ന്യൂഡൽഹി: യുദ്ധവിമാന സ്പെയർ പാർടുകൾക്കായി വിദേശ വിതരണക്കാരെ ആശ്രയിച്ചിരുന്ന സാഹചര്യം ഗണ്യമായി കുറച്ച് ഇന്ത്യ. വ്യോമസേനയുടെ വിവിധ യൂണിറ്റുകൾക്ക് ആവശ്യമായ സ്പെയർ പാർടുകളിൽ 97 ശതമാനവും തദ്ദേശീയമായി നിർമ്മിക്കാൻ കഴിയുന്ന നിലയിലേക്ക് രാജ്യം മുന്നേറി.
പ്രതിരോധ മേഖലയിലെ തദ്ദേശീയവത്കരണത്തിന്റെ ഭാഗമായി നേടിയ നിർണായക നേട്ടമാണിത്. വിദേശ ഘടകങ്ങളുടെ ആശ്രിതത്വം കുറയ്ക്കുന്നതിനൊപ്പം വിമാനങ്ങളുടെ അറ്റകുറ്റപ്പണിയും പരിപാലനവും കൂടുതൽ കാര്യക്ഷമമാക്കാനും നീക്കം സഹായിക്കും.
യുദ്ധവിമാന സ്പെയർ പാർടുകൾ ഇനി ഇന്ത്യയിൽ
യുദ്ധവിമാനങ്ങളിലെ ബാറ്ററികൾ, പൈലറ്റ് പാരച്യൂട്ടുകൾ, ഇജക്ഷൻ സീറ്റുകളിലെ എസ്കേപ്പ് എയർ എക്സ്പ്ലോസീവുകൾ, ടയറുകൾ, പവർ കാർട്ടുകൾ തുടങ്ങിയ നിരവധി ഘടകങ്ങൾക്കായി നേരത്തെ വിദേശ വിതരണക്കാരെ ആശ്രയിക്കേണ്ടി വന്നിരുന്നു.
എന്നാൽ, ഇവയിൽ ഭൂരിഭാഗവും ഇപ്പോൾ രാജ്യത്തിനകത്ത് തന്നെ നിർമ്മിക്കുന്നുണ്ട്. വ്യോമസേനയുടെ വിവിധ യൂണിറ്റുകൾക്ക് ആവശ്യമായ 97 ശതമാനം സ്പെയർ പാർടുകളും തദ്ദേശീയമായി നിർമ്മിക്കുന്ന നിലയിലേക്ക് ഇന്ത്യ എത്തിയിട്ടുണ്ട്.
റഫാൽ മുതൽ സുഖോയ് വരെ തദ്ദേശീയ നീക്കം
സുഖോയ്-30 എംകെഐ, മിഗ്-29, മി-17 ഹെലികോപ്റ്ററുകൾ, എഎൻ-32 വിമാനങ്ങൾ എന്നിവയ്ക്കൊപ്പം ഫ്രഞ്ച് നിർമിത മിറാഷ്-2000, റഫാൽ വിമാനങ്ങളും വ്യോമസേന ഉപയോഗിക്കുന്നുണ്ട്.
More Read
വിവിധ രാജ്യങ്ങളിൽ നിർമിച്ച വിമാനങ്ങളുടെ വലിയ വ്യൂഹം പ്രവർത്തിപ്പിക്കുമ്പോഴും അവയ്ക്കാവശ്യമായ സ്പെയർ പാർടുകൾ ഇന്ത്യയിൽ തന്നെ വികസിപ്പിക്കുകയാണ്. അറ്റകുറ്റപ്പണികൾക്കായി റഷ്യൻ കമ്പനികളുമായും വ്യോമസേന സഹകരിച്ച് പ്രവർത്തിക്കുന്നു.
62,300 സ്പെയർ പാർടുകൾ തദ്ദേശീയമായി വികസിപ്പിച്ചു
തദ്ദേശീയവത്കരണത്തിന്റെ ഭാഗമായി വ്യോമസേനയുടെ മെയിന്റനൻസ് കമാൻഡ് മാത്രം ഏകദേശം 62,300 സ്പെയർ പാർടുകൾ വികസിപ്പിച്ചിട്ടുണ്ട്.
കഴിഞ്ഞ അഞ്ച് വർഷത്തിനിടെ ഇതിലൂടെ 582 കോടി രൂപയുടെ വിദേശനാണ്യം ലാഭിക്കാൻ വ്യോമസേനയ്ക്ക് കഴിഞ്ഞു. കൂടാതെ, വിദേശ ഘടകങ്ങളെ ആശ്രയിക്കുന്നത് കുറയ്ക്കാനുള്ള ശ്രമങ്ങളും ശക്തമാക്കി.
More Read
3D പ്രിന്റിങ്ങിലും മുന്നേറ്റം
വിദേശ ഘടകങ്ങളിലുള്ള ആശ്രിതത്വം കുറയ്ക്കുന്നതിനായി 2022 മുതൽ വ്യോമസേന 3D പ്രിന്റിങ് സാങ്കേതികവിദ്യയും ഉപയോഗിച്ചുവരുന്നു.
ആവശ്യമായ ചില ഘടകങ്ങൾ വേഗത്തിൽ വികസിപ്പിക്കാനും നിർമ്മിക്കാനും ഈ സാങ്കേതികവിദ്യ സഹായിക്കുന്നു. അതേസമയം, പ്രതിരോധ ഉൽപ്പാദന രംഗത്തെ തദ്ദേശീയ ശേഷി വർധിപ്പിക്കുന്നതിനും ഇത് വഴിയൊരുക്കുന്നു.
