കൊച്ചി: പകൽ കോളേജിൽ പഠനം, വൈകിട്ട് പരീക്ഷാ പരിശീലനം, രാത്രിയിലും പഠനം. ബി.എ മലയാളം പഠനം പൂർത്തിയാക്കുന്നതിനൊപ്പം പൊലീസ് കോൺസ്റ്റബിൾ റാങ്ക് പട്ടികയിൽ ഇടം നേടുക എന്ന ലക്ഷ്യവുമായി മുന്നേറിയ കോഴിക്കോട് വെള്ളനൂർ വെസ്റ്റ് സ്വദേശി എം. അജയ് ഒടുവിൽ സ്വപ്നം സ്വന്തമാക്കി.
21കാരനായ അജയ് ബി.എ പഠനം പൂർത്തിയാക്കിയതിനൊപ്പം പൊലീസ് കോൺസ്റ്റബിൾ റാങ്ക് പട്ടികയിൽ 39-ാം സ്ഥാനവും നേടി. നിലവിൽ മലപ്പുറം എം.എസ്.പിയിൽ പരിശീലനം ആരംഭിച്ചിരിക്കുകയാണ്.
അജയ് പൊലീസ് റാങ്ക് നേടിയത് കഠിനപരിശ്രമത്തിലൂടെ
ബിരുദത്തിന്റെ രണ്ടാം വർഷം മുതലാണ് അജയ് മത്സരപരീക്ഷകൾക്കുള്ള തയ്യാറെടുപ്പ് ആരംഭിച്ചത്. കുന്നമംഗലത്തെ അക്കാഡമിയിൽ തിങ്കൾ, ബുധൻ, വെള്ളി ദിവസങ്ങളിൽ വൈകിട്ട് ആറു മുതൽ രാത്രി ഒമ്പതുവരെ പരിശീലനം നേടി.
പരിശീലനം കഴിഞ്ഞ് വീട്ടിലെത്തിയ ശേഷവും പഠനം തുടർന്നു. പഠനത്തിനൊപ്പം ശാരീരികക്ഷമത ഉറപ്പാക്കാനും അജയ് പ്രത്യേക ശ്രദ്ധ നൽകി. പരിശീലകനായ വിനുവാണ് ഫിറ്റ്നസ് പരിശീലനത്തിൽ സഹായിച്ചത്.
ആദ്യ ശ്രമത്തിൽ പരാജയം; പിന്നെ 39-ാം റാങ്ക്
പൊലീസ് പരീക്ഷയിലെ ആദ്യ ശ്രമത്തിൽ അജയിന് വിജയിക്കാനായില്ല. എന്നാൽ പരാജയത്തിൽ പിന്മാറാതെ പഠനരീതിയിൽ ആവശ്യമായ മാറ്റങ്ങൾ വരുത്തി വീണ്ടും തയ്യാറെടുപ്പ് തുടർന്നു.
More Read
ഇതോടെ ഏപ്രിലിൽ പ്രസിദ്ധീകരിച്ച റാങ്ക് പട്ടികയിൽ അജയ് 39-ാം സ്ഥാനത്തെത്തി. മേയിൽ ബി.എ മലയാളം ബിരുദഫലം കൂടി വന്നതോടെ പഠനവും പൊലീസ് സ്വപ്നവും ഒരേസമയം സാക്ഷാത്കരിച്ചു.
പൊലീസിലുള്ള സഹോദരനും കരുത്തായി
ലോറി ഡ്രൈവറായ മേക്കട രാജന്റെയും വീട്ടമ്മയായ ബേബിയുടെയും മകനാണ് അജയ്. പൊലീസിൽ ജോലി ചെയ്യുന്ന സഹോദരൻ അക്ഷയ് ആണ് പരീക്ഷാ തയ്യാറെടുപ്പിന് ആവശ്യമായ മാർഗനിർദേശങ്ങൾ നൽകിയത്.
മൂന്നിന് മലപ്പുറം എം.എസ്.പിയിൽ പൊലീസ് പരിശീലനം ആരംഭിച്ച അജയ് ഇനി ഔദ്യോഗിക ജീവിതത്തിലേക്കുള്ള പുതിയ അധ്യായത്തിന് തുടക്കമിടുകയാണ്.
More Read
ഡിഗ്രിക്കൊപ്പം മത്സരപരീക്ഷയും
ബിരുദപഠന കാലത്തുതന്നെ മത്സരപരീക്ഷകൾക്ക് തയ്യാറെടുക്കാൻ ശ്രമിക്കണമെന്നാണ് അജയിയുടെ അഭിപ്രായം. ഇപ്പോൾ മത്സരത്തിന്റെ തോത് കൂടുതലായതിനാൽ നേരത്തെ തയ്യാറെടുപ്പ് ആരംഭിക്കുന്നതാണ് ഗുണകരമെന്നും അജയ് പറയുന്നു.
ആദ്യ പരാജയത്തെ മറികടന്ന് പഠനവും പരിശീലനവും ഒരുപോലെ മുന്നോട്ടുകൊണ്ടുപോയതാണ് അജയിയുടെ വിജയത്തിന് പിന്നിലെ പ്രധാന കരുത്ത്.
