കൊച്ചി: മിസ് യൂണിവേഴ്സ് ഇന്ത്യ 2026 കിരീടം നേടി ചരിത്രനേട്ടം സ്വന്തമാക്കിയ കെസിയ ലിസ് മെജോയ്ക്ക് സ്വന്തം നാടിന്റെ മണ്ണിൽ ആവേശോജ്ജ്വല സ്വീകരണം. ചരിത്രവിജയത്തിന് ശേഷം കൊച്ചിയിലെത്തിയ കെസിയയെ ആദരിക്കുന്നതിനായി ഗ്രാൻഡ് ഹയാത്ത് കൊച്ചി ബോൾഗാട്ടിയിൽ ‘ഹോം കമിങ്’ വാർത്താസമ്മേളനം സംഘടിപ്പിച്ചു.
മിസ് യൂണിവേഴ്സ് ഇന്ത്യ കിരീടം നേടുന്ന ആദ്യ മലയാളി എന്ന നേട്ടവുമായാണ് മാവേലിക്കര സ്വദേശിയായ കെസിയ മാധ്യമങ്ങൾക്ക് മുന്നിലെത്തിയത്.
52 മത്സരാർത്ഥികളെ പിന്നിലാക്കി ദേശീയ കിരീടം
ദി ഗ്ലമാനന്ദ് ഗ്രൂപ്പ് ജയ്പൂരിൽ സംഘടിപ്പിച്ച ദേശീയ ഫിനാലെയിൽ രാജ്യത്തിന്റെ വിവിധ ഭാഗങ്ങളിൽ നിന്നുള്ള 52 മത്സരാർത്ഥികളാണ് മാറ്റുരച്ചത്. ഇവരെ പിന്തള്ളിയാണ് രണ്ടാം വർഷ നിയമവിദ്യാർഥിയായ കെസിയ ദേശീയ കിരീടം സ്വന്തമാക്കിയത്.
ഇനി നവംബറിൽ പ്യൂർട്ടോ റിക്കോയിൽ നടക്കുന്ന 75-ാമത് മിസ് യൂണിവേഴ്സ് വേദിയിൽ ഇന്ത്യയെ പ്രതിനിധീകരിക്കാനുള്ള തയ്യാറെടുപ്പിലാണ് കെസിയ.
അർച്ചന രവിയുടെ പരിശീലനത്തിന് നന്ദി
തന്റെ വിജയത്തിന് പിന്നിൽ പ്രവർത്തിച്ച മിസ് യൂണിവേഴ്സ് കേരള ഓർഗനൈസേഷനും സ്റ്റേറ്റ് ഡയറക്ടർ അർച്ചന രവിക്കും കെസിയ നന്ദി രേഖപ്പെടുത്തി.
2020-ൽ മിസ് യൂണിവേഴ്സ് ഇന്ത്യ ടോപ്പ് 10ൽ ഇടം നേടിയ അർച്ചനയുടെ പരിശീലനവും മാർഗനിർദേശങ്ങളുമാണ് ദേശീയ കിരീടത്തിലേക്കുള്ള യാത്രയിൽ സഹായിച്ചതെന്ന് കെസിയ പറഞ്ഞു.
മിസ് ടീൻ പട്ടങ്ങളിൽനിന്ന് ദേശീയ കിരീടത്തിലേക്ക്
17-ാം വയസ്സിൽ മിസ് ടീൻ ദിവ 2024 പട്ടം നേടിയ കെസിയ, തുടർന്ന് 2025ൽ മിസ് ടീൻ ഇന്റർനാഷണലിൽ ഇന്ത്യയെ പ്രതിനിധീകരിച്ച് ഒന്നാം റണ്ണറപ്പായി.
മിസ് യൂണിവേഴ്സ് കേരള മത്സരത്തിലെ ഏറ്റവും പ്രായം കുറഞ്ഞ വിജയി കൂടിയായിരുന്നു കെസിയ. മുൻ മത്സരങ്ങളിൽ നേടിയ അനുഭവസമ്പത്തും പരിശീലനവും ദേശീയ വേദിയിലെ വിജയത്തിലേക്ക് വഴിയൊരുക്കുകയായിരുന്നു.
‘ബിക്കിനി റൗണ്ട് ആത്മവിശ്വാസത്തിന്റെ പ്രതിഫലനം’
സൗന്ദര്യമത്സരങ്ങളിലെ ബിക്കിനി റൗണ്ടുകളെക്കുറിച്ചുള്ള മാധ്യമപ്രവർത്തകരുടെ ചോദ്യത്തിനും കെസിയ നിലപാട് വ്യക്തമാക്കി.
വസ്ത്രത്തിനപ്പുറം സ്വയം പ്രകടിപ്പിക്കാനുള്ള അവസരവും ആത്മവിശ്വാസത്തിന്റെ പ്രതിഫലനവുമാണ് ഇത്തരം റൗണ്ടുകളെന്നാണ് തന്റെ അഭിപ്രായമെന്ന് കെസിയ പറഞ്ഞു. വ്യക്തിപരമായ ശാക്തീകരണത്തിന്റെയും ആത്മാഭിമാനത്തിന്റെയും പ്രകടനമായും ഇതിനെ കാണുന്നുവെന്നും അവർ വ്യക്തമാക്കി.
‘കേരളത്തെയും ഇന്ത്യയെയും പ്രതിനിധീകരിക്കാൻ കാത്തിരിക്കുന്നു’
പ്യൂർട്ടോ റിക്കോയിൽ നടക്കുന്ന മിസ് യൂണിവേഴ്സ് വേദിയിൽ കേരളത്തെയും ഇന്ത്യയെയും പ്രതിനിധീകരിക്കാൻ ഏറെ ആഗ്രഹത്തോടെ കാത്തിരിക്കുകയാണെന്ന് കെസിയ പറഞ്ഞു.
ഇതുവരെ ലഭിച്ച പിന്തുണ പോലെ ലോകവേദിയിലും മലയാളികളുടെ പ്രോത്സാഹനം ഒപ്പമുണ്ടാകണമെന്ന് അവർ അഭ്യർഥിച്ചു.
ബെംഗളൂരുവിൽ നിയമപഠനം
മാവേലിക്കര സ്വദേശികളായ മെജോ എബ്രഹാമിന്റെയും സുജ മെജോയുടെയും മകളാണ് കെസിയ ലിസ് മെജോ. നിലവിൽ ബെംഗളൂരുവിൽ നിയമപഠനം നടത്തിവരികയാണ്.
പ്യൂർട്ടോ റിക്കോയിലെ ലോകവേദിയിൽ ഇന്ത്യയുടെയും മലയാളികളുടെയും അഭിമാനം ഉയർത്തിപ്പിടിക്കാൻ എല്ലാവരുടെയും പ്രാർഥനയും പിന്തുണയും വേണമെന്ന് കെസിയ പറഞ്ഞു.
More Read
ചടങ്ങിൽ മിസ് യൂണിവേഴ്സ് കേരള ടീം അംഗങ്ങളും കെസിയയുടെ കുടുംബാംഗങ്ങളും പങ്കെടുത്തു.
English Summary:
Kezia Liz Mejo, who won the Miss Universe India 2026 title, received a grand homecoming in Kochi. The Mavelikkara native became the first Malayali to win the national title after competing against 52 contestants at the national finale in Jaipur. A second-year law student, Kezia will represent India at the 75th Miss Universe competition in Puerto Rico in November. She also thanked the Miss Universe Kerala organization and State Director Archana Ravi for their guidance and support.
