മെർക്കുറിയിൽനിന്ന് സ്വർണം; ന്യൂക്ലിയർ ഫ്യൂഷനിലൂടെ പുതിയ നേട്ടമെന്ന് യു എസ് കമ്പനി

ലാബിൽ കൃത്രിമമായി സ്വർണം നിർമിക്കാനാകുമെന്ന അവകാശവാദവുമായി യുഎസ് കമ്പനിയായ മാരത്തൺ ഫ്യൂഷൻ രംഗത്ത്. ന്യൂക്ലിയർ ഫ്യൂഷൻ സാങ്കേതികവിദ്യ ഉപയോഗിച്ച് മെർക്കുറിയെ (രസം) സ്വർണമാക്കി മാറ്റിയെന്നാണ് സാൻഫ്രാൻസിസ്കോ ആസ്ഥാനമായി പ്രവർത്തിക്കുന്ന കമ്പനിയുടെ അവകാശവാദം.

നൂറ്റാണ്ടുകളായി മനുഷ്യൻ പിന്തുടർന്ന രസവാദ സങ്കൽപ്പങ്ങൾക്ക് ശാസ്ത്രീയരൂപം നൽകുന്നതാണ് ഈ പരീക്ഷണമെന്നാണ് കമ്പനി പറയുന്നത്. എന്നാൽ, അവകാശവാദങ്ങൾ ഇതുവരെ സ്വതന്ത്രമായി സ്ഥിരീകരിച്ചിട്ടില്ല.

ന്യൂക്ലിയർ ഫ്യൂഷനിലൂടെ സ്വർണം നിർമിക്കൽ

ഫ്യൂഷൻ പ്രക്രിയയിൽ പുറത്തുവരുന്ന ഉയർന്ന ഊർജമുള്ള ന്യൂട്രോണുകൾ ഉപയോഗിച്ചാണ് മെർക്കുറിയെ സ്വർണമാക്കി മാറ്റിയതെന്നാണ് മാരത്തൺ ഫ്യൂഷൻ വ്യക്തമാക്കുന്നത്.

ഒരു മൂലകത്തിന്റെ ആറ്റത്തിന്റെ കേന്ദ്രഭാഗത്ത് മാറ്റം വരുത്തി മറ്റൊരു മൂലകമാക്കി മാറ്റുന്ന ന്യൂക്ലിയർ ട്രാൻസ്മ്യൂട്ടേഷൻ സാങ്കേതികവിദ്യയാണ് ഇതിനായി ഉപയോഗിച്ചത്.

മെർക്കുറി-198 ആറ്റങ്ങളെ ഉയർന്ന ഊർജമുള്ള ന്യൂട്രോണുകളുമായി സമ്പർക്കത്തിലൂടെ മെർക്കുറി-197 ആക്കി മാറ്റുന്നു. തുടർന്ന് റേഡിയോ ആക്ടീവ് ശോഷണത്തിലൂടെ മെർക്കുറി-197 സ്വർണം-197 ആയി മാറുമെന്നാണ് കമ്പനിയുടെ വിശദീകരണം.

സേണിന്റെ റെക്കോർഡിനേക്കാൾ പത്തുമടങ്ങ് വേഗമെന്ന് അവകാശവാദം

2025-ൽ യൂറോപ്യൻ ഓർഗനൈസേഷൻ ഫോർ ന്യൂക്ലിയർ റിസർച്ച് (സേൺ) സ്ഥാപിച്ച റെക്കോർഡിനേക്കാൾ പത്തുമടങ്ങ് വേഗത്തിലാണ് തങ്ങളുടെ ഉൽപാദനനിരക്കെന്നാണ് മാരത്തൺ ഫ്യൂഷൻ അവകാശപ്പെടുന്നത്.

2015 മുതൽ 2018 വരെ കൊളൈഡറിൽ നടത്തിയ പരീക്ഷണങ്ങളുടെ ഭാഗമായി സേൺ ഗവേഷകർ സ്വർണം വേർതിരിച്ചെടുത്തിരുന്നു.ഈ പരീക്ഷണങ്ങളുമായി താരതമ്യം ചെയ്താണ് മാരത്തൺ ഫ്യൂഷൻ തങ്ങളുടെ നേട്ടം വിശദീകരിക്കുന്നത്.

സ്വർണവില കുറയുമോ? വാണിജ്യ ഉൽപാദനം ഇനിയും ദൂരം

ലാബിൽ സ്വർണം നിർമിക്കാമെന്ന അവകാശവാദം സ്വർണവിപണിയിൽ വലിയ മാറ്റമുണ്ടാക്കുമോ എന്ന ചോദ്യവും ഉയരുന്നുണ്ട്. എന്നാൽ, നിർമിച്ച സ്വർണത്തിന്റെ അളവ്, ശുദ്ധി, ഉൽപാദനത്തിനുള്ള സാമ്പത്തിക ചെലവ് തുടങ്ങിയ വിവരങ്ങൾ കമ്പനി ഇതുവരെ പുറത്തുവിട്ടിട്ടില്ല.

ഭാവിയിൽ പ്രതിവർഷം ഏകദേശം രണ്ട് ടൺ സ്വർണം ഉൽപാദിപ്പിക്കാൻ കഴിയുമെന്നാണ് മാരത്തൺ ഫ്യൂഷന്റെ പ്രതീക്ഷ. അതേസമയം, ഈ രീതിയിലുള്ള സ്വർണ ഉൽപാദനം വാണിജ്യാടിസ്ഥാനത്തിൽ പരീക്ഷിച്ച് വിജയിച്ചിട്ടില്ല.

കമ്പനിയുടെ അവകാശവാദങ്ങൾ സ്ഥിരീകരിക്കപ്പെടുകയും ഉൽപാദനച്ചെലവും പ്രായോഗികതയും വ്യക്തമാകുകയും ചെയ്താൽ മാത്രമേ സ്വർണവിപണിയിൽ ഇതിന്റെ സ്വാധീനം വിലയിരുത്താനാകൂ.

English Summary : US-based Marathon Fusion claims to have produced gold from mercury using nuclear fusion technology. The company says high-energy neutrons can transform mercury-198 into mercury-197, which subsequently decays into gold-197. It claims its production rate is ten times faster than a record set by CERN in 2025 and aims to produce around two tonnes of gold annually. However, the claims remain unverified, and commercial-scale production has yet to be demonstrated.