തൃശൂർ: കാലവർഷം ആരംഭിച്ച് ഒരാഴ്ച പിന്നിടുമ്പോൾ കേരളത്തിൽ സാധാരണ ലഭിക്കേണ്ടതിനെക്കാൾ 30 ശതമാനം അധികമഴ ലഭിച്ചതായി ഔദ്യോഗിക കണക്കുകൾ. ജൂൺ 4-ന് ആരംഭിച്ച കാലവർഷത്തിന് പിന്നാലെ സംസ്ഥാനത്ത് ഇതുവരെ 234.2 മില്ലിമീറ്റർ മഴ ലഭിച്ചു. സാധാരണയായി ഈ കാലയളവിൽ ലഭിക്കേണ്ടത് 182.2 മില്ലിമീറ്റർ മഴയാണ്.
ജൂൺ 10 വരെ ലക്ഷദ്വീപിലും മികച്ച മഴയാണ് രേഖപ്പെടുത്തിയത്. അവിടെ 218.7 മില്ലിമീറ്റർ മഴ ലഭിച്ചു. സംസ്ഥാനത്ത് ഏറ്റവും കൂടുതൽ മഴക്കൂടുതൽ രേഖപ്പെടുത്തിയ ജില്ലകൾ മലപ്പുറവും പത്തനംതിട്ടയുമാണ്. മലപ്പുറത്ത് സാധാരണ ലഭിക്കേണ്ട 162 മില്ലിമീറ്ററിന് പകരം 280.7 മില്ലിമീറ്റർ മഴ ലഭിച്ചതോടെ 73 ശതമാനം വർധന രേഖപ്പെടുത്തി. പത്തനംതിട്ടയിൽ 166.2 മില്ലിമീറ്ററിന് പകരം 269.2 മില്ലിമീറ്റർ മഴ ലഭിച്ച് 62 ശതമാനം വർധനയുണ്ടായി.
അതേസമയം, സംസ്ഥാനത്ത് മഴയിൽ കുറവ് രേഖപ്പെടുത്തിയ ഏക ജില്ല കൊല്ലമാണ്. അവിടെ കഴിഞ്ഞ വർഷത്തേക്കാൾ രണ്ട് ശതമാനം കുറവാണ് രേഖപ്പെടുത്തിയത്.
ജൂൺ ഒന്നിന് കാലവർഷം ആരംഭിക്കേണ്ട സമയത്ത് സംസ്ഥാനത്ത് 47 ശതമാനം മഴക്കുറവ് രേഖപ്പെടുത്തിയിരുന്നെങ്കിലും പിന്നീട് മഴ ശക്തിപ്രാപിച്ചതോടെ സ്ഥിതി പൂർണമായും മാറി. മിക്ക ജില്ലകളിലും സാധാരണയേക്കാൾ കൂടുതൽ മഴയാണ് ലഭിച്ചത്.
കോഴിക്കോട് ജില്ലയിലാണ് ഏറ്റവും കൂടുതൽ മഴ രേഖപ്പെടുത്തിയത്. ഇവിടെ 372.5 മില്ലിമീറ്റർ മഴ ലഭിച്ചു. കാസർകോട്, എറണാകുളം, കോട്ടയം, മലപ്പുറം, കണ്ണൂർ തുടങ്ങിയ ജില്ലകളിലും ഗണ്യമായ മഴ ലഭിച്ചു. ഇടുക്കിയിലും വയനാട്ടിലും മഴയിൽ നേരിയ വർധന മാത്രമാണ് രേഖപ്പെടുത്തിയത്.
More Read
സംസ്ഥാനത്ത് മഴ ശക്തമായി തുടരുന്ന സാഹചര്യത്തിൽ വിവിധ ജില്ലകളിൽ ജാഗ്രതാ നിർദേശങ്ങൾ നിലനിൽക്കുന്നുണ്ട്. അടുത്ത ദിവസങ്ങളിലും ശക്തമായ മഴ തുടരുമെന്നാണ് കാലാവസ്ഥാ നിരീക്ഷണ കേന്ദ്രങ്ങളുടെ മുന്നറിയിപ്പ്.
English Summary:
Kerala has received 30 percent excess rainfall within a week of the monsoon onset, according to official data. The state recorded 234.2 mm of rainfall against the normal 182.2 mm. Malappuram and Pathanamthitta witnessed the highest increase in rainfall, while Kollam was the only district to record a deficit. Weather agencies expect the wet conditions to continue in the coming days.
