സിപിഎം സംസ്ഥാന കമ്മിറ്റി: നേതൃമാറ്റ ചർച്ചയ്ക്ക് സാധ്യതയേറെ

ന്യൂഡൽഹി/തിരുവനന്തപുരം: സിപിഎം സംസ്ഥാന കമ്മിറ്റി യോഗം അടുത്തയാഴ്ച കോഴിക്കോട് ചേരാനിരിക്കെ പാർട്ടിക്കുള്ളിലെ തെറ്റുതിരുത്തൽ ചർച്ചകൾ നിർണായക ഘട്ടത്തിലേക്ക്. ജനറൽ സെക്രട്ടറി എം.എ. ബേബിയുടെ ‘പാർട്ടി ചവിട്ടി ഉഴിച്ചിൽ നടത്തി സ്വയം ചികിത്സ’ എന്ന പരാമർശത്തിന് പിന്നാലെ സംസ്ഥാന നേതൃത്വത്തിനെതിരെ കടുത്ത വിമർശനം ഉയരാനുള്ള സാധ്യതയാണ് ശക്തമാകുന്നത്.

സിപിഎം സംസ്ഥാന കമ്മിറ്റി യോഗത്തിൽ വിമർശനം കടുക്കും

ജനുവരി 13 മുതൽ 15 വരെ കോഴിക്കോട് നടക്കുന്ന വിപുലീകൃത സംസ്ഥാന കമ്മിറ്റി യോഗത്തിൽ തുറന്ന ചർച്ച വേണമെന്നാണ് പാർട്ടിയിലെ ഒരു വിഭാഗത്തിന്റെ നിലപാട്. ചർച്ചയ്ക്ക് പ്രത്യേക മാർഗനിർദ്ദേശം നൽകാത്ത സാഹചര്യത്തിൽ നേതൃത്വത്തിനെതിരെ വിമർശനം ശക്തമാകുമെന്നാണ് സൂചന.

അതേസമയം, കടുത്ത വിമർശനം വിഭാഗീയതയിലേക്ക് നീങ്ങുമെന്നും അത് പാർട്ടിക്ക് ദോഷം ചെയ്യുമെന്നും ചൂണ്ടിക്കാട്ടി ജില്ലാഘടകങ്ങളെ നിയന്ത്രിക്കാനുള്ള ശ്രമങ്ങളും സംസ്ഥാന നേതൃത്വം നടത്തുന്നുണ്ട്.

നേതൃത്വത്തിനെതിരെ എതിർപക്ഷത്തിന്റെ നീക്കം

നിലവിലെ നേതൃത്വം തുടരുന്നതാണ് പാർട്ടിക്ക് ദോഷകരമെന്ന നിലപാടിലാണ് എതിർപക്ഷം. ഭാവിയിൽ പാർട്ടിയെ നയിക്കേണ്ട രണ്ടാംനിര നേതാക്കൾ തോമസ് ഐസക്കിനെ മുന്നിൽ നിർത്തിയാണ് ഈ നിലപാട് ശക്തമാക്കുന്നതെന്നാണ് റിപ്പോർട്ട്.

കൂടാതെ, സമഗ്രമായ തെറ്റുതിരുത്തൽ ആവശ്യപ്പെടുന്നവർ നേതൃത്വത്തിനെതിരായ വിമർശനം കടുപ്പിക്കാനാണ് നീക്കം നടത്തുന്നത്. സംസ്ഥാന സെക്രട്ടറി എം.വി. ഗോവിന്ദനെയാണ് പ്രധാനമായും ലക്ഷ്യമിടുന്നതെന്നാണ് സൂചന.

തിരഞ്ഞെടുപ്പ് പരാജയം വീണ്ടും ചർച്ചയാകുമോ?

തിരഞ്ഞെടുപ്പ് പരാജയത്തിന്റെ കാരണങ്ങൾ വീണ്ടും ചർച്ച ചെയ്യേണ്ടതില്ലെന്നാണ് സംസ്ഥാന നേതൃത്വത്തിന്റെ നിലപാട്. എന്നാൽ, തെറ്റുതിരുത്തൽ റിപ്പോർട്ടിൽ വിശദമായ ചർച്ച വേണമെന്ന ആവശ്യവുമായി എതിർപക്ഷം രംഗത്തുണ്ട്.

തെറ്റുതിരുത്തൽ റിപ്പോർട്ട് അംഗീകരിക്കുന്നതിനുള്ള സംസ്ഥാന സമിതി യോഗം ഇന്ന് ആരംഭിക്കും. സെക്രട്ടേറിയറ്റ് അംഗീകരിച്ച കരട് റിപ്പോർട്ടിന്മേൽ ചർച്ച നടത്തിയ ശേഷമായിരിക്കും തീരുമാനം.

അഞ്ച് പോളിറ്റ് ബ്യൂറോ അംഗങ്ങൾ പങ്കെടുക്കും

കോഴിക്കോട് നടക്കുന്ന യോഗത്തിൽ കേരളത്തിന് പുറത്തുള്ള അഞ്ച് പോളിറ്റ് ബ്യൂറോ അംഗങ്ങൾ പങ്കെടുക്കും. തുറന്ന ചർച്ചയ്ക്ക് ഇവർ വഴിയൊരുക്കുമെന്നാണ് സൂചന.

കെ. ബാലകൃഷ്ണൻ, യു. വാസുകി, ബി.വി. രാഘവലു, അശോക് ധാവളെ, വിജു കൃഷ്ണൻ എന്നിവരാണ് കേരളത്തിന് പുറത്തുള്ള പോളിറ്റ് ബ്യൂറോ അംഗങ്ങൾ.

നേതൃമാറ്റ ചർച്ചയിലേക്ക് നീങ്ങുമോ?

പിണറായി വിജയൻ, എം.വി. ഗോവിന്ദൻ, എ. വിജയരാഘവൻ എന്നിവർ സംസ്ഥാന നേതൃത്വത്തെ ന്യായീകരിച്ചാൽ അവൈലബിൾ പോളിറ്റ് ബ്യൂറോ ചേർന്ന് അതിനെ മറികടക്കാൻ കഴിയുമെന്നാണ് എതിർപക്ഷത്തിന്റെ കണക്കുകൂട്ടൽ. ജനറൽ സെക്രട്ടറി എം.എ. ബേബി ഭൂരിപക്ഷ നിലപാടിനൊപ്പം നിൽക്കുമെന്നും അവർ പ്രതീക്ഷിക്കുന്നു.

പാർട്ടിയിലെ വീഴ്ചകൾ സംഭവിച്ചാൽ നേതൃത്വം തിരുത്തണമെന്ന് കേന്ദ്ര കമ്മിറ്റിയംഗം തോമസ് ഐസക് ആവർത്തിച്ചതും ഇതേ പശ്ചാത്തലത്തിലാണ്. ഇതിനിടെ, കേന്ദ്ര കമ്മിറ്റിയുടെ റിപ്പോർട്ടും മലയാള പരിഭാഷയും സൈബർ ഇടങ്ങളിൽ പ്രചരിപ്പിച്ച് എതിർപക്ഷം പ്രചാരണം ശക്തമാക്കിയിട്ടുണ്ട്.

“ബലഹീനതകൾ പരിഹരിച്ച് പാർട്ടിയെ കരുത്തുറ്റതാക്കാനാണ് കോഴിക്കോട് വിപുലീകൃത സംസ്ഥാന കമ്മിറ്റി.” — എം.എ. ബേബി

English summary:
The upcoming extended CPM state committee meeting in Kozhikode is expected to witness intense discussions over the party’s recent setbacks and leadership. A section of leaders is seeking comprehensive corrective measures and may raise strong criticism against the state leadership. CPM General Secretary M.A. Baby has described the exercise as a form of “self-treatment” to strengthen the party.