ന്യൂഡൽഹി: ഒമാൻ തീരത്ത് മിസൈൽ ആക്രമണത്തിന് ഇരയായ വ്യാപാര ടാങ്കറിലുണ്ടായിരുന്ന 24 ഇന്ത്യൻ നാവികരെ സുരക്ഷിതമായി രക്ഷപ്പെടുത്തിയതായി ഇന്ത്യൻ കോസ്റ്റ് ഗാർഡ് (ഐസിജി) അറിയിച്ചു. ഒമാനി അധികൃതരുമായി ചേർന്നാണ് രക്ഷാപ്രവർത്തനം ഏകോപിപ്പിച്ചതെന്ന് കോസ്റ്റ് ഗാർഡ് വ്യക്തമാക്കി.
ജൂൺ 8-ന് ഒമാനിലെ മസിറ തീരത്ത് നങ്കൂരമിട്ടിരുന്ന പലാവു പതാകയുള്ള എം.ടി. മാരിവെക്സ് എന്ന ടാങ്കറിന് നേരെയാണ് മിസൈൽ ആക്രമണമുണ്ടായതെന്നാണ് വിവരം. കപ്പലിലുണ്ടായിരുന്ന 24 ജീവനക്കാരും ഇന്ത്യൻ പൗരന്മാരായിരുന്നു.
കപ്പലിലെ ഒരാളുടെ ബന്ധുവാണ് അപകടവിവരം മുംബൈയിലെ മാരിടൈം റെസ്ക്യൂ കോർഡിനേഷൻ സെന്ററിനെ (എംആർസിസി) അറിയിച്ചത്. വിവരം ലഭിച്ച ഉടൻ എംആർസിസി ഒമാൻ മാരിടൈം സെർച്ച് ആൻഡ് റെസ്ക്യൂ സെന്ററുമായി (ഒഎംഎസ്സി) ബന്ധപ്പെടുകയും അടിയന്തര സഹായം അഭ്യർത്ഥിക്കുകയും ചെയ്തു.
സ്ഥിതിഗതികളുടെ ഗൗരവം കണക്കിലെടുത്ത് ഒമാൻ അധികൃതർ രണ്ട് രക്ഷാ ഹെലികോപ്റ്ററുകൾ സംഭവസ്ഥലത്തേക്ക് വിന്യസിച്ചു. തുടർന്ന് നടന്ന രക്ഷാപ്രവർത്തനത്തിൽ എല്ലാ ഇന്ത്യൻ നാവികരെയും സുരക്ഷിതമായി ഒഴിപ്പിക്കാൻ സാധിച്ചതായി ഇന്ത്യൻ കോസ്റ്റ് ഗാർഡ് അറിയിച്ചു.
രക്ഷാപ്രവർത്തനത്തിനിടെ മുംബൈയിലെയും ഒമാനിലെയും രക്ഷാകേന്ദ്രങ്ങൾ തമ്മിൽ തുടർച്ചയായ ഏകോപനം നിലനിർത്തിയതായും കോസ്റ്റ് ഗാർഡ് വ്യക്തമാക്കി.
More Read
ഒമാൻ നാവികസേനയുടെ ഹെലികോപ്റ്ററുകൾ ഉപയോഗിച്ചാണ് ജീവനക്കാരെ സുരക്ഷിത കേന്ദ്രങ്ങളിലേക്ക് മാറ്റിയത്. രക്ഷപ്പെടുത്തിയ എല്ലാവരും സുരക്ഷിതരാണെന്നും ആർക്കും പരിക്കുകളോ മറ്റ് നാശനഷ്ടങ്ങളോ സംഭവിച്ചിട്ടില്ലെന്നും റിപ്പോർട്ടുകൾ സൂചിപ്പിക്കുന്നു.
ആക്രമണത്തിനിരയായ കപ്പൽ നിലവിൽ ഒമാനിലെ മസിറയിൽ നങ്കൂരമിട്ടിരിക്കുകയാണെന്ന് അധികൃതർ അറിയിച്ചു.
English Summary
More Read
Twenty-four Indian crew members aboard the Palau-flagged tanker MT Marivex were safely rescued after a missile attack near the coast of Oman. The Indian Coast Guard coordinated with Omani maritime rescue authorities, who deployed helicopters to evacuate the crew. All crew members are reported safe and unharmed.
