ആശുപത്രി അധികൃതരുടെ അതിക്രൂര അനാസ്ഥ: സൂര്യാഘാതമേറ്റ് മരിച്ചയാളുടെ മൃതദേഹം തോളിലേറ്റി ബന്ധുക്കൾ നടന്നത് നാല് കിലോമീറ്റർ !

തെലങ്കാനയിലെ ഭദ്രാചലത്തിൽ സർക്കാർ ആശുപത്രി അധികൃതരുടെ ഗുരുതരമായ അനാസ്ഥയെത്തുടർന്ന്, മരിച്ചയാളുടെ മൃതദേഹം ബന്ധുക്കൾക്ക് തോളിലേറ്റി നടക്കേണ്ടി വന്ന സംഭവം വലിയ പ്രതിഷേധത്തിന് കാരണമാകുന്നു.

ഭദ്രാചലം സ്വദേശിയായ കാൻഡി വെങ്കണ്ണ (45) എന്നയാളുടെ മൃതദേഹമാണ് ആംബുലൻസോ മറ്റ് വാഹനങ്ങളോ ലഭിക്കാത്തതിനെ തുടർന്ന് ബന്ധുക്കൾക്ക് ചുമക്കേണ്ടി വന്നത്.

കഴിഞ്ഞ ആഴ്ച തെലങ്കാനയിലുണ്ടായ കടുത്ത ഉഷ്ണതരംഗത്തെ തുടർന്ന് സൂര്യാഘാതമേറ്റാണ് വെങ്കണ്ണയെ സമീപത്തെ സർക്കാർ ആശുപത്രിയിൽ പ്രവേശിപ്പിച്ചത്. എന്നാൽ ചികിത്സയിലിരിക്കെ അദ്ദേഹം മരണപ്പെടുകയായിരുന്നു.

ഇത്തരം അടിയന്തര സാഹചര്യങ്ങളിൽ ഉപയോഗിക്കാൻ ആശുപത്രിയിൽ വാഹന സൗകര്യം ഉണ്ടായിരുന്നിട്ടും, വെങ്കണ്ണയുടെ കുടുംബത്തിന് അത് വിട്ടുനൽകാൻ അധികൃതർ തയ്യാറായില്ലെന്ന് ആക്ഷേപമുണ്ട്.

മണിക്കൂറുകളോളം കാത്തുനിന്നിട്ടും സഹായം ലഭിക്കാതെ വന്നതോടെയാണ്, ബന്ധുക്കളും നാട്ടുകാരും ചേർന്ന് മൃതദേഹം ചുമലിലേറ്റി നാല് കിലോമീറ്ററോളം അകലെയുള്ള വീട്ടിലേക്ക് നടന്നത്.

കരളലിയിപ്പിക്കുന്ന ഈ ദൃശ്യം വഴിയാത്രക്കാരിലും പ്രദേശവാസികളിലും കടുത്ത അമർഷത്തിന് കാരണമായി. മൃതദേഹവുമായി ബന്ധുക്കൾ റോഡിലൂടെ പോകുന്ന ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതോടെയാണ് സംഭവം പുറംലോകമറിഞ്ഞത്.

ഇതേത്തുടർന്ന് ജില്ലാ ഭരണകൂടവും ആശുപത്രി അധികൃതരും വിഷയത്തിൽ ഇടപെടുകയും, കൃത്യസമയത്ത് വാഹനം അനുവദിക്കാതിരുന്നതിനെക്കുറിച്ച് അന്വേഷിക്കാൻ ഉത്തരവിടുകയും ചെയ്തിട്ടുണ്ട്.

സംഭവം പുറത്തുവന്നതോടെ തെലങ്കാനയിൽ ഭരണപക്ഷവും പ്രതിപക്ഷവും തമ്മിലുള്ള രാഷ്ട്രീയ പോര് ശക്തമായി.

സംസ്ഥാനത്തെ ആരോഗ്യ പരിപാലന രംഗം പൂർണ്ണമായി തകർന്നുവെന്ന് ആരോപിച്ച് ബി.ആർ.എസ് നേതാക്കൾ കോൺഗ്രസ് സർക്കാരിനെതിരെ രംഗത്തെത്തി.

കോൺഗ്രസ് ഭരണം തെലങ്കാനയെ വീണ്ടും ദുരിതത്തിലേക്കും നാണക്കേടിലേക്കും തള്ളിവിട്ടുവെന്ന് ബി.ആർ.എസ് വർക്കിംഗ് പ്രസിഡന്റ് കെ.ടി. രാമാറാവു എക്സ് പ്ലാറ്റ്ഫോമിൽ കുറിച്ചു.

കെ.സി.ആർ സർക്കാരിന്റെ കാലത്ത് പാവപ്പെട്ടവന്റെ അവസാന യാത്രയ്ക്ക് പോലും അർഹമായ ആദരവ് നൽകാൻ പ്രത്യേക മോർച്ചറി ട്രാൻസ്പോർട്ട് സൗകര്യങ്ങൾ ഉണ്ടായിരുന്നുവെന്നും എന്നാൽ ഇന്ന് മൃതദേഹങ്ങൾ തോളിലേറ്റേണ്ടി വരുന്നത് ഹൃദയഭേദകവും ലജ്ജാകരവുമാണെന്നും അദ്ദേഹം വ്യക്തമാക്കി.

പരസ്യങ്ങൾക്കും രാഷ്ട്രീയ പര്യടനങ്ങൾക്കും കോടികൾ ചെലവഴിക്കുന്ന സർക്കാർ പാവപ്പെട്ടവർക്ക് അടിസ്ഥാന സൗകര്യങ്ങൾ നിഷേധിക്കുകയാണെന്ന് അദ്ദേഹം കുറ്റപ്പെടുത്തി.

കോൺഗ്രസ് ഭരണത്തിൽ തെലങ്കാനയിലെ പൊതുജനാരോഗ്യ സംവിധാനം അതീവ ദയനീയമായ അവസ്ഥയിലാണെന്ന് ബി.ആർ.എസ് നേതാവ് ടി. ഹരീഷ് റാവു കുറ്റപ്പെടുത്തി.

മുൻ സർക്കാരിന്റെ കാലത്ത് പാവപ്പെട്ടവർക്കായി ഏർപ്പെടുത്തിയ 108 അടിയന്തര സേവനങ്ങളും സൗജന്യ വാഹന സൗകര്യങ്ങളും ഇപ്പോൾ എവിടെപ്പോയെന്നും, ഇത് വെറുമൊരു ഭരണപരമായ പരാജയമല്ല, മറിച്ച് സാധാരണക്കാരോട് കാണിക്കുന്ന ക്രൂരതയാണെന്നും അദ്ദേഹം കൂട്ടിച്ചേർത്തു.