35 വർഷമായി ഒഴിഞ്ഞുകിടക്കുന്നു; രാത്രിയിൽ അപരിചിത ശബ്ദങ്ങളും നിലവിളികളും, കുട്ടികളുടെ ചിരിയും: ‘പ്രേതബംഗ്ലാവ്’ വിൽപനയ്ക്ക്…!

‘പ്രേതബംഗ്ലാവ്’ വിൽപനയ്ക്ക്

ദുബായ്∙ പകൽസമയത്ത് ആകർഷകമായ വാസ്തുവിദ്യയുടെ ഉദാഹരണമായി തോന്നുന്ന കൂറ്റൻ കൊട്ടാരം. എന്നാൽ രാത്രിയാകുമ്പോൾ അപരിചിത ശബ്ദങ്ങളും നിലവിളികളും കുട്ടികളുടെ ചിരിയും കേൾക്കാമെന്ന കഥകൾ. ജനലുകളിൽ തെളിയുന്ന വിചിത്ര നിഴലുകളും വെളിച്ചങ്ങളും. പതിറ്റാണ്ടുകളായി ഗൾഫ് മലയാളികൾക്കിടയിൽ കൗതുകത്തിന്റെയും നിഗൂഢതയുടെയും കഥകൾക്ക് ഇടം നൽകിയ റാസൽഖൈമയിലെ അൽ ഖാസിമി കൊട്ടാരം വീണ്ടും വിൽപനയ്ക്ക് എത്തിയിരിക്കുകയാണ്.

യുഎഇയിലെ അൽ ദൈത് നോർത്തിൽ കുന്നിൻ മുകളിലായി സ്ഥിതി ചെയ്യുന്ന ഈ കൂറ്റൻ മന്ദിരം ‘പ്രേതബംഗ്ലാവ്’ എന്ന പേരിലാണ് ഏറെക്കാലമായി അറിയപ്പെടുന്നത്. എന്നാൽ ഇന്ന് പ്രേതകഥകൾക്കപ്പുറം ചരിത്രവും വാസ്തുവിദ്യയും കലാശേഖരവും കൊണ്ട് ശ്രദ്ധ നേടുകയാണ് കൊട്ടാരം. രാജ്യാന്തര നിക്ഷേപകരും മന്ദിരം സ്വന്തമാക്കുന്നതിൽ താൽപര്യം പ്രകടിപ്പിക്കുന്നതായി റിയൽ എസ്റ്റേറ്റ് മേഖലയിലുള്ളവർ പറയുന്നു.

35 കിടപ്പുമുറികളുള്ള കൂറ്റൻ മന്ദിരം

നാലുനിലകളിലായി 35 കിടപ്പുമുറികളാണ് അൽ ഖാസിമി കൊട്ടാരത്തിലുള്ളത്. ഏകദേശം 1,91,742 ചതുരശ്ര അടി വിസ്തൃതിയുള്ള സ്ഥലത്താണ് മന്ദിരം നിർമിച്ചിരിക്കുന്നത്. കെട്ടിടത്തിന്റെ മാത്രം നിർമാണ വിസ്തീർണം 33,827 ചതുരശ്ര അടിയാണ്.

നിലവിലെ ലിസ്റ്റിങ് അനുസരിച്ച് ഫർണിച്ചറുകൾ ഉൾപ്പെടാത്ത കൊട്ടാരത്തിന് 2.25 കോടി ദിർഹമാണ് വില നിശ്ചയിച്ചിരിക്കുന്നത്. പുരാതന വസ്തുക്കളും വിവിധ അലങ്കാര ശേഖരങ്ങളും ഉൾപ്പെടുന്ന പതിപ്പിന് 2.35 കോടി ദിർഹം വരെയാണ് വില. ഇന്ത്യ, യുകെ തുടങ്ങിയ രാജ്യങ്ങളിൽ നിന്നുള്ള നിക്ഷേപകർ ഉൾപ്പെടെ കൊട്ടാരം സ്വന്തമാക്കാൻ താൽപര്യം പ്രകടിപ്പിക്കുന്നുണ്ടെന്നാണ് റിയൽ എസ്റ്റേറ്റ് വൃത്തങ്ങളെ ഉദ്ധരിച്ചുള്ള റിപ്പോർട്ടുകൾ.

ബിഷപ് ആൻഡ് നൈറ്റ്, മെഹർ പ്രോപർട്ടീസ് എന്നീ റിയൽ എസ്റ്റേറ്റ് ഏജൻസികൾ വഴിയാണ് വിൽപന നടപടികൾ നടക്കുന്നത്. റാസൽഖൈമയുടെ ടൂറിസം മേഖലയിലെ വളർച്ചയും വലിയ വികസന പദ്ധതികളുമാണ് കൊട്ടാരത്തിലേക്ക് നിക്ഷേപകരുടെ ശ്രദ്ധ തിരിയാനുള്ള പ്രധാന കാരണങ്ങളിലൊന്ന്.

പത്ത് വർഷം നീണ്ട നിർമാണം

അൽ ഖാസിമി കൊട്ടാരത്തിന്റെ നിർമാണം ആരംഭിച്ചത് 1975ലാണ്. ഏകദേശം പത്ത് വർഷത്തെ നിർമാണപ്രവർത്തനങ്ങൾക്ക് ശേഷം 1985ൽ കെട്ടിടം പൂർത്തിയാക്കി. റാസൽഖൈമ ഭരണകുടുംബാംഗമായിരുന്ന അന്തരിച്ച ഷെയ്ഖ് അബ്ദുൽ അസീസ് ബിൻ ഹുമൈദ് അൽ ഖാസിമിയാണ് കൊട്ടാരം നിർമിച്ചതെന്നാണ് ലഭ്യമായ വിവരങ്ങൾ.

അക്കാലത്തെ നിർമാണച്ചെലവ് 500 ദശലക്ഷത്തിലേറെ ദിർഹമായിരുന്നുവെന്നാണ് പറയപ്പെടുന്നത്. മാർബിൾ കൊണ്ടുള്ള മുൻഭാഗവും സവിശേഷമായ വാസ്തുവിദ്യയും കൊട്ടാരത്തെ വേറിട്ടുനിർത്തി. ഇറാൻ, മൊറോക്കോ, ഇന്ത്യ, ചൈന തുടങ്ങിയ രാജ്യങ്ങളിൽ നിന്നുള്ള വിദഗ്ധ കലാകാരന്മാർ ഒരുക്കിയ അലങ്കാരപ്പണികളും കൊട്ടാരത്തിന്റെ പ്രത്യേകതയാണ്.

ഫ്രാൻസിൽ നിന്നും ബെൽജിയത്തിൽ നിന്നുമെത്തിച്ച ക്രിസ്റ്റൽ ചാൻഡലിയറുകളും അകത്തളങ്ങൾക്ക് രാജകീയ ഭംഗി നൽകി. മനുഷ്യരുടെയും മൃഗങ്ങളുടെയും ശിൽപങ്ങൾ, ചുവർചിത്രങ്ങൾ തുടങ്ങിയവ കൊട്ടാരത്തിന്റെ രൂപകൽപ്പനയിൽ ഉൾപ്പെടുത്തിയിരുന്നു.

താമസമില്ലാതെ കിടന്ന കൊട്ടാരം

കൊട്ടാരത്തിന്റെ അകത്തളങ്ങളിലെ ചില അലങ്കാരങ്ങളുമായി ബന്ധപ്പെട്ട് കുടുംബത്തിൽ എതിർപ്പുണ്ടായിരുന്നുവെന്നും അതിനാൽ ഷെയ്ഖ് അബ്ദുൽ അസീസ് ഇവിടെ താമസിച്ചിരുന്നില്ലെന്നും പ്രാദേശികമായി പറയപ്പെടുന്നു. ഇതിന് പുറമെ മറ്റൊരു വിശ്വാസവും കാലക്രമേണ പ്രചരിച്ചു.

കൊട്ടാരത്തിൽ ആദ്യ രാത്രിയിൽ തന്നെ അദൃശ്യശക്തികളുടെ സാന്നിധ്യം അനുഭവപ്പെട്ടതിനെ തുടർന്ന് കുടുംബം അവിടെനിന്ന് മാറിയെന്നാണ് ആ കഥ. ഇതിന് സ്ഥിരീകരണമുള്ള തെളിവുകളില്ലെങ്കിലും കഥകൾക്ക് വലിയ പ്രചാരം ലഭിച്ചു. പിന്നീട് ഏകദേശം 35 വർഷത്തോളം കൊട്ടാരം ആളൊഴിഞ്ഞ നിലയിൽ തുടരുകയും ചെയ്തു.

ഇതോടെയാണ് മന്ദിരത്തെ ചുറ്റിപ്പറ്റിയുള്ള നിഗൂഢ കഥകൾ കൂടുതൽ ശക്തമായത്. രാത്രിയിൽ കൊട്ടാരത്തിൽനിന്ന് അപരിചിത ശബ്ദങ്ങളും നിലവിളികളും കുട്ടികളുടെ ചിരിയും കേൾക്കാമെന്നും ജനലുകളിൽ അപരിചിത രൂപങ്ങളുടെ നിഴലുകളും വെളിച്ചങ്ങളും കാണാമെന്നും പ്രാദേശികമായി പല കഥകളും പ്രചരിച്ചു. അങ്ങനെയാണ് അൽ ഖാസിമി കൊട്ടാരത്തിന് ‘പ്രേതബംഗ്ലാവ്’ എന്ന വിളിപ്പേര് ലഭിച്ചത്.

‘നിഗൂഢതകളുടെ കൊട്ടാരം’

വർഷങ്ങളോളം അടഞ്ഞുകിടന്ന കൊട്ടാരത്തിന് 2019ൽ പുതിയൊരു അധ്യായം ആരംഭിച്ചു. പ്രാദേശിക വ്യവസായിയും ആർട്ട് കലക്ടറുമായ താരിഖ് അഹമ്മദ് അൽ ശർഹാൻ കൊട്ടാരം ഏറ്റെടുത്തു. തകർന്ന ചുവർചിത്രങ്ങളും കാടുപിടിച്ച തോട്ടങ്ങളും വിദേശ വിദഗ്ധരുടെ സഹായത്തോടെ പുനരുദ്ധരിച്ചു.

തുടർന്ന് കൊട്ടാരത്തിന് ‘അൽ ഖസർ അൽ ഗാമിദ്’ അഥവാ ‘നിഗൂഢതകളുടെ കൊട്ടാരം’ എന്ന പേര് നൽകി. പ്രേതകഥകളിൽ മാത്രം ഒതുങ്ങിനിന്നിരുന്ന മന്ദിരത്തെ ചരിത്രത്തിന്റെയും കലയുടെയും വാസ്തുവിദ്യയുടെയും കേന്ദ്രമാക്കി മാറ്റുകയായിരുന്നു ലക്ഷ്യം.

ഇസ്‌ലാമിക, ഇന്ത്യൻ, മൊറോക്കൻ, പേർഷ്യൻ സംസ്കാരങ്ങളുടെ സ്വാധീനം കൊട്ടാരത്തിന്റെ വിവിധ ഭാഗങ്ങളിൽ കാണാം. യൂറോപ്പിൽനിന്ന് എത്തിച്ച ഏകദേശം 40 ഫ്രഞ്ച്-ബെൽജിയൻ ക്രിസ്റ്റൽ ചാൻഡലിയറുകൾ അകത്തളത്തിലെ പ്രധാന ആകർഷണങ്ങളിലൊന്നാണ്.

കണ്ണാടി പിരമിഡും അപൂർവ ശേഖരങ്ങളും

കൊട്ടാരത്തിന്റെ മുകളിലുള്ള കൂറ്റൻ കണ്ണാടി പിരമിഡാണ് മറ്റൊരു ശ്രദ്ധേയമായ ഘടകം. സൂര്യപ്രകാശം കെട്ടിടത്തിന്റെ താഴത്തെ നിലകളിലേക്കും നേരിട്ട് എത്തുന്ന തരത്തിലാണ് ഇതിന്റെ രൂപകൽപ്പന. അപൂർവ മാർബിളുകൾ ഉപയോഗിച്ചാണ് തറകൾ ഒരുക്കിയിരിക്കുന്നത്.

ചുവരുകളിൽ 12 രാശിചക്രങ്ങളുടെ രൂപങ്ങൾ കൊത്തിവച്ചിട്ടുണ്ട്. മൊറോക്കൻ ടൈലുകൾ, പ്രാവുകളുടെയും മൂങ്ങകളുടെയും പ്ലാസ്റ്റർ ശിൽപങ്ങൾ, അപൂർവ പെയിന്റിങ്ങുകൾ തുടങ്ങിയവയും കൊട്ടാരത്തിന്റെ കലാപാരമ്പര്യത്തിന്റെ ഭാഗമാണ്.

അകത്തളത്തിലെ നീരുറവയ്ക്കു പുറമെ ലോകത്തിന്റെ വിവിധ ഭാഗങ്ങളിൽനിന്നുള്ള പുരാതന വസ്തുക്കളും സംഗീതോപകരണങ്ങളും ഇവിടെ പ്രദർശിപ്പിച്ചിട്ടുണ്ട്. അതുകൊണ്ടുതന്നെ കൊട്ടാരം ഇന്ന് കൗതുകകരമായൊരു വിനോദസഞ്ചാര കേന്ദ്രമായും മാറിയിരിക്കുകയാണ്.

പുതിയ ഉടമയ്ക്ക് മുന്നിൽ നിരവധി സാധ്യതകൾ

വിൽപനയ്ക്ക് എത്തിയിട്ടുണ്ടെങ്കിലും സാധാരണ പൈതൃക കെട്ടിടങ്ങൾക്ക് ബാധകമായ നിയന്ത്രണങ്ങൾ കൊട്ടാരത്തിന് ബാധകമല്ലെന്നാണ് റിയൽ എസ്റ്റേറ്റ് മേഖലയിലുള്ളവരുടെ വിശദീകരണം. അതിനാൽ പുതിയ ഉടമയ്ക്ക് കെട്ടിടം ആവശ്യാനുസരണം നവീകരിക്കാനുള്ള സാധ്യതയുണ്ട്.

വലിയ സ്വകാര്യ എസ്റ്റേറ്റായി കൊട്ടാരത്തെ മാറ്റുന്നതിനൊപ്പം ചരിത്രവും നിഗൂഢതയും നിലനിർത്തി വിദേശ സഞ്ചാരികളെ ആകർഷിക്കുന്ന തീം ബോട്ടിക് ഹോട്ടലോ റിസോർട്ടോ ആക്കാനുള്ള സാധ്യതകളും ചർച്ചയിലുണ്ട്. റാസൽഖൈമയിലെ ടൂറിസം മേഖലയുടെ വളർച്ചയും മർജാൻ ഐലൻഡിലെ വൻകിട പദ്ധതികളും ഈ സാധ്യതകൾക്ക് കൂടുതൽ പ്രാധാന്യം നൽകുന്നുണ്ട്.

സന്ദർശകർക്കായി ഇപ്പോഴും തുറന്നിരിക്കുന്നു

വിൽപന നടപടികൾ പുരോഗമിക്കുമ്പോഴും അൽ ഖാസിമി കൊട്ടാരം സന്ദർശകർക്കായി തുറന്നുതന്നെയാണെന്നാണ് ലഭിക്കുന്ന വിവരം. രാവിലെ 9 മുതൽ രാത്രി 8 വരെയാണ് സന്ദർശന സമയം. സാധാരണ പ്രവേശന ടിക്കറ്റ് ഒരാൾക്ക് 75 ദിർഹമാണ്. ഗ്രൂപ്പുകളായി എത്തുന്നവർക്ക് ഒരാൾക്ക് 50 ദിർഹം നിരക്കിൽ പ്രവേശനം ലഭിക്കും.

സുരക്ഷാ കാരണങ്ങളാൽ കൊട്ടാരത്തിനകത്ത് ഫോട്ടോഗ്രഫിക്ക് അനുമതിയില്ല. ഷെയ്ഖ് റാഷിദ് ബിൻ സയീദ് അൽ മക്തൂം റോഡിലാണ് കൊട്ടാരം സ്ഥിതി ചെയ്യുന്നത്. ഖുസാം ഫാമിലി പാർക്ക്, ഫ്ലെമിംഗോ ബീച്ച്, മാൻഗ്രോവ്സ്, അൽ ഖവാസിം കോർണിഷ്, നാഷനൽ മ്യൂസിയം, സഖർ പാർക്ക് തുടങ്ങിയ വിനോദസഞ്ചാര കേന്ദ്രങ്ങളും സമീപത്തുണ്ട്.

ഒരുകാലത്ത് ആളൊഴിഞ്ഞുകിടന്നതിന്റെ പേരിൽ നിഗൂഢ കഥകൾക്ക് വളമായിരുന്ന അൽ ഖാസിമി കൊട്ടാരം ഇന്ന് ചരിത്രവും കലയും വാസ്തുവിദ്യയും ഒരുമിക്കുന്ന ഇടമായി മാറിയിരിക്കുകയാണ്. ‘പ്രേതബംഗ്ലാവ്’ എന്ന പഴയ വിശേഷണം ഇപ്പോഴും കൊട്ടാരത്തിന്റെ കൗതുകം വർധിപ്പിക്കുന്നുണ്ടെങ്കിലും, ഇപ്പോഴത്തെ വിൽപന അതിന്റെ വാസ്തുവിദ്യാ പ്രാധാന്യത്തെയും അപൂർവ കലാശേഖരങ്ങളെയുമാണ് വീണ്ടും പൊതുശ്രദ്ധയിലെത്തിച്ചിരിക്കുന്നത്.