ഹൈദരാബാദ്: കഞ്ചാവ് കടത്ത് നടത്തി കാമുകിയുടെ പിറന്നാൾ സമ്മാനത്തിനുള്ള പണം കണ്ടെത്താൻ ശ്രമിച്ച യുവാവും കാമുകിയും അറസ്റ്റിൽ. തെലങ്കാനയിലെ പെദ്ദപ്പള്ളി സ്വദേശികളായ മിത്ര ചൈതന്യ (21), ഹേമലത (20) എന്നിവരെയാണ് ഖമ്മം ജില്ലയിൽ പൊലീസ് പിടികൂടിയത്. ഇവരിൽനിന്ന് 12 കിലോ കഞ്ചാവും നാല് മൊബൈൽ ഫോണുകളും ബൈക്കും പിടിച്ചെടുത്തു.
കഞ്ചാവ് കടത്ത്; ഖമ്മത്ത് രണ്ട് പേർ അറസ്റ്റിൽ
ഒഡീഷയിൽനിന്ന് കഞ്ചാവ് വാങ്ങി ബൈക്കിൽ ഹൈദരാബാദിലേക്ക് പോകുന്നതിനിടെയാണ് ഇരുവരും പിടിയിലായതെന്ന് പൊലീസ് അറിയിച്ചു.
റോഡിലെ പൊലീസ് പരിശോധനയ്ക്കിടെ ചൈതന്യ ബൈക്കിന്റെ വേഗം കൂട്ടി രക്ഷപ്പെടാൻ ശ്രമിച്ചെന്നാണ് പൊലീസ് പറയുന്നത്. ഇതിനിടെ ബൈക്ക് നിയന്ത്രണം വിട്ട് മറിഞ്ഞു. സംഭവത്തിൽ ഇരുവർക്കും നിസാര പരുക്കേറ്റു.
കഞ്ചാവ് കടത്തിന് പിന്നിൽ ഐഫോൺ സമ്മാനമെന്ന് പൊലീസ്
പൊലീസ് നടത്തിയ ചോദ്യം ചെയ്യലിൽ കഞ്ചാവ് വാങ്ങിയതുമായി ബന്ധപ്പെട്ട വിവരങ്ങൾ ചൈതന്യ വെളിപ്പെടുത്തിയതായി അധികൃതർ അറിയിച്ചു.
ഹേമലതയുടെ പിറന്നാളിന് ഐഫോൺ സമ്മാനിക്കാൻ പണം കണ്ടെത്തുന്നതിനായാണ് ലഹരിക്കടത്തിന് ശ്രമിച്ചതെന്ന് ചൈതന്യ പറഞ്ഞതായി പൊലീസ് വ്യക്തമാക്കി.
കഞ്ചാവ് കടത്ത്; യുവാവിനെതിരെ മുൻ കേസുകളും
അതേസമയം, ചൈതന്യയ്ക്ക് കഞ്ചാവ് കടത്തുമായി ബന്ധപ്പെട്ട മുൻ കേസുകളുണ്ടെന്നും പൊലീസ് കണ്ടെത്തി.
സമാനമായ മൂന്ന് കേസുകളിൽ ഇയാൾ നേരത്തെ പ്രതിയായിരുന്നുവെന്നാണ് അന്വേഷണ സംഘത്തിന്റെ കണ്ടെത്തൽ. സംഭവത്തിൽ കൂടുതൽ അന്വേഷണം പുരോഗമിക്കുകയാണ്.
English Summary:
A young man and his girlfriend were arrested in Telangana’s Khammam district for allegedly smuggling cannabis. Police seized 12 kg of cannabis, four mobile phones and a bike. According to police, the man claimed he was trying to raise money to buy an iPhone as his girlfriend’s birthday gift. The investigation is continuing.
