ബാർ ലൈസൻസ് വിവാദം: എക്‌സൈസ് ഉദ്യോഗസ്ഥർക്കെതിരെ വിജിലൻസ് അന്വേഷണം ഉണ്ടായേക്കും

തിരുവനന്തപുരം: സംസ്ഥാനത്തെ ബാർ ലൈസൻസ് വിതരണവുമായി ബന്ധപ്പെട്ട വിവാദത്തിൽ എക്‌സൈസ് ഉദ്യോഗസ്ഥർക്കെതിരെ വിജിലൻസ് അന്വേഷണം ഉണ്ടായേക്കുമെന്ന് എക്‌സൈസ് മന്ത്രി എം. ലിജു. ബാറുകൾക്ക് ലൈസൻസ് അനുവദിച്ചതിന് പിന്നിൽ സാമ്പത്തിക ഇടപാടുകൾ നടന്നതായി വിവരങ്ങൾ ലഭിച്ചിട്ടുണ്ടെന്നും ഇതുസംബന്ധിച്ച് വിജിലൻസ് അന്വേഷണം ആവശ്യപ്പെട്ട് ആഭ്യന്തര വകുപ്പിന് ശുപാർശ നൽകുമെന്നും മന്ത്രി സൂചന നൽകി.

നിലവിൽ സ്വീകരിച്ച സസ്‌പെൻഷൻ നടപടികൾ അന്വേഷണത്തിന്റെ ഭാഗമാണെന്നും മന്ത്രി വ്യക്തമാക്കി. ബാർ ലൈസൻസ് അനുവദിച്ചതുമായി ബന്ധപ്പെട്ട് ഉയർന്നുവന്ന ക്രമക്കേട് ആരോപണങ്ങളിൽ കർശന നടപടി സ്വീകരിക്കുമെന്നും അദ്ദേഹം പറഞ്ഞു.

24 മണിക്കൂറിനുള്ളിൽ ലൈസൻസ് അനുവദിച്ചതിൽ അസ്വാഭാവികത

10 മുതൽ 12 വർഷംവരെ അടഞ്ഞുകിടന്ന വൈൻ, ബിയർ പാർലറുകൾ അപേക്ഷ നൽകിയതിന് പിന്നാലെ 24 മണിക്കൂറിനുള്ളിൽ ബാർ ലൈസൻസ് അനുവദിച്ചതിലാണ് പ്രധാനമായും സംശയം ഉയർന്നിരിക്കുന്നത്. ഇതിൽ അസ്വാഭാവികതയുണ്ടെന്നും ലൈസൻസ് അനുവദിച്ചതിന് പിന്നിലെ നടപടിക്രമങ്ങൾ വിശദമായി പരിശോധിക്കുകയാണെന്നും മന്ത്രി അറിയിച്ചു.

ബാർ ലൈസൻസ് വിതരണത്തിലെ ക്രമക്കേടുകൾ നേരിട്ടുള്ള ഇടപെടലിലൂടെയാണ് പുറത്തുകൊണ്ടുവന്നതെന്നും അദ്ദേഹം അവകാശപ്പെട്ടു. ലൈസൻസ് അനുവദിക്കുന്നതിൽ ഉദ്യോഗസ്ഥരുടെ ഭാഗത്തുനിന്ന് അനാവശ്യമായ ധൃതിയുണ്ടായിട്ടുണ്ടോയെന്നും പരിശോധിക്കുന്നുണ്ട്.

10 മാസം അടഞ്ഞുകിടന്നാൽ ലൈസൻസ് റദ്ദാക്കും

നിലവിലെ അബ്കാരി ചട്ടപ്രകാരം 10 മാസം അടഞ്ഞുകിടക്കുന്ന സ്ഥാപനങ്ങളുടെ ബാർ ലൈസൻസ് റദ്ദാക്കേണ്ടതാണ്. എന്നാൽ, നിയമത്തിലെ പഴുതുകൾ ഉപയോഗിച്ച് വർഷങ്ങളായി പ്രവർത്തിക്കാതിരുന്ന സ്ഥാപനങ്ങൾക്ക് അടിയന്തരമായി ലൈസൻസ് അനുവദിച്ചെന്നാണ് മന്ത്രിയുടെ വിശദീകരണം.

ഇത്തരം നടപടികളിൽ ഉദ്യോഗസ്ഥരുടെ പങ്ക് എന്താണെന്നും ചട്ടങ്ങൾ പാലിച്ചാണോ ലൈസൻസ് അനുവദിച്ചതെന്നും പരിശോധിച്ചുവരികയാണ്. സാമ്പത്തിക ഇടപാടുകൾ നടന്നിട്ടുണ്ടെന്ന സംശയവും അന്വേഷണത്തിന്റെ പരിഗണനയിലുണ്ടെന്നാണ് മന്ത്രിയുടെ പ്രതികരണത്തിൽനിന്ന് വ്യക്തമാകുന്നത്.

മുൻ സർക്കാരിന്റെ കാലത്തെ ചട്ടങ്ങൾ ഭേദഗതി ചെയ്യും

കഴിഞ്ഞ എൽ.ഡി.എഫ്. സർക്കാരിന്റെ കാലത്ത് വരുത്തിയ ചട്ടഭേദഗതികളിലെ പഴുതുകൾ ഉപയോഗിച്ചാണ് താഴെത്തട്ടിലുള്ള ഉദ്യോഗസ്ഥർ എക്‌സൈസ് കമ്മിഷണറെയോ സർക്കാരിനെയോ അറിയിക്കാതെ തീരുമാനങ്ങളെടുത്തതെന്നും മന്ത്രി ആരോപിച്ചു.

ഡെപ്യൂട്ടി കമ്മിഷണർമാർക്ക് ബാർ ലൈസൻസ് അനുവദിക്കാനും പുതുക്കാനുമുള്ള അധികാരം നൽകുന്ന ചട്ടങ്ങൾ മുൻ സർക്കാരാണ് ഭേദഗതി ചെയ്തതെന്നാണ് മന്ത്രിയുടെ വിശദീകരണം. ഈ ചട്ടങ്ങളിൽ ആവശ്യമായ മാറ്റങ്ങൾ വരുത്തുമെന്നും അദ്ദേഹം അറിയിച്ചു.

സർക്കാരിന്റെ നയങ്ങൾക്ക് വിരുദ്ധമായി പ്രവർത്തിക്കാൻ ആരെയും അനുവദിക്കില്ലെന്നും മുൻ സർക്കാർ സ്വീകരിച്ച രീതികൾ തുടരേണ്ട ബാധ്യത നിലവിലെ യു.ഡി.എഫ്. സർക്കാരിനില്ലെന്നും മന്ത്രി കൂട്ടിച്ചേർത്തു.

English Summary: Excise Minister M. Liju has indicated that a Vigilance probe may be recommended into alleged irregularities and possible financial dealings in Kerala’s bar licence distribution. The government is examining licences issued to long-closed wine and beer parlours and is considering amendments to the existing rules.