സ്വർണ ഖനനത്തിന് പുതിയ ബ്ലൂപ്രിന്റുമായി കേന്ദ്രം
ന്യൂഡൽഹി: രാജ്യത്തെ സ്വർണ ഇറക്കുമതിയുടെ ആശ്രിതത്വം കുറയ്ക്കുന്നതിനായി ആഭ്യന്തര ഖനനം ശക്തമാക്കാൻ നീതി ആയോഗ് ഒരുങ്ങുന്നു. ഇതിന്റെ ഭാഗമായി സ്വർണഖനന മേഖലയ്ക്കായി പുതിയ ബ്ലൂപ്രിന്റ് അവതരിപ്പിക്കാനാണ് നീക്കം. ഖനന കമ്പനികൾക്ക് കൂടുതൽ പ്രോത്സാഹനങ്ങൾ നൽകുന്നതിനൊപ്പം നിലവിലുള്ള ചട്ടങ്ങളിൽ മാറ്റം വരുത്തുന്നതും പദ്ധതിയുടെ ഭാഗമാണ്.
ഇന്ത്യയുടെ സ്വർണവിപണിയിൽ കൂടുതൽ സുസ്ഥിരമായ വികസനം ഉറപ്പാക്കുകയാണ് കേന്ദ്രസർക്കാരിന്റെ ലക്ഷ്യം. സ്വർണം ഇറക്കുമതി ചെയ്യുന്നതിനായി വലിയ തുക വിദേശത്തേക്ക് ചെലവഴിക്കേണ്ട സാഹചര്യം കുറയ്ക്കാൻ രാജ്യത്തിനകത്തുള്ള സ്വർണശേഖരം പരമാവധി പ്രയോജനപ്പെടുത്തണമെന്നാണ് വിലയിരുത്തൽ.
രാജ്യത്ത് 600 ടൺ സ്വർണശേഖരമുണ്ടെന്ന് കണക്ക്
വിവിധ സംസ്ഥാനങ്ങളിലായി ഏകദേശം 600 ടൺ സ്വർണം മണ്ണിനടിയിൽ ശേഖരിക്കപ്പെട്ടിട്ടുണ്ടെന്നാണ് റിപ്പോർട്ടിൽ പറയുന്നത്. ഇതിൽ ഏറ്റവും വലിയ വിഹിതം ബിഹാറിലാണ്. രാജ്യത്തെ ആകെ സ്വർണശേഖരത്തിന്റെ 45 ശതമാനവും ബിഹാറിലാണെന്നാണ് കണക്ക്. രാജസ്ഥാനിൽ 25 ശതമാനവും കർണാടകയിൽ 21 ശതമാനവും സ്വർണശേഖരമുണ്ട്.
പശ്ചിമ ബംഗാളിൽ മൂന്ന് ശതമാനവും ആന്ധ്രപ്രദേശിലും ഝാർഖണ്ഡിലും രണ്ട് ശതമാനം വീതവും സ്വർണശേഖരമുണ്ടെന്നാണ് കണക്കുകൾ വ്യക്തമാക്കുന്നത്. ഈ ശേഖരങ്ങൾ ഫലപ്രദമായി ഉപയോഗപ്പെടുത്താൻ കഴിഞ്ഞാൽ ആഭ്യന്തര സ്വർണ ഉൽപാദനത്തിൽ വലിയ വർധനവുണ്ടാക്കാൻ സാധിക്കുമെന്നാണ് പ്രതീക്ഷ.
എന്നാൽ മണ്ണിനടിയിലുള്ള സ്വർണശേഖരം മുഴുവൻ ഖനനം ചെയ്ത് വിപണിയിലെത്തിക്കാൻ കഴിയണമെന്നില്ല. ഖനനത്തിന്റെ സാമ്പത്തിക ലാഭക്ഷമത, സാങ്കേതിക സൗകര്യങ്ങൾ, പരിസ്ഥിതി അനുമതികൾ, അടിസ്ഥാന സൗകര്യങ്ങൾ തുടങ്ങിയ ഘടകങ്ങളും ഉൽപാദനത്തെ സ്വാധീനിക്കും.
ഇറക്കുമതിക്കായി ചെലവഴിക്കുന്നത് വൻ തുക
സ്വർണാഭരണങ്ങളോടുള്ള ഇന്ത്യക്കാരുടെ താൽപര്യം രാജ്യത്തെ സ്വർണവിപണിയെ വലിയതാക്കുന്നുണ്ട്. ആഭ്യന്തര ആവശ്യകത നിറവേറ്റുന്നതിനായി പ്രതിവർഷം ഏകദേശം 800 ടൺ സ്വർണം ഇറക്കുമതി ചെയ്യുന്നുണ്ടെന്നാണ് റിപ്പോർട്ടിൽ പറയുന്നത്. ആഭ്യന്തര ഉൽപാദനം ആവശ്യത്തിന് ഇല്ലാത്തതിനാൽ വിദേശരാജ്യങ്ങളെ ആശ്രയിക്കേണ്ടിവരുന്ന സാഹചര്യമാണുള്ളത്.
സ്വർണവില ഉയരുമ്പോൾ ഇറക്കുമതിക്കായി കൂടുതൽ വിദേശനാണ്യം ചെലവഴിക്കേണ്ടിവരും. ഇത് രാജ്യത്തിന്റെ വ്യാപാരക്കമ്മിയെയും കറന്റ് അക്കൗണ്ട് കമ്മിയെയും പ്രതികൂലമായി ബാധിക്കാനുള്ള സാധ്യതയുണ്ട്. സ്വർണ ഇറക്കുമതിക്കായി വലിയ തുക വിദേശത്തേക്ക് ഒഴുകുന്നത് സമ്പദ്വ്യവസ്ഥയ്ക്ക് വെല്ലുവിളിയാകുന്നതിനാൽ ഇറക്കുമതിയുടെ അളവ് നിയന്ത്രിക്കേണ്ടത് പ്രധാനമാണെന്നാണ് സാമ്പത്തിക വിദഗ്ധരുടെ വിലയിരുത്തൽ.
കമ്പനികൾക്ക് പ്രോത്സാഹനം; ചട്ടങ്ങളിലും മാറ്റം
സ്വർണഖനന മേഖലയിൽ സ്വകാര്യ കമ്പനികളുടെ പങ്കാളിത്തം വർധിപ്പിക്കാനാണ് നീതി ആയോഗിന്റെ പുതിയ പദ്ധതിയിലൂടെ ലക്ഷ്യമിടുന്നത്. ഖനന പ്രവർത്തനങ്ങൾ കൂടുതൽ ആകർഷകമാക്കുന്നതിനായി കമ്പനികൾക്ക് വിവിധ ഇൻസെന്റീവുകൾ നൽകുന്നതും പരിഗണനയിലുണ്ട്. നിലവിലുള്ള നിയമങ്ങളിലും നടപടിക്രമങ്ങളിലും ആവശ്യമായ പരിഷ്കാരങ്ങൾ കൊണ്ടുവരാനും നീക്കമുണ്ട്.
കേന്ദ്രസർക്കാരും സംസ്ഥാന സർക്കാരുകളും സംയുക്തമായിട്ടായിരിക്കും ചട്ടങ്ങൾ പുതുക്കുന്നതിനുള്ള നടപടികൾ സ്വീകരിക്കുക. ഖനനത്തിനായി അനുമതി ലഭിക്കുന്ന നടപടികൾ ലളിതമാക്കുക, നിക്ഷേപം പ്രോത്സാഹിപ്പിക്കുക, സാങ്കേതികവിദ്യയുടെ ഉപയോഗം വർധിപ്പിക്കുക തുടങ്ങിയ കാര്യങ്ങൾ പുതിയ പദ്ധതിയിൽ പരിഗണിക്കപ്പെടുമെന്നാണ് പ്രതീക്ഷ.
തീരുവ വർധനയ്ക്കു പിന്നാലെ ഇറക്കുമതിയിലും കുറവ്
നേരത്തെ മിഡിൽ ഈസ്റ്റിലെ യുദ്ധസാഹചര്യം ശക്തമായതിനെത്തുടർന്ന് സ്വർണ ഇറക്കുമതിയുമായി ബന്ധപ്പെട്ട തീരുവ വർധിപ്പിക്കാൻ കേന്ദ്രസർക്കാർ തീരുമാനിച്ചിരുന്നുവെന്നാണ് റിപ്പോർട്ടിൽ പറയുന്നത്. തീരുവ 15 ശതമാനമായി ഉയർത്തിയതിനു പിന്നാലെ രാജ്യത്തെ സ്വർണ ഇറക്കുമതിയിൽ ഗണ്യമായ കുറവുണ്ടായതായും കണക്കുകൾ സൂചിപ്പിക്കുന്നു.
39.9 ശതമാനത്തിന്റെ കുറവാണ് ഇറക്കുമതിയിൽ രേഖപ്പെടുത്തിയതെന്നാണ് റിപ്പോർട്ടിലുള്ളത്. 41.24 ബില്യൺ ഡോളറായിരുന്ന ഇറക്കുമതിച്ചെലവ് 24.8 ബില്യൺ ഡോളറായി കുറഞ്ഞു. ഇറക്കുമതി നിയന്ത്രിക്കുന്നതിനുള്ള നടപടികൾക്ക് പുറമെ ആഭ്യന്തര ഉൽപാദനം വർധിപ്പിക്കുന്നതും ദീർഘകാല പരിഹാരമായി കേന്ദ്രം കാണുന്നു.
സ്വർണഖനനത്തിന് കൂടുതൽ പ്രാധാന്യം നൽകുന്നതിലൂടെ രാജ്യത്തെ സ്വർണാവശ്യകതയുടെ ഒരു ഭാഗമെങ്കിലും ആഭ്യന്തരമായി നിറവേറ്റാനാകുമെന്നാണ് പ്രതീക്ഷ. പുതിയ ബ്ലൂപ്രിന്റ് നടപ്പിലാകുന്നതോടെ ഖനനമേഖലയിൽ നിക്ഷേപം വർധിക്കുമോ എന്നും സ്വർണ ഇറക്കുമതിയെ ആശ്രയിക്കുന്നതിൽ കുറവുണ്ടാകുമോ എന്നുമാണ് ഇനി അറിയേണ്ടത്.
