‘അവകാശങ്ങൾ അറിഞ്ഞ് വളരുന്ന മകളെയാണ് വേണ്ടത്’; നേഹ ബോറയുടെ റീൽ പങ്കുവച്ച് വിനീത് ശ്രീനിവാസൻ

ഡൽഹി ജന്തർ മന്തറിൽ കേന്ദ്ര തിരഞ്ഞെടുപ്പ് കമ്മിഷണർ ഗ്യാനേഷ് കുമാറിനെതിരെ നടക്കുന്ന ജനകീയ പ്രക്ഷോഭത്തിന് പിന്തുണയുമായി സിനിമാ-സാംസ്കാരിക രംഗത്തെ പ്രമുഖർ. ഓൾ ഇന്ത്യ സ്റ്റുഡന്റ്സ് അസോസിയേഷൻ (എഐഎസ്എ) ദേശീയ പ്രസിഡന്റും ജെഎൻയു ഗവേഷകയുമായ നേഹ ബോറയുടെ നേതൃത്വത്തിൽ നടക്കുന്ന സമരത്തിനാണ് താരപിന്തുണ ലഭിക്കുന്നത്.

നേഹ ബോറയുടെ റീൽ നടനും സംവിധായകനുമായ വിനീത് ശ്രീനിവാസൻ ഇൻസ്റ്റഗ്രാം സ്റ്റോറിയിൽ പങ്കുവച്ചത് ശ്രദ്ധ നേടി. അവതാരക രഞ്ജിനി ഹരിദാസും സമരത്തിന് ഐക്യദാർഢ്യം പ്രഖ്യാപിച്ച് സമൂഹമാധ്യമങ്ങളിൽ രംഗത്തെത്തിയിട്ടുണ്ട്.

‘അവകാശങ്ങൾ അറിഞ്ഞ് വളരുന്ന മകളെയാണ് വേണ്ടത്’

നേഹ ബോറയുടെ റീൽ പങ്കുവച്ചുകൊണ്ട് വിനീത് ശ്രീനിവാസൻ സ്ത്രീകളുടെ സ്വാതന്ത്ര്യത്തെയും അവകാശബോധത്തെയും കുറിച്ചുള്ള സന്ദേശവും പങ്കുവച്ചു.

“അവകാശങ്ങളെക്കുറിച്ച് അറിഞ്ഞ് വളരുന്ന ഒരു മകളെയാണ് എനിക്ക് വേണ്ടത്. ഈ ലോകത്ത് കേവലം അതിജീവനത്തിനായി മാത്രം പഠിച്ച് വളരുന്നതും പങ്കാളിയെ പരിപാലിക്കുകയാണ് ജീവിതത്തിലെ ഏക ലക്ഷ്യമെന്ന് ചിന്തിക്കുന്നതും എനിക്കിഷ്ടമല്ല,” എന്നായിരുന്നു സന്ദേശത്തിന്റെ തുടക്കം.

സ്വന്തം മൂല്യം തിരിച്ചറിയുകയും മറ്റുള്ളവരുടെ സഹായമില്ലാതെയും മുന്നോട്ടുപോകാൻ പ്രാപ്തയാകുകയും ചെയ്യുന്ന സ്ത്രീയായി മകൾ വളരണമെന്നാണ് ആഗ്രഹമെന്നും സന്ദേശത്തിൽ പറയുന്നു.

നിശബ്ദയാക്കപ്പെടാനോ സ്വന്തം വ്യക്തിത്വം നിലനിർത്താൻ മറ്റുള്ളവരുടെ അനുവാദം തേടാനോ നിർബന്ധിതയാകാത്ത, ലോകം എതിരായാലും നിലപാടുകളിൽ ഉറച്ചുനിൽക്കുന്ന സ്ത്രീയായിരിക്കണം അവളെന്നും സന്ദേശം വ്യക്തമാക്കുന്നു.

നേഹ ബോറയുടെ പോസ്റ്ററുമായി നസിയ

സമരത്തിന് പിന്തുണയുമായി നടി നസിയയും രംഗത്തെത്തി. നേഹ ബോറയുടെ ചിത്രമുൾക്കൊള്ളുന്ന പോസ്റ്റർ നസിയ ഇൻസ്റ്റഗ്രാം സ്റ്റോറിയിൽ പങ്കുവച്ചു.

‘ദസറയുടെ ആദ്യ ദിവസം’ എന്ന അടിക്കുറിപ്പോടെയായിരുന്നു പോസ്റ്റ്.തിന്മയ്ക്കുമേൽ നന്മ വിജയിക്കുന്നതിന്റെ പ്രതീകമായ ദസറയുടെ ആശയത്തെ ഡൽഹിയിലെ പ്രതിഷേധങ്ങളുടെ പശ്ചാത്തലത്തിൽ അവതരിപ്പിക്കുന്നതാണ് പോസ്റ്റർ.

രഞ്ജിനി ഹരിദാസും പിന്തുണയുമായി രംഗത്ത്

കേന്ദ്ര തിരഞ്ഞെടുപ്പ് കമ്മിഷണർ ഗ്യാനേഷ് കുമാറിനെതിരായ ജനകീയ പ്രക്ഷോഭത്തിന് പ്രശസ്ത അവതാരക രഞ്ജിനി ഹരിദാസും പിന്തുണ അറിയിച്ചിരുന്നു. സ്വന്തം സമൂഹമാധ്യമ അക്കൗണ്ടുകളിലൂടെയാണ് അവർ പ്രതിഷേധത്തിന് ഐക്യദാർഢ്യം പ്രഖ്യാപിച്ചത്.

നീറ്റ് പരീക്ഷാ പേപ്പർ ചോർച്ച, തൊഴിലില്ലായ്മ തുടങ്ങിയ വിഷയങ്ങൾക്കൊപ്പം ഡൽഹിയിൽ നടക്കുന്ന വിവിധ ജനകീയ പ്രക്ഷോഭങ്ങളിലും വിദ്യാർഥികൾ ഉന്നയിക്കുന്ന ആവശ്യങ്ങൾക്ക് സിനിമാ-സാംസ്കാരിക രംഗത്തുനിന്ന് ലഭിക്കുന്ന പിന്തുണ ശ്രദ്ധേയമാകുകയാണ്.

English Summary: Actor and filmmaker Vineeth Sreenivasan has drawn attention by sharing a reel featuring Neha Bora, who is leading protests at Jantar Mantar in Delhi against Chief Election Commissioner Gyanesh Kumar. His Instagram story included a message emphasising women’s rights, independence and the importance of standing firm in one’s beliefs. Actress Nazriya and presenter Ranjini Haridas have also expressed support for the protests.