ഹിമാലയത്തെ മെരുക്കാമെന്ന ധാരണ തിരുത്തണം; സുനിത നാരായൺ

മഹാപർവതങ്ങളെയും അവയിൽനിന്ന് ഉത്ഭവിക്കുന്ന നദികളെയും എൻജിനീയറിങ്ങിന്റെ കരുത്തിൽ മനുഷ്യന് ഇഷ്ടാനുസരണം നിയന്ത്രിക്കാമെന്ന ധാരണ തിരുത്തണമെന്ന് പരിസ്ഥിതി പ്രവർത്തകയും ന്യൂഡൽഹിയിലെ സെന്റർ ഫോർ സയൻസ് ആൻഡ് എൻവയൺമെന്റ് മേധാവിയുമായ സുനിത നാരായൺ. നേപ്പാളിലെ ഹിമതടാക പ്രളയത്തിന്റെ പശ്ചാത്തലത്തിൽ നൽകിയ ഓൺലൈൻ അഭിമുഖത്തിലാണ് ഹിമാലയത്തിലെ ദുരന്തം സംബന്ധിച്ച അപകടസാധ്യതകളിലേക്ക് അവർ വിരൽചൂണ്ടിയത്.

ഹിമാലയത്തിലെ ദുരന്തം: വികസനത്തിന്റെ ധാർഷ്ട്യം ഉപേക്ഷിക്കണം

കാലാവസ്ഥാ മാറ്റവും പ്രകൃതിയുടെ സ്വഭാവം അവഗണിച്ചുള്ള വികസനവും ഒന്നിക്കുമ്പോഴുണ്ടാകുന്ന ദുരന്തങ്ങളുടെ തുടർച്ചയാണ് കേദാർനാഥ് മുതൽ നേപ്പാൾ വരെയുള്ള ഹിമാലയൻ മേഖലയിൽ കാണുന്നതെന്ന് സുനിത നാരായൺ പറഞ്ഞു.

പുഴകളെയും പർവതങ്ങളെയും മനുഷ്യന്റെ സൗകര്യത്തിനനുസരിച്ച് മാറ്റിമറിക്കാമെന്ന സമീപനം പതിറ്റാണ്ടുകളായി തുടരുകയാണ്. എന്നാൽ നേപ്പാളിലെ ദുരന്തം ഈ ധാരണയുടെ അപകടകരമായ പ്രത്യാഘാതങ്ങളാണ് വ്യക്തമാക്കുന്നതെന്നും അവർ പറഞ്ഞു.

ഏത് ഉയരത്തെയും എത്ര ആഴത്തെയും കീഴടക്കാമെന്ന മനുഷ്യന്റെ ധാർഷ്ട്യം ഉപേക്ഷിക്കേണ്ട സമയമാണിതെന്നും സുനിത നാരായൺ വ്യക്തമാക്കി.

ഹിമാലയത്തിലെ ദുരന്തം: വികസനം വേണം, പക്ഷേ പ്രകൃതിക്കിണങ്ങണം

ഹിമാലയത്തിൽ വികസനം പൂർണമായി നിരോധിക്കണമെന്നല്ല തന്റെ നിലപാടെന്ന് സുനിത പറഞ്ഞു. എന്നാൽ പാരിസ്ഥിതികവും ഭൂമിശാസ്ത്രപരവുമായ പ്രത്യേകതകൾക്ക് ഇണങ്ങുന്ന രീതിയിലായിരിക്കണം വികസനം.

പുതിയ ജലവൈദ്യുതി പദ്ധതികൾ, ഡാമുകൾ, റെയിൽപാതകൾ, റോഡുകൾ, ടൂറിസം സർക്യൂട്ടുകൾ, കെട്ടിടങ്ങൾ തുടങ്ങിയ വൻകിട പദ്ധതികൾ ആസൂത്രണം ചെയ്യുമ്പോൾ പ്രദേശത്തിന്റെ അടിസ്ഥാന ഭൂമിശാസ്ത്ര യാഥാർഥ്യങ്ങൾ പരിഗണിക്കണം.

ലോകത്തിലെ ഏറ്റവും ഇളം പർവതനിരകളിലൊന്നായ ഹിമാലയത്തിലെ മലഞ്ചരിവുകൾക്ക് സ്വാഭാവികമായി തന്നെ സ്ഥിരത കുറവാണ്. പല മേഖലകളിലും താഴേക്ക് പതിക്കാൻ സാധ്യതയുള്ള പാറകളുടെ അടരുകളാണുള്ളത്.

മഞ്ഞുരുകുന്നതോടെ പാറകൾ അയഞ്ഞുതുടങ്ങുകയും ചെറിയ മഴയിൽപോലും മണ്ണിടിച്ചിലും പാറയിടിച്ചിലും ഉണ്ടാകാനുള്ള സാധ്യത വർധിക്കുകയും ചെയ്യും. ഈ അടിസ്ഥാന എൻജിനീയറിങ് യാഥാർഥ്യം പോലും അവഗണിച്ചാണ് പലപ്പോഴും വികസനപദ്ധതികൾ നടപ്പാക്കുന്നതെന്ന് അവർ ചൂണ്ടിക്കാട്ടി.

ഭൂചലനവും തീവ്രമഴയും; ഹിമാലയത്തിന് ഇരട്ട ഭീഷണി

മഞ്ഞുരുക്കം മാത്രമല്ല ഹിമാലയത്തിലെ ദുരന്തം രൂക്ഷമാക്കുന്ന ഘടകമെന്ന് സുനിത മുന്നറിയിപ്പ് നൽകി. ഒരു നൂറ്റാണ്ടിലേറെയായി തുടരുന്ന ഭൂമിശാസ്ത്രപരമായ സമ്മർദം ഹിമാലയൻ ഭൗമപാളികളിൽ കെട്ടിക്കിടക്കുന്നതിനാൽ വലിയ ഭൂചലനത്തിനുള്ള സാധ്യത നിലനിൽക്കുന്നു.

ഇതിനൊപ്പമാണ് കാലാവസ്ഥാ വ്യതിയാനവും ആഗോളതാപനവും സൃഷ്ടിക്കുന്ന തീവ്രമഴയും മറ്റ് കാലാവസ്ഥാ പ്രതിഭാസങ്ങളും.

മേഘസ്ഫോടനത്തെ തുടർന്നുള്ള അതിതീവ്രമഴ ഹിമാചൽ പ്രദേശിൽ പലതവണ ഉണ്ടായിട്ടുണ്ട്. ഉത്തരേന്ത്യയിലേക്ക് മഴയെത്തിക്കുന്ന പശ്ചിമവാത മേഘങ്ങൾ ഇപ്പോൾ കൂടുതൽ ജലഭാരം വഹിച്ചാണ് എത്തുന്നതെന്നും അവർ പറഞ്ഞു.

ഈ അധികമഴയ്ക്കൊപ്പം ചൂട് വർധിക്കുന്നതുമൂലം മഞ്ഞുരുകൽ ശക്തമാകുന്നു. അതോടെ ഹിമാലയത്തിന്റെ സ്വാഭാവിക സ്ഥിരത കൂടുതൽ ദുർബലമാകുകയും ഹിമതടാകങ്ങൾ പൊട്ടിത്തെറിച്ചുണ്ടാകുന്ന പ്രളയങ്ങൾ ഉൾപ്പെടെയുള്ള ദുരന്തസാധ്യത വർധിക്കുകയും ചെയ്യുന്നു.

ഭൂവിനിയോഗരീതികൾ അടിയന്തരമായി തിരുത്തണം

ലോകം കാർബൺ ഇന്ധനങ്ങളുടെ ഉപയോഗം തുടരുകയും കാലാവസ്ഥാ കരാറുകളിലെ ലക്ഷ്യങ്ങൾ പൂർണമായി പാലിക്കപ്പെടാതിരിക്കുകയും ചെയ്യുന്ന സാഹചര്യത്തിൽ കൂടുതൽ ചൂടും അതിതീവ്രമഴയും ഹിമതടാക വിസ്ഫോടന പ്രളയവും (ഗ്ലോഫ്) വരുംകാലത്ത് വർധിക്കുമെന്ന് സുനിത നാരായൺ പറഞ്ഞു.

ഈ യാഥാർഥ്യം കണക്കിലെടുത്ത് ഭൂവിനിയോഗരീതികളിൽ അടിയന്തര മാറ്റം വരുത്തണം. മഞ്ഞുമലകൾ ഇടിഞ്ഞുവീഴാൻ സാധ്യതയുള്ള മേഖലകളിൽ ജനവാസം പ്രോത്സാഹിപ്പിക്കരുത്.

പ്രളയസമതലങ്ങൾ കൈയേറി നടത്തുന്ന നിർമാണങ്ങളും വികസനവും ആത്മഹത്യാപരമാണ്. ഹിമാലയൻ നദികളുടെ സ്വാഭാവിക ഒഴുക്കുവഴികളിലേക്ക് മനുഷ്യൻ കടന്നുകയറുന്നത് അവസാനിപ്പിക്കണമെന്നും അവർ ആവശ്യപ്പെട്ടു.

പ്രകൃതിയെ മാത്രം പഴിചാരിയിട്ട് കാര്യമില്ല

പ്രകൃതിയുടെ പ്രതികാരമെന്ന നിലയിൽ മാത്രം ഇത്തരം ദുരന്തങ്ങളെ കാണരുതെന്നും സുനിത നാരായൺ വ്യക്തമാക്കി. കാലാവസ്ഥാ വ്യവസ്ഥയുടെ താളം തെറ്റിയ സാഹചര്യത്തിൽ ഏത് സമയത്തും ഏത് പ്രദേശത്തും ദുരന്തമുണ്ടാകാം.

താപനം വർധിച്ചുകൊണ്ടിരിക്കുന്ന ലോകത്ത് പ്രകൃതി ഇനിയും സൗമ്യമായി തുടരുമെന്ന് പ്രതീക്ഷിക്കുന്നത് മൗഢ്യമാണെന്നും അവർ പറഞ്ഞു.

പ്രകൃതിശക്തികളെയോ വിധിയെയോ കാലാവസ്ഥാ വ്യതിയാനത്തെയോ മാത്രം പഴിചാരുന്നതിന് പകരം മനുഷ്യന്റെ വികസനരീതികൾ തന്നെയാണ് പുനഃപരിശോധിക്കേണ്ടത്. ഇപ്പോഴുണ്ടാകുന്ന ദുരന്തങ്ങൾ മനുഷ്യന്റെ പ്രവർത്തനങ്ങളുടെ പ്രത്യാഘാതങ്ങളാണെന്ന് തിരിച്ചറിഞ്ഞ് തിരുത്തൽ നടപടികൾ എത്രയും വേഗം ആരംഭിക്കണം.

മഹാപർവതങ്ങൾ പോലും താഴേക്ക് പതിക്കാവുന്ന അപകടകരമായ കാലഘട്ടമാണ് മുന്നിലുള്ളതെന്ന് സുനിത നാരായൺ മുന്നറിയിപ്പ് നൽകി. വികസനത്തിന്റെ ധാർഷ്ട്യവേഗം ഉപേക്ഷിച്ച് പ്രകൃതിയോട് കൂടുതൽ ഉത്തരവാദിത്തത്തോടെ പെരുമാറുകയാണ് ഇനി മനുഷ്യരാശിയുടെ മുന്നിലുള്ള വഴി. അല്ലാത്തപക്ഷം കാലാവസ്ഥാ വ്യതിയാനം മനുഷ്യജീവിതത്തിന്റെ അടിവേരുതന്നെ ഇളക്കിമറിക്കുമെന്നും അവർ പറഞ്ഞു.