വിനോദസഞ്ചാരികളുടെ മറവിൽ ഭീകരപരിശീലനം; പാകിസ്ഥാനിലെ ചർണ ദ്വീപിൽ ലഷ്കർ നീക്കമെന്ന് റിപ്പോർട്ട്

കറാച്ചി: പാകിസ്ഥാൻ ആസ്ഥാനമായി പ്രവർത്തിക്കുന്ന ഭീകരസംഘടനയായ ലഷ്കർ-ഇ-തൊയ്ബ സമുദ്രദൗത്യങ്ങൾക്കുള്ള പരിശീലനം വിപുലീകരിക്കുന്നതായി റിപ്പോർട്ട്.

 കറാച്ചിയിൽനിന്ന് ഏകദേശം 50 കിലോമീറ്റർ അകലെയുള്ള ചർണ ദ്വീപിൽ വിനോദസഞ്ചാരികളുടെ മറവിൽ പരിശീലനം നടക്കുന്നതായാണ് വിവരം.

 കോംബാറ്റ് സ്വിമ്മിങ്, സ്കൂബ ഡൈവിങ് തുടങ്ങിയവയിലാണ് അംഗങ്ങൾക്ക് പരിശീലനം നൽകുന്നതെന്ന് എൻഡിടിവി റിപ്പോർട്ട് ചെയ്യുന്നു.

ലഷ്കർ-ഇ-തൊയ്ബയുടെ കടൽപരിശീലനം ചർണ ദ്വീപിൽ

നിരവധി ഡൈവിങ് കേന്ദ്രങ്ങളുള്ള ചർണ ദ്വീപ് പാകിസ്ഥാനിലെ പ്രധാന വിനോദസഞ്ചാര കേന്ദ്രങ്ങളിലൊന്നാണ്. ഈ സാഹചര്യം മറയാക്കിയാണ് ലഷ്കർ അംഗങ്ങൾ പരിശീലനം നടത്തുന്നതെന്നാണ് രഹസ്യാന്വേഷണ വൃത്തങ്ങളെ ഉദ്ധരിച്ചുള്ള റിപ്പോർട്ട്.

സംഘടനയുടെ ‘ദാവ മറൈൻ വിങ്’ (Dawa Marine Wing) അഥവാ ‘സദാ-ഇ-ഹുറിയത്ത്’ (Sada-e-Hurriyat) വിഭാഗവുമായി ബന്ധപ്പെട്ടവരാണ് പരിശീലനത്തിൽ പങ്കെടുക്കുന്നതെന്നും റിപ്പോർട്ടിൽ പറയുന്നു.

മംഗ്ല ഡാമിലും പ്രത്യേക നീന്തൽക്കുളങ്ങളിലും നേരത്തേ പരിശീലനം

പാക് അധിനിവേശ കശ്മീരിലെ മംഗ്ല ഡാമിലും ഭീകരസംഘടനയുടെ കേന്ദ്രങ്ങളിലുള്ള പ്രത്യേക നീന്തൽക്കുളങ്ങളിലുമാണ് ഇവർ നേരത്തേ പരിശീലനം നടത്തിയിരുന്നതെന്നാണ് വിവരം.

ഇന്ത്യ നടത്തിയ വിവിധ സൈനിക നീക്കങ്ങളിൽ ഇത്തരം പരിശീലനകേന്ദ്രങ്ങൾ ലക്ഷ്യമിട്ടിരുന്നുവെന്നും റിപ്പോർട്ടിൽ പരാമർശിക്കുന്നുണ്ട്. ഇതിനു പിന്നാലെ സമുദ്രപരിശീലനത്തിനായി പുതിയ ഇടങ്ങൾ ഉപയോഗിക്കുന്നുണ്ടെന്നാണ് സൂചന.

മുംബൈ ഭീകരാക്രമണത്തിന്റെ പശ്ചാത്തലത്തിൽ കടൽഭീഷണി

സമുദ്രമേഖലയിലെ പ്രവർത്തനങ്ങൾ വിപുലീകരിക്കാനാണ് ലഷ്കർ-ഇ-തൊയ്ബയുടെ ശ്രമമെന്നാണ് രഹസ്യാന്വേഷണ വൃത്തങ്ങളുടെ വിലയിരുത്തൽ. 2008-ലെ മുംബൈ ഭീകരാക്രമണത്തിൽ അക്രമികൾ കടൽമാർഗമാണ് നഗരത്തിലെത്തിയത്.

അന്നുമുതൽ സംഘടനയ്ക്ക് ചെറിയൊരു സമുദ്രവിഭാഗം ഉണ്ടായിരുന്നുവെന്നും ഇപ്പോൾ കടൽമാർഗമുള്ള ആക്രമണശേഷി വർധിപ്പിക്കാനാണ് ശ്രമമെന്നും എൻഡിടിവി റിപ്പോർട്ട് ചെയ്യുന്നു.

അതേസമയം, കടൽമാർഗമുള്ള ഭീഷണികൾ നേരിടാൻ ഇന്ത്യൻ സുരക്ഷാ ഏജൻസികൾ ജാഗ്രത പുലർത്തുന്നുണ്ടെന്നും റിപ്പോർട്ടിൽ പറയുന്നു. പുതിയ പരിശീലനനീക്കങ്ങളെക്കുറിച്ചുള്ള കൂടുതൽ വിവരങ്ങൾ പുറത്തുവന്നിട്ടില്ല.

English Summary:

Pakistan-based Lashkar-e-Taiba (LeT) members are reportedly conducting maritime training at Churna Island, around 50 km from Karachi, under the cover of tourism activities. The training reportedly includes combat swimming and scuba diving. According to an NDTV report citing intelligence sources, the activities are linked to the group’s Dawa Marine Wing, also known as Sada-e-Hurriyat. The reported development has renewed attention on maritime security, particularly in the context of the 2008 Mumbai terror attacks, in which attackers reached the city by sea.