സൗദിയിൽ മലയാളികൾക്ക് നേരെ ക്രൂര ആക്രമണം; 2.2 കോടി കവർന്നു

റിയാദ്: സൗദിയിലെ മലയാളികൾക്ക് നേരെ ക്രൂര ആക്രമണം നടത്തി വൻ കവർച്ച നടത്തിയെന്ന് പരാതി.

റിയാദിലെ നസീമിൽ താമസസ്ഥലത്ത് ഉറങ്ങിക്കിടന്നിരുന്ന മലയാളികളെ കെട്ടിയിട്ട് മർദിച്ച ശേഷമാണ് കവർച്ച നടന്നതെന്നാണ് വിവരം.

പത്ത് ലക്ഷത്തോളം റിയാലിന്റെ സിഗരറ്റും പണവും ഉൾപ്പെടെ കവർന്നതായാണ് പരാതി. ഏകദേശം 2.2 കോടിയിലധികം ഇന്ത്യൻ രൂപയുടെ നഷ്ടമാണുണ്ടായിരിക്കുന്നത്.

ഉറങ്ങിക്കിടന്ന മലയാളികളെ കെട്ടിയിട്ട് മർദിച്ചു

കഴിഞ്ഞദിവസം പുലർച്ചെ 2.30ഓടെയാണ് പാകിസ്ഥാൻ, അറബ് വംശജരടങ്ങുന്ന പതിനഞ്ചംഗ സംഘം നസീമിലെ ഫ്ലാറ്റിലേക്ക് അതിക്രമിച്ച് കയറിയതെന്നാണ് പരാതി.

റൂമിലുണ്ടായിരുന്നവരെ കത്തിയും കമ്പിപ്പാരയും ഉപയോഗിച്ച് മർദിച്ച് അവശരാക്കിയ ശേഷമാണ് കവർച്ച നടത്തിയതെന്നാണ് വിവരം. ആക്രമണത്തിൽ നിരവധി മലയാളികൾക്ക് പരിക്കേറ്റു.

ആറ് ലക്ഷം റിയാലിന്റെ സിഗരറ്റും മൂന്ന് ലക്ഷം റിയാൽ പണവും

സിഗരറ്റ് മൊത്തവ്യാപാര സ്ഥാപനത്തിലെ ജീവനക്കാരായ പട്ടാമ്പി നെല്ലിക്കാട്ടിൽ ഇസ്മായിൽ, ചങ്ങരംകുളം മൂക്കുതല സ്വദേശി മുസ്തഫ, കണ്ണൂർ സ്വദേശികളായ അസ്ലം, അനീഷ്, ശിബിൽ, അബ്ദുൽ വഹാബ്, മുസ്തഫ ബ്ലാത്തൂർ, ശംസീർ പെരുവളത്തുപറമ്പ്, ഹാരിസ് ബ്ലാത്തൂർ എന്നിവർക്കാണ് ആക്രമണത്തിൽ പരിക്കേറ്റത്.

താമസസ്ഥലത്തിന് മുന്നിൽ പാർക്ക് ചെയ്തിരുന്ന ടൊയോട്ട ഹായിസ് വാനും കൊറോള കാറും കുത്തിത്തുറന്ന് ആറ് ലക്ഷം റിയാൽ വിലമതിക്കുന്ന സിഗരറ്റും മൂന്ന് ലക്ഷം റിയാൽ പണവും കവർന്നതായി പരാതിയിൽ പറയുന്നു.

ശിഹാബിന്റെ 40,000 റിയാലും നഷ്ടപ്പെട്ടു

ഇതേ ഫ്ലാറ്റിൽ താമസിക്കുന്ന കണ്ണൂർ സ്വദേശി ശിഹാബിന്റെ 40,000 റിയാലും ലാപ്ടോപ്പുകളും മൊബൈൽ ഫോണുകളും നഷ്ടപ്പെട്ടതായും പരാതിയിലുണ്ട്.

കവർന്ന വാഹനങ്ങൾ പിന്നീട് ജിപിഎസ് ട്രാക്കിങ്ങിലൂടെ കണ്ടെത്തിയതായി ബന്ധപ്പെട്ടവർ അറിയിച്ചു. സംഭവത്തിൽ റിയാദ് പൊലീസിൽ പരാതി നൽകിയിട്ടുണ്ട്.

ചിലർ പൊലീസ് കസ്റ്റഡിയിലെന്ന് വിവരം

സംഭവവുമായി ബന്ധപ്പെട്ട് ചിലർ പൊലീസ് കസ്റ്റഡിയിലായതായാണ് വിവരം. അതേസമയം, കവർച്ചയുമായി ബന്ധപ്പെട്ട കൂടുതൽ വിവരങ്ങൾ പൊലീസ് അന്വേഷണത്തിലൂടെ വ്യക്തമാകേണ്ടതുണ്ട്.

ആക്രമണത്തിൽ പരിക്കേറ്റവരെ സമീപത്തെ ആശുപത്രിയിൽ പ്രവേശിപ്പിച്ചു. ഗുരുതരമായി പരിക്കേറ്റ ഷംസീറും ഹാരിസും തുടർ ചികിത്സയ്ക്കായി നാട്ടിലേക്ക് മടങ്ങി.

English Summary

A group of expatriate Malayalis were allegedly assaulted and robbed at their residence in Naseem, Riyadh. The attackers reportedly tied up and beat the victims before stealing cigarettes and cash worth around SAR 1 million, besides personal belongings. A police complaint has been filed, and some suspects are reportedly in custody.