇന്റർനാഷണൽ ട്രാൻസ്ഫർ ഡെസ്കിലേക്ക് പോകാൻ അനുമതിയുള്ളൂ. എന്നാൽ, മൂന്ന് യാത്രക്കാരുടെയും കൈവശമുണ്ടായിരുന്നത് ഡി വിഭാഗത്തിലുള്ള പാസുകളായിരുന്നു.

നോഡൽ ഓഫീസറുടെ ചുമതലയിലും വീഴ്ച

യാത്രക്കാരെ നിരീക്ഷിക്കുന്നതിനായി നോഡൽ ഓഫീസറെയും ആവശ്യമായ ഉദ്യോഗസ്ഥ സംഘത്തെയും വിന്യസിക്കുന്നതുമായി ബന്ധപ്പെട്ട എസ്ഒപികളിലും വീഴ്ച സംഭവിച്ചതായി മന്ത്രാലയം വ്യക്തമാക്കി.

ഇതോടെ ഇമിഗ്രേഷൻ പരിശോധനയ്ക്ക് വിധേയരാകാതെയാണ് മൂന്ന് ഇറ്റാലിയൻ പൗരന്മാർ ഡൽഹിയിൽനിന്ന് ലുഫ്താൻസ വിമാനത്തിൽ കയറി മ്യൂണിക്കിലേക്ക് പോയത്.സംഭവത്തിൽ കേന്ദ്ര സിവിൽ വ്യോമയാന മന്ത്രാലയം എയർ ഇന്ത്യയോട് റിപ്പോർട്ട് തേടിയിട്ടുണ്ട്. കാരണം കാണിക്കൽ നോട്ടീസിന് ഏഴ് ദിവസത്തിനകം മറുപടി നൽകണമെന്നാണ് നിർദേശം.

English summary:India’s Civil Aviation Ministry has issued a show-cause notice to Air India after three Italian nationals travelled from Delhi to Munich without undergoing immigration clearance. The passengers arrived in Delhi from Amritsar on Air India flight AI-1115 and later boarded Lufthansa flight LH-763. The ministry cited multiple violations of Air India’s standard operating procedures, including boarding-pass handling, passenger segregation and transfer procedures. Air India has been asked to respond to the notice within seven days.