സ്വർണക്കടത്ത് കേസ് പ്രതി രന്യ റാവുവിന് വിഐപി ദർശനം; കർണാടകയിൽ വിവാദം

ബെംഗളൂരു: സ്വർണക്കടത്ത് കേസിൽ പ്രതിയായ കന്നഡ നടി രന്യ റാവുവിന് ഹാസനാംബ ക്ഷേത്രത്തിൽ പ്രത്യേക പരിഗണനയോടെ വിഐപി ദർശനം അനുവദിച്ചതിനെച്ചൊല്ലി കർണാടകയിൽ രാഷ്ട്രീയ വിവാദം. ഒക്ടോബർ 31ന് കുടുംബത്തോടൊപ്പമാണ് ഹാസൻ ജില്ലയിലെ ക്ഷേത്രത്തിൽ രന്യ എത്തിയത്. വിരമിച്ച ഡിജിപിയും രന്യയുടെ രണ്ടാനച്ഛനുമായ കെ. രാമചന്ദ്ര റാവുവും ഇവർക്കൊപ്പമുണ്ടായിരുന്നു.

രന്യ റാവുവിന് ക്ഷേത്രത്തിൽ വിഐപി പരിഗണന

മുൻ ഡിജിപിക്ക് ലഭിക്കുന്ന ഔദ്യോഗിക പ്രോട്ടോക്കോൾ വാഹനത്തിലാണ് രന്യ ക്ഷേത്രത്തിലെത്തിയതെന്നാണ് റിപ്പോർട്ടുകൾ. കൂടാതെ, നടിക്കും കുടുംബത്തിനും പ്രത്യേക പരിഗണന ലഭിക്കുകയും പൊലീസ് സംരക്ഷണത്തിൽ വിഐപി ദർശനം ഒരുക്കുകയും ചെയ്തതായാണ് ആരോപണം.

സംഭവം പുറത്തുവന്നതോടെ ക്ഷേത്രത്തിലെ പ്രത്യേക പരിഗണനയെച്ചൊല്ലി വിമർശനങ്ങളും ഉയർന്നു. സ്വർണക്കടത്ത് കേസിൽ പ്രതിയായ ഒരാൾക്ക് ഇത്തരം പരിഗണന നൽകിയത് എന്തിനാണെന്ന ചോദ്യവും ശക്തമായി.

രന്യ റാവുവിന്റെ വിഐപി ദർശനം; കോൺഗ്രസിനെതിരെ ബിജെപി

സംഭവത്തിൽ കോൺഗ്രസ് സർക്കാരിനെതിരെ ബിജെപി രംഗത്തെത്തി. സ്വർണക്കടത്ത് കേസിൽ പ്രതിയായ നടിക്ക് വിഐപി പരിഗണന നൽകിയതിനെ ചോദ്യം ചെയ്താണ് ബിജെപി നേതാക്കൾ വിമർശനം ഉന്നയിച്ചത്.

“ഒരുപക്ഷേ സംസ്ഥാന സർക്കാരിന്റെ കണ്ണിൽ രന്യ റാവു ഒരു വിഐപിയായിരിക്കാം. കോൺഗ്രസ് സർക്കാർ അവരെ അങ്ങനെയായിരിക്കും കാണുന്നത്” എന്നായിരുന്നു ബിജെപി എംഎൽസി സി.ടി. രവിയുടെ പരിഹാസം.

14.2 കിലോഗ്രാം സ്വർണം കടത്തുന്നതിനിടെ പിടിയിലായി

ശരീരത്തിലും വസ്ത്രങ്ങൾക്കുള്ളിലുമായി ഒളിപ്പിച്ച് 14.2 കിലോഗ്രാം സ്വർണം കടത്താൻ ശ്രമിക്കുന്നതിനിടെയാണ് രന്യ റാവു പിടിയിലായത്. തുടർന്നുള്ള അന്വേഷണത്തിൽ ദുബായിൽനിന്ന് ബെംഗളൂരുവിലേക്ക് സ്വർണം കടത്തുന്ന സംഘത്തിലെ പ്രധാന കണ്ണിയാണ് നടിയെന്ന് അന്വേഷണ ഏജൻസികൾ കണ്ടെത്തിയിരുന്നു.

ഓരോ കിലോഗ്രാം സ്വർണവും എത്തിക്കുന്നതിന് നാല് മുതൽ അഞ്ച് ലക്ഷം രൂപ വരെ കമ്മിഷൻ കൈപ്പറ്റിയിരുന്നതായും അന്വേഷണത്തിൽ കണ്ടെത്തിയെന്നാണ് റിപ്പോർട്ട്.

102 കോടി രൂപയുടെ സ്വർണക്കടത്ത് കേസ്; കുറ്റപത്രത്തിലും പേര്

102 കോടി രൂപയുടെ സ്വർണക്കടത്ത് കേസിൽ എൻഫോഴ്‌സ്‌മെന്റ് ഡയറക്ടറേറ്റ് സമർപ്പിച്ച കുറ്റപത്രത്തിലും രന്യ റാവുവിന്റെ പേരുണ്ട്. ഒരു വർഷത്തിനിടെ 127 കിലോഗ്രാമിലധികം സ്വർണം ഇന്ത്യയിലേക്ക് കടത്തിയെന്നാണ് കുറ്റപത്രത്തിലെ ആരോപണം.

കേസുമായി ബന്ധപ്പെട്ട് ഡയറക്ടറേറ്റ് ഓഫ് റവന്യൂ ഇന്റലിജൻസ് (ഡിആർഐ) രന്യയ്ക്ക് 102 കോടി രൂപ പിഴയും ചുമത്തിയിട്ടുണ്ട്. ഇതിനിടെ, ഹാസനാംബ ക്ഷേത്രത്തിലെ വിഐപി ദർശനവുമായി ബന്ധപ്പെട്ട വിവാദം കർണാടക രാഷ്ട്രീയത്തിൽ പുതിയ ചർച്ചകൾക്ക് വഴിയൊരുക്കിയിരിക്കുകയാണ്.

English Summary:

Kannada actress Ranya Rao, an accused in a major gold smuggling case, has triggered a political controversy after reportedly receiving VIP darshan at the Hasanamba Temple in Karnataka on October 31. She visited the temple with her family, including her stepfather and retired DGP K. Ramachandra Rao. Reports of special treatment and police protection drew criticism from the BJP. BJP MLC C.T. Ravi questioned the Congress government’s decision. Ranya Rao was arrested while allegedly attempting to smuggle 14.2 kg of gold. The Enforcement Directorate’s chargesheet in the Rs 102 crore gold smuggling case also names her.