‘റോഡിലെ തമ്പുരാക്കന്മാരല്ല, കാലന്മാർ’; സ്വകാര്യ ബസ് ഡ്രൈവർമാർക്കെതിരെ ഹൈക്കോടതി

കാക്കനാട്ട് സ്വകാര്യ ബസിടിച്ച് ഐടി ജീവനക്കാരി അക്ഷര മരിച്ച സംഭവത്തിൽ രൂക്ഷ വിമർശനവുമായി ഹൈക്കോടതി.

 അപകടമുണ്ടാക്കിയ ബസിന്റെ ഡ്രൈവർ എട്ടു ക്രിമിനൽ കേസുകളിൽ പ്രതിയാണെന്ന വിവരം ഞെട്ടിക്കുന്നതാണെന്ന് കോടതി നിരീക്ഷിച്ചു. 

അപകടകരമായി വാഹനമോടിക്കുന്ന സ്വകാര്യ ബസ് ഡ്രൈവർമാർ റോഡിലെ തമ്പുരാക്കന്മാരല്ല, 

കാലന്മാരാണെന്നും ജസ്റ്റിസ് ദേവൻ രാമചന്ദ്രൻ അഭിപ്രായപ്പെട്ടു. ഡ്രൈവർക്കു പുറമെ ബസ് ഉടമയ്ക്കും നടത്തിപ്പുകാർക്കും ഉത്തരവാദിത്തമുണ്ടെന്ന് കോടതി വ്യക്തമാക്കി.

കാക്കനാട് ബസ് അപകടം; ഡ്രൈവർക്കെതിരെ എട്ടു കേസുകൾ

ചൊവ്വാഴ്ചയാണ് ഇൻഫോപാർക്കിൽ ജോലി ചെയ്യുന്ന തൃശൂർ സ്വദേശിനി അക്ഷര (28) ബസിടിച്ച് മരിച്ചത്. അമിതവേഗത്തിൽ എത്തിയ ‘മലയിൽ’ എന്ന സ്വകാര്യ ബസാണ് അപകടമുണ്ടാക്കിയത്.

 ബസ് ഡ്രൈവർ സി.കെ. ബിനോയി (43) ലഹരിമരുന്ന്, അടിപിടി കേസുകൾ ഉൾപ്പെടെ എട്ടു ക്രിമിനൽ കേസുകളിൽ പ്രതിയാണെന്നാണ് പോലീസ് കോടതിയെ അറിയിച്ചത്.

തോപ്പുംപടി പോലീസ് സ്റ്റേഷനിൽ രണ്ട് ലഹരിമരുന്ന് കേസുകളിലും രണ്ട് അടിപിടി കേസുകളിലും ഇയാൾ പ്രതിയാണ്. പാലാരിവട്ടം പോലീസ് സ്റ്റേഷനിൽ ഒരു ലഹരിമരുന്ന് കേസിലും വാഹനാപകടക്കേസിലും പ്രതിയാണെന്നും പോലീസ് വ്യക്തമാക്കി. അറസ്റ്റിലായ ബിനോയിയെ റിമാൻഡ് ചെയ്തിരിക്കുകയാണ്.

‘റോഡിലെ തമ്പുരാക്കന്മാരല്ല, കാലന്മാരാണ്’

സ്വകാര്യ ബസ് ഡ്രൈവർമാരുടെ അപകടകരമായ ഡ്രൈവിങ്ങിനെതിരെ കോടതി രൂക്ഷമായ ഭാഷയിലാണ് പ്രതികരിച്ചത്. 

ബസുകൾ പിന്നിൽനിന്ന് ഉച്ചത്തിൽ ഹോൺ മുഴക്കി മറ്റു വാഹനങ്ങളിലുള്ളവരെ ഭയപ്പെടുത്തി ഓടിക്കുകയാണെന്ന് ജസ്റ്റിസ് ദേവൻ രാമചന്ദ്രൻ ചൂണ്ടിക്കാട്ടി.

ഇത്തരം സംഭവങ്ങൾ ആവർത്തിക്കാതിരിക്കാൻ ശക്തമായ നടപടികൾ വേണം. ഒരു അപകടമുണ്ടാക്കിയാൽ പിന്നീട് ആ ഡ്രൈവർക്ക് വാഹനമോടിക്കാൻ കഴിയാത്തവിധം നടപടിയുണ്ടാകണമെന്നും കോടതി നിർദേശിച്ചു.

അപകടത്തിൽ ഒരാളുടെ ജീവൻ നഷ്ടപ്പെടുമ്പോൾ കുടുംബത്തിനുണ്ടാകുന്ന നഷ്ടം പകരംവയ്ക്കാനാവില്ലെന്നും കോടതി നിരീക്ഷിച്ചു.

ബസ് ഉടമയ്ക്കും ഉത്തരവാദിത്തമെന്ന് കോടതി

ഡ്രൈവർക്കെതിരെ നടപടിയെടുത്തതുകൊണ്ട് മാത്രം പ്രശ്നം അവസാനിക്കില്ലെന്ന് കോടതി വ്യക്തമാക്കി. ബസിന്റെ ഉടമയ്ക്കും നടത്തിപ്പുകാർക്കും ഉത്തരവാദിത്തമുണ്ട്. ബിനോയിക്കെതിരെ ഇത്രയധികം കേസുകളുണ്ടെന്ന വിവരം ബസ് ഉടമ മറച്ചുവച്ചെന്നാണ് പോലീസ് കോടതിയെ അറിയിച്ചത്.

അപകടം നടന്ന സമയത്ത് ബിനോയിയുടെ പോലീസ് ക്ലിയറൻസ് സർട്ടിഫിക്കറ്റിനായി ബസ് ഉടമ അപേക്ഷിച്ചിരുന്നുവെന്ന വിവരവും പുറത്തുവന്നു. ഒരാഴ്ചയ്ക്കുള്ളിൽ പ്രശ്നങ്ങൾക്ക് പരിഹാരം കണ്ടെത്തണമെന്ന് കോടതി നിർദേശിച്ചു.

ബസിന്റെ പെർമിറ്റ് റദ്ദാക്കാൻ നടപടി

അക്ഷരയുടെ മരണത്തെത്തുടർന്ന് ഇൻഫോപാർക്ക് ജീവനക്കാരടക്കം പ്രതിഷേധവുമായി രംഗത്തെത്തിയിരുന്നു. അപകടമുണ്ടാക്കിയ ബസ് പോലീസ് കസ്റ്റഡിയിലെടുത്ത് കോടതിക്ക് കൈമാറി. ബസ് ഉടമയ്ക്കെതിരെയും നിയമനടപടികൾ ആരംഭിച്ചിട്ടുണ്ട്. ബസിന്റെ പെർമിറ്റ് റദ്ദാക്കാനുള്ള നടപടികളും പുരോഗമിക്കുകയാണ്.

കോടതിയിൽ ഹാജരായ ഡിസിപി അരുൺ കെ. പവിത്രന് ജസ്റ്റിസ് ദേവൻ രാമചന്ദ്രൻ കർശന നടപടികൾ സ്വീകരിക്കാൻ നിർദേശം നൽകി.

നടപ്പാതകളില്ലാത്തതും മത്സരയോട്ടവും കോടതി ചൂണ്ടിക്കാട്ടി

പല റോഡുകളിലും നടപ്പാതകളില്ലാത്തതിനാൽ ജനങ്ങൾ റോഡിലൂടെ നടക്കേണ്ടിവരുന്ന സാഹചര്യമുണ്ടെന്ന് കോടതി ചൂണ്ടിക്കാട്ടി. നടപ്പാതകൾ വാഹനങ്ങളും മറ്റു തടസ്സങ്ങളും കൈയേറുന്ന അവസ്ഥ മാറണം.

സമയക്രമം പാലിക്കാനെന്ന പേരിലുള്ള സ്വകാര്യ ബസുകളുടെ മത്സരയോട്ടം അനുവദിക്കരുതെന്നും കോടതി വ്യക്തമാക്കി. ബസുകൾ സമയത്ത് ഓടുന്നുണ്ടോയെന്ന് മോട്ടോർ വാഹന വകുപ്പ് പരിശോധിക്കട്ടെ. എന്നാൽ ജനങ്ങളുടെ ജീവന് ഭീഷണിയില്ലാതെ നിയമം പാലിച്ചാണോ വാഹനങ്ങൾ ഓടുന്നതെന്ന് പോലീസ് ഉറപ്പാക്കണമെന്നും കോടതി നിർദേശിച്ചു.

English Summary:

The Kerala High Court strongly criticised dangerous private bus driving while hearing matters related to the death of 28-year-old IT employee Akshara in a bus accident at Kakkanad. The court expressed shock after police informed it that the driver, C.K. Binoy, was an accused in eight criminal cases, including drug-related and assault cases. Justice Devan Ramachandran said bus owners and operators also shared responsibility. The court called for strict action against reckless driving, questioned competitive bus racing and directed authorities to address the issue within a week. Police have seized the bus and initiated proceedings against its owner.