കൊടുംചൂടിനെ തോൽപ്പിക്കാൻ പ്രധാനമന്ത്രി നരേന്ദ്ര മോദിയുടെ ‘മാസ്റ്റർ റെസിപ്പി’!

ന്യൂഡൽഹി: കൊടുംചൂടിനെ പ്രതിരോധിക്കാൻ കൃത്രിമ എനർജി ഡ്രിങ്കുകൾക്ക് പകരം പരമ്പരാഗത ഇന്ത്യൻ പാനീയങ്ങൾ തിരഞ്ഞെടുക്കണമെന്ന് പ്രധാനമന്ത്രി നരേന്ദ്ര മോദി. ‘മൻ കി ബാത്’ പരിപാടിയിലാണ് ഉത്തരേന്ത്യയിൽ വ്യാപകമായി ഉപയോഗിക്കുന്ന ‘സട്ടു’ പാനീയത്തെ അദ്ദേഹം പ്രത്യേകമായി പരാമർശിച്ചത്.

വറുത്ത കടല പൊടിച്ചാണ് സട്ടു തയ്യാറാക്കുന്നത്. ബിഹാർ, ജാർഖണ്ഡ്, കിഴക്കൻ ഉത്തർപ്രദേശ് തുടങ്ങിയ സംസ്ഥാനങ്ങളിൽ ഏറെ ജനപ്രിയമായ ഈ പാനീയം കുറഞ്ഞ ചെലവിൽ മികച്ച പോഷകഗുണങ്ങൾ നൽകുന്നതിനാൽ ‘പാവങ്ങളുടെ പ്രോട്ടീൻ’ എന്ന പേരിലും അറിയപ്പെടുന്നു.

സട്ടുവിൽ പ്രോട്ടീൻ, ഫൈബർ, ധാതുക്കൾ എന്നിവ ധാരാളമായി അടങ്ങിയിട്ടുണ്ട്. ശരീരത്തിന് ആവശ്യമായ ഊർജം ക്രമേണ ലഭ്യമാക്കാനും ചൂടുകാലത്ത് ശരീരത്തിലെ ജലാംശം നിലനിർത്താനും ഇത് സഹായിക്കുമെന്ന് ആരോഗ്യ വിദഗ്ധർ ചൂണ്ടിക്കാട്ടുന്നു.

മധുരമുള്ള സട്ടു പാനീയം

ചേരുവകൾ:

• സട്ടു പൊടി – 2 ടേബിൾസ്പൂൺ
• പഞ്ചസാര അല്ലെങ്കിൽ ശർക്കരപ്പൊടി – 1 ടേബിൾസ്പൂൺ
• നാരങ്ങാനീര് – പകുതി നാരങ്ങ
• വെള്ളം – ഒന്നേകാൽ കപ്പ്
• ഐസ് ക്യൂബുകൾ – ആവശ്യത്തിന്

തയ്യാറാക്കുന്ന വിധം: സട്ടു പൊടി അൽപം വെള്ളത്തിൽ കലക്കി കട്ടയില്ലാത്ത മിശ്രിതമാക്കുക. തുടർന്ന് പഞ്ചസാര, നാരങ്ങാനീര്, ബാക്കി വെള്ളം, ഐസ് ക്യൂബുകൾ എന്നിവ ചേർത്ത് നന്നായി ഇളക്കി കുടിക്കാം.

ഉപ്പും പുളിയും ചേർത്ത സട്ടു പാനീയം

ചേരുവകൾ:

• സട്ടു പൊടി – 2 ടേബിൾസ്പൂൺ
• ഉപ്പും കറുത്ത ഉപ്പും – ഓരോ നുള്ള്
• ജീരകപ്പൊടി അല്ലെങ്കിൽ കുരുമുളക് പൊടി – ഒരു നുള്ള്
• നാരങ്ങാനീര് – പകുതി നാരങ്ങ
• മല്ലിയില – ചെറുതായി അരിഞ്ഞത്
• വെള്ളം – ഒന്നേകാൽ കപ്പ്
• ഐസ് ക്യൂബുകൾ – ആവശ്യത്തിന്

തയ്യാറാക്കുന്ന വിധം: എല്ലാ ചേരുവകളും ചേർത്ത് നന്നായി ഇളക്കുക. നാരങ്ങയും കറുത്ത ഉപ്പും പാനീയത്തിന് ഉന്മേഷം നൽകുമ്പോൾ മല്ലിയില പ്രത്യേക രുചിയും സുഗന്ധവും പകരും.

വേനൽക്കാലത്ത് ദാഹം ശമിപ്പിക്കാനും ശരീരത്തിന് ആവശ്യമായ പോഷകങ്ങൾ നൽകാനും സട്ടു മികച്ച ഒരു പ്രകൃതിദത്ത പാനീയമാണെന്ന് വിദഗ്ധർ വിലയിരുത്തുന്നു.

English Summary:
Prime Minister Narendra Modi has highlighted the benefits of Sattu, a traditional drink made from roasted gram flour, as an effective beverage to beat the summer heat. Popular in Bihar and other northern states, Sattu is rich in protein, fiber, and nutrients, earning it the nickname “poor man’s protein.” It is considered a healthy alternative to sugary energy drinks.