അയർലണ്ടിൽ പഠനം പൂർത്തിയാക്കിയ ശേഷം താമസാനുമതി നീട്ടാൻ ശ്രമിക്കുന്ന ഇന്ത്യൻ വിദ്യാർഥികളെ ലക്ഷ്യമിട്ട് വ്യാജ വിദ്യാഭ്യാസ, പ്രവൃത്തിപരിചയ സർട്ടിഫിക്കറ്റുകൾ വിൽക്കുന്ന ശൃംഖല സജീവമാണെന്ന ഗുരുതര ആരോപണം ഉയരുന്നു. ഡബ്ലിൻ കേന്ദ്രീകരിച്ച് പ്രവർത്തിക്കുന്ന ഒരു കൺസൾട്ടൻസിയുടെ മറവിലാണ് ഈ തട്ടിപ്പ് നടക്കുന്നതെന്നാണ് ലഭിക്കുന്ന വിവരം. മലയാളിയാണ് ഈ ശൃംഖലയ്ക്ക് നേതൃത്വം നൽകുന്നതെന്നും ആരോപണമുണ്ട്.
സ്റ്റേ ബാക്ക് വിസയുള്ളവരാണ് പ്രധാന ലക്ഷ്യം
പഠനാനന്തര താമസാനുമതിയായ സ്റ്റേ ബാക്ക്, സ്റ്റാംപ് 1ജി വിസ എന്നിവയുടെ കാലാവധി അവസാനിക്കാനിരിക്കുന്ന വിദ്യാർഥികളെയാണ് സംഘം പ്രധാനമായും സമീപിക്കുന്നതെന്നാണ് വിവരം. സോഷ്യൽ കെയർ വർക്കർ, നഴ്സിങ് അസിസ്റ്റന്റ് തുടങ്ങിയ കോഴ്സുകളുടെ സർട്ടിഫിക്കറ്റുകളും പ്രവൃത്തിപരിചയ രേഖകളും പണം നൽകിയാൽ ഒരുക്കി നൽകാമെന്ന വാഗ്ദാനമാണ് നൽകുന്നത്. ഇതിലൂടെ ജോലി നേടാനും തുടർന്ന് വിസ നീട്ടാനുമാകുമെന്ന് വിശ്വസിപ്പിച്ചാണ് വിദ്യാർഥികളെ ആകർഷിക്കുന്നത്.
വൻതുക വാങ്ങി വ്യാജ രേഖകൾ
ഇന്ത്യയിലെ അംഗീകൃത വിദ്യാഭ്യാസ സ്ഥാപനങ്ങളുടെ പേരിൽ വ്യാജ സർട്ടിഫിക്കറ്റുകൾ തയ്യാറാക്കുന്നുവെന്നാണ് ആരോപണം. മദ്രാസ് സർവകലാശാല ഉൾപ്പെടെയുള്ള സ്ഥാപനങ്ങളുടെ പേരിലുള്ള രേഖകൾ വിതരണം ചെയ്യുന്നുവെന്നും ഒരു സർട്ടിഫിക്കറ്റിന് 2,000 മുതൽ 3,000 യൂറോ വരെ ഈടാക്കുന്നതായും വിവരം പുറത്തുവന്നിട്ടുണ്ട്. പ്രവൃത്തിപരിചയ സർട്ടിഫിക്കറ്റുകൾ കൂടി ഉൾപ്പെടുത്തിയാൽ ഈ തുക വീണ്ടും ഉയരുന്നതായും ആരോപണമുണ്ട്.
ഗുരുതര നിയമപ്രശ്നങ്ങൾക്ക് സാധ്യത
ഇത്തരം വ്യാജ രേഖകൾ ഉപയോഗിച്ച് ജോലി നേടിയാലും പിന്നീട് പരിശോധനയിൽ രേഖകൾ വ്യാജമാണെന്ന് തെളിഞ്ഞാൽ ഗുരുതര പ്രത്യാഘാതങ്ങൾ നേരിടേണ്ടിവരും. ജോലി നഷ്ടപ്പെടുക, വിസ റദ്ദാക്കപ്പെടുക, ഭാവിയിലെ കുടിയേറ്റ അപേക്ഷകൾ തള്ളപ്പെടുക, നാടുകടത്തൽ നടപടികൾ നേരിടുക, ക്രിമിനൽ അന്വേഷണത്തിന് വിധേയരാകുക തുടങ്ങിയ നിയമപരമായ പ്രതിസന്ധികൾ ഉണ്ടാകാൻ സാധ്യതയുണ്ടെന്ന് വിദഗ്ധർ മുന്നറിയിപ്പ് നൽകുന്നു.
More Read
വിദ്യാർഥികൾ ജാഗ്രത പാലിക്കണം
വിസ കാലാവധി അവസാനിക്കുന്നതിന്റെ ആശങ്കയും ജോലി നേടാനുള്ള സമ്മർദവും മുതലെടുത്താണ് ഇത്തരം തട്ടിപ്പ് ശൃംഖലകൾ പ്രവർത്തിക്കുന്നതെന്ന് വിലയിരുത്തപ്പെടുന്നു. വിദ്യാഭ്യാസ സ്ഥാപനങ്ങളുടെയോ റിക്രൂട്ട്മെന്റ് ഏജൻസികളുടെയോ പേരിൽ ലഭിക്കുന്ന സർട്ടിഫിക്കറ്റുകളുടെ ആധികാരികത ബന്ധപ്പെട്ട സ്ഥാപനങ്ങളുമായി നേരിട്ട് പരിശോധിക്കണമെന്നും, നിയമാനുസൃതമായ വിദ്യാഭ്യാസ-തൊഴിൽ മാർഗങ്ങൾ മാത്രമേ സ്വീകരിക്കാവൂ എന്നും വിദഗ്ധർ നിർദേശിക്കുന്നു.
