തിരുവനന്തപുരം: വൈദ്യുതി നിരക്ക് വർധനയുടെ അധികഭാരം ഉപഭോക്താക്കളിലേക്ക് എത്തുന്നത് പരമാവധി കുറയ്ക്കാൻ ലക്ഷ്യമിട്ട് പുതിയ മൾട്ടി ഇയർ താരിഫ് ചട്ടത്തിന്റെ കരട് പുറത്തിറക്കി സംസ്ഥാന വൈദ്യുതി റഗുലേറ്ററി കമ്മിഷൻ.
2021ലെ താരിഫ് ചട്ടങ്ങളുടെ കാലാവധി 2027 മാർച്ചിൽ അവസാനിക്കുന്ന സാഹചര്യത്തിലാണ് പുതിയ കരട് തയ്യാറാക്കിയത്.
പൊതുജനങ്ങളിൽനിന്ന് അഭിപ്രായങ്ങൾ സ്വീകരിച്ച ശേഷമായിരിക്കും അന്തിമ ഉത്തരവ് പുറപ്പെടുവിക്കുക. പുതിയ വൈദ്യുതി നിരക്ക് പരിഷ്കരണം 2027 ഏപ്രിൽ മുതൽ പ്രാബല്യത്തിൽ വരും.
വൈദ്യുതി നിരക്ക്: ഉപഭോക്താക്കളുടെ ഭാരം കുറയ്ക്കാൻ നിർദേശങ്ങൾ
നിലവിൽ വൈദ്യുതി വാങ്ങൽ ചെലവ് ഉയരുമ്പോൾ അതിന്റെ പ്രതിഫലനം താരിഫിലും ഉണ്ടാകുന്ന സാഹചര്യമാണ്. ഈ ഭാരം കുറയ്ക്കുന്നതിനായി വൈദ്യുതി വാങ്ങൽ ചെലവ് നിയന്ത്രിക്കുന്നതിനും ഊർജസംഭരണം പ്രോത്സാഹിപ്പിക്കുന്നതിനുമുള്ള നിർദേശങ്ങൾ കരടിൽ ഉൾപ്പെടുത്തിയിട്ടുണ്ട്.
ഇതുവഴി ഭാവിയിൽ വൈദ്യുതി നിരക്ക് പരിഷ്കരിക്കുമ്പോൾ ഉപഭോക്താക്കൾക്ക് ഉണ്ടാകുന്ന അധികഭാരം പരമാവധി കുറയ്ക്കാനാകുമെന്നാണ് കമ്മിഷന്റെ വിലയിരുത്തൽ.
കാര്യക്ഷമതയ്ക്കും സേവന നിലവാരത്തിനും പ്രാധാന്യം
വൈദ്യുതി ലൈസൻസികളുടെ കാര്യക്ഷമത, ഉത്തരവാദിത്തം, സേവന നിലവാരം എന്നിവ മെച്ചപ്പെടുത്തുന്നതിനും കരടിൽ ഊന്നൽ നൽകുന്നു. കൂടാതെ, മൂലധന നിക്ഷേപത്തിൽ കൂടുതൽ സൂക്ഷ്മത ഉറപ്പാക്കാനും നിർദേശമുണ്ട്.
വൈദ്യുതി മേഖലയിലെ പുതിയ മാറ്റങ്ങൾ, കേന്ദ്രസർക്കാരിന്റെ നയങ്ങൾ, പുതുതായി നിലവിൽ വന്ന ചട്ടങ്ങൾ എന്നിവ വിലയിരുത്തിയ ശേഷമാണ് കരട് തയ്യാറാക്കിയിരിക്കുന്നത്. ഈ ഘടകങ്ങൾ പരിഗണിച്ചായിരിക്കും അന്തിമ താരിഫ് പരിഷ്കരണം.
സോളാറിനും ജലവൈദ്യുതിക്കും ഊർജസംഭരണ ചട്ടക്കൂട്
സോളാർ വൈദ്യുതിക്കായി ബാറ്ററി എനർജി സ്റ്റോറേജ് സംവിധാനങ്ങൾക്കും ജലവൈദ്യുത പദ്ധതികൾക്കായി പമ്പ്ഡ് സ്റ്റോറേജ് ഉൾപ്പെടെയുള്ള ഊർജസംഭരണ സംവിധാനങ്ങൾക്കും താരിഫ് നിർണയിക്കുന്നതിനുള്ള ചട്ടക്കൂടും കരടിൽ നിർദേശിച്ചിട്ടുണ്ട്.
അതേസമയം, ഡിമാൻഡ് അധിഷ്ഠിത ഫിക്സഡ് ചാർജുകൾ, ടൈം ഓഫ് ഡേ (TOD) താരിഫ്, ഊർജസംഭരണ സഹായത്തോടെയുള്ള പീക്ക് താരിഫ്, ഗ്രീൻ താരിഫ് എന്നിവയും പുതിയ നിർദേശങ്ങളിൽ ഉൾപ്പെടുന്നു.
സെപ്റ്റംബർ 25 വരെ അഭിപ്രായം അറിയിക്കാം
പൊതുജനാഭിപ്രായം തേടുന്നതിനായി മൾട്ടി ഇയർ താരിഫ് ചട്ടത്തിന്റെ കരട് കമ്മിഷന്റെ വെബ്സൈറ്റിൽ പ്രസിദ്ധീകരിച്ചിട്ടുണ്ട്. സെപ്റ്റംബർ 18ന് മുമ്പ് വെബ്സൈറ്റിൽ രജിസ്റ്റർ ചെയ്ത് അഭിപ്രായം അറിയിക്കാം.
തപാൽ, ഇ-മെയിൽ മാർഗങ്ങളിലൂടെയും സെപ്റ്റംബർ 25 വരെ അഭിപ്രായങ്ങൾ സമർപ്പിക്കാം.
ഉയർന്ന വിലയ്ക്ക് വൈദ്യുതി വാങ്ങാൻ കെ.എസ്.ഇ.ബി
ഇതിനിടെ, സെപ്റ്റംബർ 1 മുതൽ 2027 മേയ് 15 വരെയുള്ള കാലയളവിൽ വിവിധ ഹ്രസ്വകാല കരാറുകളിലൂടെ ഉയർന്ന വിലയ്ക്ക് വൈദ്യുതി വാങ്ങാൻ അനുമതി തേടി കെ.എസ്.ഇ.ബി റഗുലേറ്ററി കമ്മിഷനെ സമീപിച്ചു.
വിവിധ സമയങ്ങളിലായി 200 മുതൽ 500 മെഗാവാട്ട് വരെ വൈദ്യുതി വാങ്ങാനാണ് നീക്കം. ചില കമ്പനികൾ യൂണിറ്റിന് 9.99 രൂപ വരെ ആവശ്യപ്പെട്ടിട്ടുണ്ട്.
എൽനിനോ സാഹചര്യം മൂലമുള്ള മഴക്കുറവ് മുന്നിൽക്കണ്ടാണ് വൈദ്യുതി വാങ്ങാനുള്ള കെ.എസ്.ഇ.ബി ഡയറക്ടർ ബോർഡ് തീരുമാനം. ടാറ്റ പവർ, എൻ.ടി.പി.സി, പി.ടി.സി, ആർ.പി.ജി തുടങ്ങിയ കമ്പനികളിൽനിന്ന് വൈദ്യുതി വാങ്ങാനാണ് തീരുമാനം.
