സ്ത്രീശക്തി ലോട്ടറിയിൽ ഒരേ നമ്പറിൽ രണ്ട് ടിക്കറ്റുകൾ; അച്ചടിപ്പിഴവെന്ന് പരാതി

ഇന്ന് നറുക്കെടുക്കാനിരിക്കുന്ന സ്ത്രീശക്തി ലോട്ടറിയിൽ ഒരേ സീരിയലിലും ഒരേ നമ്പറിലുമുള്ള രണ്ട് ടിക്കറ്റുകൾ കണ്ടെത്തിയെന്ന് പരാതി. കൊല്ലം ചെറുമൂടിലെ ലോട്ടറി ഏജൻസിയിൽ വിൽപ്പനയ്ക്കായി എത്തിയ ടിക്കറ്റുകളിലാണ് അപാകത ശ്രദ്ധയിൽപ്പെട്ടത്. അച്ചടിപ്പിഴവാകാമെന്ന് സംശയിക്കുന്ന ലോട്ടറി വിൽപ്പനക്കാരൻ സന്തോഷ് ലോട്ടറി വകുപ്പിന് പരാതി നൽകി. ഒന്നാം സമ്മാനം ലഭിച്ചാൽ യഥാർഥ ടിക്കറ്റ് ഏതെന്ന് തിരിച്ചറിയുന്നതിൽ പ്രതിസന്ധിയുണ്ടാകുമെന്ന ആശങ്കയും ഉയർന്നിട്ടുണ്ട്.

300 ടിക്കറ്റുകൾ പരിശോധിക്കുന്നതിനിടെ അപാകത

ജില്ലാ ലോട്ടറി ഓഫീസിൽനിന്ന് വാങ്ങിയ 300 ടിക്കറ്റുകളിൽ രണ്ടെണ്ണത്തിനാണ് ഒരേ നമ്പറുള്ളതായി കണ്ടെത്തിയത്. കച്ചവടക്കാർക്ക് വിതരണം ചെയ്യുന്നതിനായി ടിക്കറ്റുകളുടെ ബിൽ തയ്യാറാക്കുന്നതിനിടെയാണ് സന്തോഷ് ഈ പിഴവ് ശ്രദ്ധിച്ചത്.

തുടർന്ന് ലോട്ടറി ഡയറക്ടർക്കും ജില്ലാ ലോട്ടറി ഓഫീസർക്കും ഇ-മെയിൽ വഴി പരാതി നൽകി. പരാതിയുടെ പകർപ്പും ബന്ധപ്പെട്ട ഉദ്യോഗസ്ഥർക്ക് കൈമാറിയിട്ടുണ്ട്.

രണ്ട് ടിക്കറ്റുകളും ഔദ്യോഗിക ആപ്പിൽ സ്കാൻ ചെയ്യാം

സർക്കാരിന്റെ ഔദ്യോഗിക ലോട്ടറി പോർട്ടൽ ആപ്പിൽ രണ്ട് ടിക്കറ്റുകളും സ്കാൻ ചെയ്യാൻ കഴിയുന്നുണ്ടെന്നാണ് സന്തോഷ് പറയുന്നത്. രണ്ടിലും തന്റെ ഏജൻസിയുടെ പേരും നമ്പറും കാണിക്കുന്നുണ്ടെന്നും അദ്ദേഹം വ്യക്തമാക്കി.

അച്ചടിപ്പിഴവാകാമെന്നാണ് പ്രാഥമിക സംശയം. സംഭവത്തിൽ സമഗ്രമായ അന്വേഷണം നടത്തി വ്യക്തത വരുത്തണമെന്നാണ് സന്തോഷിന്റെ ആവശ്യം.

ഒന്നാം സമ്മാനം ലഭിച്ചാൽ ഏത് ടിക്കറ്റിന്?

ഒരേ നമ്പറിലുള്ള രണ്ട് ടിക്കറ്റുകളിൽ ഏതെങ്കിലും ഒന്നിന് ഒന്നാം സമ്മാനം ലഭിച്ചാൽ യഥാർഥ ടിക്കറ്റ് ഏതെന്ന് എങ്ങനെ തിരിച്ചറിയുമെന്ന ചോദ്യമാണ് പ്രധാനമായും ഉയരുന്നത്. രണ്ട് ടിക്കറ്റുകളും വിറ്റുപോയാൽ സമ്മാനത്തുക മാറാനെത്തുന്ന ഏജന്റുമാരും പ്രതിസന്ധിയിലാകുമെന്ന് ആശങ്കയുണ്ട്.

ഒരു ടിക്കറ്റ് യഥാർഥമെന്നും മറ്റേത് വ്യാജമെന്നും അധികൃതർ വിലയിരുത്തിയാൽ വിൽപ്പന നടത്തിയ ഏജന്റുമാർ നിയമനടപടി നേരിടേണ്ടിവരുമെന്ന ആശങ്കയും സന്തോഷ് പങ്കുവച്ചു. എന്നാൽ ടിക്കറ്റുകളുടെ ആധികാരികത സംബന്ധിച്ച് ലോട്ടറി വകുപ്പിന്റെ ഔദ്യോഗിക വിശദീകരണം പുറത്തുവന്നിട്ടില്ല.

ലോട്ടറി മേഖലയിലെ വിശ്വാസ്യതയെ ബാധിക്കുമെന്ന് ആശങ്ക

ഇത്തരമൊരു സംഭവം മുമ്പ് ഉണ്ടായിട്ടില്ലെന്നും അച്ചടിപ്പിഴവുകളെക്കുറിച്ച് പത്രവാർത്തകളിലൂടെയാണ് അറിഞ്ഞിട്ടുള്ളതെന്നും സന്തോഷ് പറഞ്ഞു. ലോട്ടറി മേഖലയിലെ വിശ്വാസ്യതയെ ബാധിക്കുന്ന വിഷയമാണിതെന്നും അദ്ദേഹം ചൂണ്ടിക്കാട്ടി.

കഴിഞ്ഞ ആറുമാസമായി മേഖലയിൽ ജാഗ്രതക്കുറവ് അനുഭവപ്പെടുന്നുണ്ടെന്നും പ്രശ്നങ്ങൾ പരിഹരിക്കാൻ അധികൃതർ സമഗ്രമായി ഇടപെടണമെന്നും സന്തോഷ് ആവശ്യപ്പെട്ടു.

English Summary:

A complaint has been raised over two Kerala Sthree Sakthi lottery tickets allegedly carrying the same series and number. The tickets were found among 300 purchased from the Kollam District Lottery Office by an agent in Cherumoodu. The seller, Santhosh, has complained to the Lottery Director and District Lottery Officer, suspecting a printing error. He says both tickets can be scanned through the official lottery portal app and display his agency details. The complaint has raised concerns about prize claims if either ticket wins. An official clarification is awaited