മംഗളൂരു: പ്രായപൂർത്തിയാകാത്ത ആൺകുട്ടിയെ ലൈംഗികമായി പീഡിപ്പിച്ചെന്ന കേസിൽ അറസ്റ്റിലായി ജാമ്യത്തിലിറങ്ങിയ പുരോഹിതനെതിരെ വീണ്ടും പോക്‌സോ കേസ്.
വലൻഷ്യ സെയിന്റ് വിൻസന്റ് ഫെറാർ പള്ളിയിലെ മുൻ വികാരി ഫാ. സൈപ്രിയാൻ പിന്റോയ്ക്കെതിരെയാണ് മംഗളൂരു വനിതാ പോലീസ് പുതിയ കേസ് രജിസ്റ്റർ ചെയ്തത്. മറ്റൊരു കുട്ടിയും സമാനമായ രീതിയിൽ പീഡനത്തിനിരയായെന്ന രക്ഷിതാക്കളുടെ പരാതിയിലാണ് നടപടി.
13 വയസ്സുകാരനെ പീഡിപ്പിച്ചെന്ന് പരാതി
ഉള്ളാൾ സെയ്ന്റ് സെബാസ്റ്റ്യൻ പള്ളിയിൽ വികാരിയായി സേവനമനുഷ്ഠിച്ചിരുന്ന കാലത്താണ് സംഭവമെന്നാണ് പുതിയ പരാതിയിൽ പറയുന്നത്. ഞായറാഴ്ച പ്രാർഥനയ്ക്കെത്തിയ 13 വയസ്സുകാരനെ മുറിയിലേക്ക് കൂട്ടിക്കൊണ്ടുപോയി പീഡിപ്പിച്ചെന്നാണ് ആരോപണം.
കുട്ടിയുടെ മാതാപിതാക്കൾ നൽകിയ പരാതിയുടെ അടിസ്ഥാനത്തിലാണ് പോലീസ് കേസെടുത്തത്.
More Read
ആദ്യ കേസിൽ അറസ്റ്റും ജാമ്യവും
ഒക്ടോബർ 18-ന് 14 വയസ്സുകാരനെ പീഡിപ്പിച്ചെന്ന പരാതിയിലാണ് ഫാ. പിന്റോ നേരത്തെ അറസ്റ്റിലായത്. കുട്ടിയുടെ മാതാപിതാക്കൾ മംഗളൂരു സൗത്ത് പോലീസിൽ പരാതി നൽകിയതിനെ തുടർന്നായിരുന്നു നടപടി.
തുടർന്ന് ജയിലിലായിരുന്ന 65-കാരന് ഒക്ടോബർ 30-ന് മംഗളൂരു അഡീഷണൽ ജില്ലാ സെഷൻസ് കോടതി ഉപാധികളോടെ ജാമ്യം അനുവദിച്ചു. പുരോഹിതന്റെ ആരോഗ്യസ്ഥിതി പരിഗണിച്ചായിരുന്നു കോടതിയുടെ നടപടി.
More Read
പുതിയ കേസിൽ അന്വേഷണം എസിപിക്ക്
ആദ്യ കേസിൽ ജാമ്യം നേടി പുറത്തിറങ്ങിയതിന് പിന്നാലെ മറ്റൊരു കുട്ടിയുടെ പരാതിയിലും കേസെടുത്തത് സംഭവത്തിൽ കൂടുതൽ ശ്രദ്ധയാകർഷിച്ചിട്ടുണ്ട്. കൂടുതൽ കുട്ടികൾ സമാനമായ രീതിയിൽ പീഡനത്തിനിരയായിട്ടുണ്ടാകാമെന്ന ആശങ്കയും ഉയർന്നിട്ടുണ്ട്.
സംഭവത്തിൽ സമഗ്രമായ അന്വേഷണം നടത്താൻ പ്രത്യേക അന്വേഷണസംഘത്തെ നിയോഗിക്കണമെന്ന് ബാലാവകാശ പ്രവർത്തകർ ആവശ്യപ്പെട്ടു.
പുതിയ പരാതിയിൽ വിശദമായ അന്വേഷണം നടത്താൻ അസിസ്റ്റന്റ് പോലീസ് കമ്മിഷണർ രവീഷ് നായിക്കിനെ ചുമതലപ്പെടുത്തിയതായി മംഗളൂരു സിറ്റി പോലീസ് കമ്മിഷണർ സുധീർ കുമാർ റെഡ്ഡി അറിയിച്ചു.
English Summary:
Mangaluru police have registered a fresh POCSO case against former parish priest Fr. Cyprian Pinto following a complaint alleging sexual abuse of a 13-year-old boy. Pinto had earlier been arrested in a separate case involving a 14-year-old boy and was granted conditional bail on October 30. ACP Ravish Naik has been assigned to investigate the new complaint.
