ഫ്ലാറ്റ് ഒഴിപ്പിക്കാനുള്ള കോടതി ഉത്തരവ് നടപ്പാക്കാൻ എത്തിയ വീട്ടുടമയുടെ ഭാര്യയ്ക്ക് വെടിയേറ്റു. ചണ്ഡീഗഢിലെ സെക്ടർ 42-ലാണ് സംഭവം. വെടിയുതിർത്ത 67കാരനായ അഭിഭാഷകൻ ജെ.പി.എസ്. ചഢയെ പൊലീസ് അറസ്റ്റ് ചെയ്തു.
വീട്ടുടമ രാജിന്ദർ സിംഗിന്റെ ഭാര്യ മൻവീന്ദർ കൗറിനാണ് പരിക്കേറ്റത്. വെടിയുണ്ടയുടെ ചീളുകൾ മുഖത്ത് തുളച്ചുകയറിയതിനെ തുടർന്ന് ഇവരെ ആശുപത്രിയിൽ പ്രവേശിപ്പിച്ചു. ലൈസൻസുള്ള തോക്കാണ് പ്രതി ഉപയോഗിച്ചതെന്ന് പൊലീസ് അറിയിച്ചു.
കോടതി ഉത്തരവിനെ തുടർന്നായിരുന്നു ഒഴിപ്പിക്കൽ നടപടി
ചണ്ഡീഗഢ് ഫ്ലാറ്റ് ഒഴിപ്പിക്കൽ നടപടിയുടെ ഭാഗമായി കോടതി ഉദ്യോഗസ്ഥരും പൊലീസും മൻവീന്ദർ കൗറിനൊപ്പം സ്ഥലത്തെത്തിയിരുന്നു. 36 വർഷമായി ഫ്ലാറ്റിൽ താമസിച്ചിരുന്ന ജെ.പി.എസ്. ചഢയും ഫ്ലാറ്റ് ഉടമയും തമ്മിൽ ഏറെക്കാലമായി നിയമവഴക്കുണ്ടായിരുന്നു.
പലതവണ ആവശ്യപ്പെട്ടിട്ടും പ്രതി വാതിൽ തുറക്കാൻ തയ്യാറാകാത്തതിനാൽ കോടതി അനുമതിയുടെ അടിസ്ഥാനത്തിൽ പൊലീസ് പൂട്ട് പൊളിച്ച് അകത്ത് പ്രവേശിച്ചു.
ബാൽക്കണിയിൽ നിന്ന് വെടിയുതിർത്തെന്നാണ് പൊലീസ് വിശദീകരണം
പൂട്ട് പൊളിച്ചതിന് പിന്നാലെ പ്രതി തോക്കുമായി ബാൽക്കണിയിലെത്തി മൻവീന്ദർ കൗറിനുനേരെ വെടിയുതിർത്തെന്നാണ് പൊലീസ് പറയുന്നത്. വീണ്ടും വെടിവയ്ക്കാൻ ശ്രമിക്കുന്നതിനിടെ പൊലീസ് ഉദ്യോഗസ്ഥർ പ്രതിയെ ബലം പ്രയോഗിച്ച് കീഴ്പ്പെടുത്തി.
More Read
സംഭവത്തിന് പിന്നാലെ പൊലീസ് ഇയാളെ അറസ്റ്റ് ചെയ്ത് കേസെടുത്തു. സംഭവത്തിൽ കൂടുതൽ അന്വേഷണം പുരോഗമിക്കുകയാണ്.
മകന്റെ വാദവും പൊലീസ് നിലപാടും
അതേസമയം, ഫ്ലാറ്റിന്റെ കൈവശാവകാശം ഏറ്റെടുക്കാൻ കോടതി ഉത്തരവില്ലായിരുന്നുവെന്നും ചിലർ ബലമായി വീട്ടിൽ കയറാൻ ശ്രമിച്ചതാണെന്നുമാണ് പ്രതിയുടെ മകന്റെ ആരോപണം.
വർഷങ്ങളായി താമസിക്കുന്ന ഫ്ലാറ്റിൽ നിന്ന് ഒഴിപ്പിക്കുന്നതിനെതിരെ സ്റ്റേ ഉത്തരവുണ്ടെന്നും ഓഗസ്റ്റ് 3-ന് കേസിൽ വീണ്ടും വാദം കേൾക്കാനിരിക്കുകയാണെന്നും അദ്ദേഹം അവകാശപ്പെട്ടു. എന്നാൽ ഈ വാദം പൊലീസ് തള്ളിക്കളഞ്ഞു. കോടതി ഉത്തരവിന്റെ അടിസ്ഥാനത്തിലാണ് ഒഴിപ്പിക്കൽ നടപടികൾ സ്വീകരിച്ചതെന്ന് അധികൃതർ വ്യക്തമാക്കി.
