പെരമ്പലൂർ: എട്ടാം ക്ലാസ് വിദ്യാർത്ഥിനിയായ മകൾക്ക് മൊബൈൽ ഫോൺ വാങ്ങിനൽകിയ യുവാവിനെ പെൺകുട്ടിയുടെ പിതാവ് കൊലപ്പെടുത്തിയതായി റിപ്പോർട്ട്. തമിഴ്നാട്ടിലെ പെരമ്പലൂർ ജില്ലയിലെ വെൺബാവൂർ ഗ്രാമത്തിൽ ഞായറാഴ്ച രാത്രിയാണ് സംഭവം. വെൺബാവൂർ സ്വദേശി എസ്. അഭിമന്യു (21) ആണ് കൊല്ലപ്പെട്ടത്. സംഭവത്തിൽ പെൺകുട്ടിയുടെ പിതാവ് ബാലസുബ്രഹ്‌മണ്യത്തെ (50) പോലീസ് അറസ്റ്റ് ചെയ്തു.
മകളുമായുള്ള ബന്ധത്തെച്ചൊല്ലി തർക്കം
പെരമ്പലൂരിലെ സ്വകാര്യ കോളേജിൽ രണ്ടാം വർഷ എംസിഎ വിദ്യാർത്ഥിയായിരുന്നു അഭിമന്യു. എട്ടാം ക്ലാസിൽ പഠിക്കുന്ന തന്റെ മകളുമായുള്ള അഭിമന്യുവിന്റെ ബന്ധത്തെ ബാലസുബ്രഹ്‌മണ്യം നേരത്തേ എതിർത്തിരുന്നതായാണ് വിവരം.
മകളെ ബന്ധത്തിൽനിന്ന് പിന്തിരിപ്പിക്കാൻ ശ്രമിച്ച ഇയാൾ അഭിമന്യുവിനും മുന്നറിയിപ്പ് നൽകിയിരുന്നു. എന്നാൽ യുവാവ് ബന്ധം തുടർന്നുവെന്നും അടുത്തിടെ പെൺകുട്ടിക്ക് മൊബൈൽ ഫോൺ വാങ്ങിനൽകിയെന്നും റിപ്പോർട്ടിൽ പറയുന്നു.
ഇരുമ്പുവടികൊണ്ട് അടിച്ച ശേഷം കുത്തി
മൊബൈൽ ഫോൺ വാങ്ങിനൽകിയതും മകളുമായി നിരന്തരം ബന്ധപ്പെടുന്നതും അറിഞ്ഞ ബാലസുബ്രഹ്‌മണ്യം ഞായറാഴ്ച രാത്രി അഭിമന്യുവിന്റെ വീട്ടിലെത്തി. ഇതേക്കുറിച്ചുള്ള സംസാരത്തിനിടെ ഇരുവരും തമ്മിൽ വാക്കേറ്റമുണ്ടായി. പിന്നീട് തർക്കം കൈയാങ്കളിയിലേക്ക് നീങ്ങിയെന്നാണ് വിവരം.
ഇതിനിടെ പരിസരത്തുണ്ടായിരുന്ന ഇരുമ്പുവടികൊണ്ട് ബാലസുബ്രഹ്‌മണ്യം അഭിമന്യുവിനെ അടിച്ചുവീഴ്ത്തി. തുടർന്ന് കത്തികൊണ്ട് നെഞ്ചിൽ കുത്തിയതായാണ് റിപ്പോർട്ട്. ഗുരുതരമായി പരിക്കേറ്റ അഭിമന്യു സംഭവസ്ഥലത്തുതന്നെ മരിച്ചു. പിന്നാലെ ബാലസുബ്രഹ്‌മണ്യം സ്ഥലത്തുനിന്ന് കടന്നുകളഞ്ഞു.
പോലീസ് അന്വേഷണം തുടരുന്നു
More Read
വിവരമറിഞ്ഞ് സ്ഥലത്തെത്തിയ കൈക്കലത്തൂർ പോലീസ് അഭിമന്യുവിന്റെ മൃതദേഹം പോസ്റ്റ്മോർട്ടത്തിനായി മഹാത്മാഗാന്ധി മെമ്മോറിയൽ ഗവൺമെന്റ് ആശുപത്രിയിലേക്ക് (MGMGH) മാറ്റി.
കേസ് രജിസ്റ്റർ ചെയ്ത പോലീസ് നടത്തിയ അന്വേഷണത്തിനൊടുവിൽ ബാലസുബ്രഹ്‌മണ്യത്തെ കണ്ടെത്തി അറസ്റ്റ് ചെയ്തു. സംഭവത്തിൽ വിശദമായ അന്വേഷണം തുടരുകയാണെന്ന് അന്വേഷണ ഉദ്യോഗസ്ഥൻ അറിയിച്ചു.
English Summary: A 21-year-old MCA student, S. Abhimanyu, was allegedly killed by the father of an eighth-grade student after he gifted her a mobile phone and continued communicating with her. The incident occurred in Venbavur village in Tamil Nadu’s Perambalur district. Police arrested the girl’s father, Balasubramanian, 50, and are investigating the case.
