വിമാനത്തിന്റെ കോക്പിറ്റിൽ സഹപൈലറ്റ് കത്തിയുമായി ആക്രമിച്ചിട്ടും സ്ഥിതിഗതികൾ നിയന്ത്രിച്ച് വിമാനം രക്ഷിച്ചതായി റിപ്പോർട്ട് ചെയ്യപ്പെടുന്ന ഫ്‌ളൈദുബായ്പൈ ലറ്റിനെ അമേരിക്കൻ പ്രസിഡന്റ് ഡോണൾഡ് ട്രംപ് പ്രശംസിച്ചു. പൈലറ്റിന്റെ ധീരതയെ ട്രംപ് ‘ഹീറോയിസം’ എന്നാണ് വിശേഷിപ്പിച്ചത്.
ഫ്‌ളൈദുബായ് പൈലറ്റിന് നേരെ കോക്പിറ്റിൽ കത്തിയാക്രമണം
ദുബായിൽനിന്ന് ഇസ്രയേലിലേക്ക് പറന്ന ഫ്‌ളൈദുബായ് വിമാനത്തിലാണ് സംഭവം. പൈലറ്റ് സ്മിത് മച്ചാർ ആക്രമിക്കപ്പെട്ടതിനെ തുടർന്ന് വിമാനത്തിനുള്ളിൽ അടിയന്തര സാഹചര്യം രൂപപ്പെട്ടു.
കത്തിയാക്രമണത്തിൽ പൈലറ്റിന് ഗുരുതരമായി പരിക്കേറ്റതായി റിപ്പോർട്ടുണ്ട്. ആക്രമണത്തിന് പിന്നാലെ വിമാനം ഏകദേശം 30 സെക്കൻഡിനുള്ളിൽ 14,000 അടി താഴേക്ക് ഇറങ്ങിയതായും റിപ്പോർട്ടുകൾ പറയുന്നു.
യാത്രക്കാരുടെ സഹായം തേടി പൈലറ്റ്
ആക്രമണത്തിനുശേഷം ഫ്‌ളൈദുബായ് പൈലറ്റ് കോക്പിറ്റ് വാതിൽ തുറന്ന് യാത്രക്കാരോട് സഹായം തേടിയതായി ട്രംപ് പറഞ്ഞു. തുടർന്ന് യാത്രക്കാർ എത്തി സഹപൈലറ്റിനെ നിയന്ത്രിച്ചതായും അദ്ദേഹം വ്യക്തമാക്കി.
രക്തത്തിൽ കുളിച്ച നിലയിൽ കണ്ടെത്തിയ പൈലറ്റിനെ ഒരു ഇസ്രയേലി യാത്രക്കാരൻ സഹായിച്ചതായും ട്രംപ് പറഞ്ഞു. വിമാനത്തിൽ ആക്രമണം നടക്കുമ്പോൾ 174 യാത്രക്കാരും ജീവനക്കാരുമുണ്ടായിരുന്നുവെന്നാണ് റിപ്പോർട്ട്.
സൗദിയിലെ ടബൂക്കിൽ അടിയന്തര ലാൻഡിങ്
സംഭവത്തെ തുടർന്ന് വിമാനം സൗദി അറേബ്യയിലെ ടബൂക്ക് വിമാനത്താവളത്തിൽ അടിയന്തരമായി ഇറക്കി. വിമാനത്തിലുണ്ടായിരുന്ന മറ്റൊരു ഫ്‌ളൈദുബായ് പൈലറ്റ് വിമാനം സുരക്ഷിതമായി ലാൻഡ് ചെയ്തതായി റിപ്പോർട്ടിൽ പറയുന്നു.
ഇതിനിടെ പരിക്കേറ്റ പൈലറ്റ് ടബൂക്ക് ആശുപത്രിയിൽ ചികിത്സയിലാണ്. അദ്ദേഹത്തിന്റെ ആരോഗ്യനില നിലവിൽ സ്ഥിരതയുള്ളതാണെന്നാണ് റിപ്പോർട്ട്.
‘പൈലറ്റ് ഒരു ഹീറോ’; ട്രംപിന്റെ പ്രശംസ
ഓവൽ ഓഫീസിൽ മാധ്യമപ്രവർത്തകരോട് സംസാരിക്കവെയാണ് ട്രംപ് Flydubai പൈലറ്റിന്റെ ധീരതയെ പ്രശംസിച്ചത്. പൈലറ്റിന്റെ നില ഗുരുതരമായിരുന്നേക്കാമെങ്കിലും അദ്ദേഹം കാട്ടിയ ധൈര്യം അസാധാരണമായിരുന്നുവെന്നും ട്രംപ് പറഞ്ഞു.
സഹപൈലറ്റ് വിമാനം തകർക്കാൻ ഗൂഢാലോചന നടത്തിയിരിക്കാമെന്നും ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവുമായി ഇക്കാര്യം സംസാരിച്ചതായും ട്രംപ് പറഞ്ഞു.
English summary: US President Donald Trump praised the Flydubai pilot, calling him a hero after the co-pilot allegedly attacked him with a knife inside the cockpit. The aircraft, carrying 174 people, reportedly lost around 14,000 feet in 30 seconds before making an emergency landing in Tabuk, Saudi Arabia. The injured pilot is receiving treatment and is reported to be in stable condition.
